八年前，蘇亞雷斯迎來巴塞生涯遲來的序幕

2014年夏天，蘇亞雷斯由利物浦轉投巴塞隆拿。當年因為喺世界盃咬基亞連尼而被罰停賽，所以佢要去到八年前嘅今日(10月25日)，先踢到巴塞生涯處子戰 (西甲作客皇馬輸1-3）。
當年蘇亞雷斯正處於高峰期，具備速度，盤、傳、帶、射…等技術近乎極緻，喺最前嘅位置幾乎無人能擋。利記當年班底一般，但因擁有阿蘇，而有力爭奪英超冠軍，只可惜最後差之毫釐。
去到巴塞，蘇亞雷斯同美斯、尼馬組成嘅MSN組合，足以令任何對手聞風喪膽。阿蘇喺中路作為支點，幫助兩位拍檔唔少。同時，佢亦受益於球隊良好嘅供應。當年恩尼斯達仍在陣中，拉傑迪同布斯基斯仍在高峰，蘇亞雷斯可以舒服咁發揮到自己嘅能力。
還記得阿蘇兩通大衛雷斯坑渠入波、歐聯決賽攻破祖記、車身窩利射爆阿仙奴、同美斯合作嘅十二碼、6-1逆轉巴黎時打開記錄嘅入波... 六年時光，蘇亞雷斯創造唔少經典時刻。
喺巴塞嘅尾兩年，阿蘇年紀漸大，加上傷患累積，令速度、反應同爆發力開始減弱。
縱使體能退化，但其技術依然高超，射術同把握力甚至仲有進步，19-20球季歐聯面國米嘅窩利入波，仲有同季喺西甲嘅後腳腳踭入波，叫人佩服。
蘇亞雷斯喺巴塞收獲唔少榮譽，加盟第一季隨即幫助球隊成為三冠王。輾轉六年，四奪西甲冠軍，亦嚐到歐聯冠軍嘅滋味，個人奪得過金靴獎，亦成為巴塞隊史第三射手。
除咗球場上嘅成就，蘇亞雷斯仲收穫到同美斯等隊友，彼此家庭之間嘅友情。

可惜嘅係，阿蘇當年無情地被迫離隊。佢喺車上告別巴塞訓練場嘅表情，足以說明佢對呢個地方，有著深厚嘅感情。

希望大家多多支持！撳多幾個掣，俾多幾個鼓勵！(例如「訂閱」掣，同埋follow IG: @football_era_talking 觀看更多唔同嘅短文/資訊/睇波即時story分享)