同最高榮譽擦身而過嘅一代猛將 — 希古恩

阿根廷一代國腳希古恩宣布，將於今個美職球季完成後高掛球靴。
希古恩曾經以36個入球，破當時紀錄成為意甲神射手，亦兩次喺當時意甲霸主祖雲達斯，成為年度最佳球員。雙槍將、射術好兼腳頭重、善於身體對抗、勤力壓迫並不斷捕捉機會，令佢成為頂級前鋒之一。希古恩贏過三次西甲冠軍、意甲冠軍同意大利盃、兩次奪得西班牙超級盃，仲有國王盃、意大利超級盃同歐霸冠軍各一。
可惜嘅係，球會同國家隊嘅最高榮譽，希古恩分別都擦身而過。歐聯決賽不敵擁有「撈麵頭」巔峰C朗嘅皇馬，實在冇計。最令人介懷嘅，莫過於2014年世界盃決賽，佢錯失大好單刀機會。
「明明可以睇住嚟食，點解一嘢射走個冠軍？」
呢條問題，估計好多人都有問過。心理質素係因素之一，希古恩嘅恩師沙利曾經指出，其情緒大起大落，「一日需要被寵愛，另一日強硬到可以打爆牆。」「當佢失落時，一定要關心佢。當佢情緒高漲，一定要被控制，否則好易越演越烈。」希古恩嘅失機，似乎係緊張嘅情緒越演越烈所致。

小弟睇返當年世界盃嘅精華先醒起，阿根廷八強面對比利時，希古恩一箭定江山嘅窩利入球，情況同決賽時，卻奧斯頭槌回傳失誤而來嘅機會非常相似。同樣係彈地波，同樣喺禁區頂，同樣係突如其來嘅機會，同樣射左下角。決賽之中希古恩緊張起嚟，可能只諗起當時記憶猶新嘅關鍵入球，而忘記咗窩利入波係高難度動作，一念之間，就將皮球急急腳射走。
當年嘅一腳，係無數阿根廷人心中嘅傷痕，尤其係希古恩自己。嚟緊嘅世界盃，如果阿根廷能得償所願，相信多多少少，都可以幫到希古恩彌補當年嘅遺憾。小弟個人亦希望如此。

希望大家多多支持！撳多幾個掣，俾多幾個鼓勵！(例如「訂閱」掣，同埋follow IG: @football_era_talking 觀看更多唔同嘅短文/資訊/睇波即時story分享)