世界盃季軍戰概況/預期丨克羅地亞延續特色 摩洛哥創造歷史 分組賽翻版將有何變化？

今明兩晚十一點，將會迎來世界盃最後兩場比賽，首先有季軍戰，克羅地亞對摩洛哥。
上屆黑馬克羅地亞主力年紀漸大，正當大家認為黑馬已成老馬之時，克羅地亞三位中場大將摩迪、波索域同高華錫引領球隊踢出控球嘅極致，助球隊延續「加時賽之鬼」嘅威勢，先後以互射十二碼擊敗日本同巴西。門將利華高域功不可沒，佢撲救下三路嘅功夫尤其紮實，所以美斯面對住佢射十二碼都要刻意勁揪網頂。今屆另一位冒起嘅克羅地亞人，非「蒙面俠中堅」法迪奥莫屬，其20歲嘅活力令防守快而準，而用波方面亦有唔少心得，除牌到位以外，其多次引球變速，能推過對方前線甚至中線嘅防守。

摩洛哥由開鑼到八強，展現到鐵血防守嘅極致，未被攻入一球直到四強面對法國。早段失球加上對方取態保守，迫出摩洛哥嘅進攻才華，除施耶治同夏基美引領攻勢外，球隊幾次邊路組織足以滲入法國嘅小禁區。成為首支非洲球隊進入四強嘅摩洛哥，表現令人驚喜，而兩位中場索菲安安拉拔同安拿希，就係驚喜中嘅驚喜。門將邦奴亦係創造歷史嘅一大功臣，喺面對西班牙互射十二碼之中，其大腥腥步法嘅干擾係至勝關鍵。
克羅地亞對摩洛哥嘅季軍戰，同時亦係F組分組賽嘅翻版，當時兩隊踢成0-0，克羅地亞攻勢相對入肉，入球機會稍多。如今唔同嘅係，兩隊經過六場消耗，比賽節奏或會比當時更慢，除非兩隊都讓餓波以久嘅板凳球員上陣。而相對肯定嘅係，摩洛哥兩位受傷嘅主力中堅，沙爾斯同艾格特上場夾硬上陣不成，今場亦難以參與。摩洛哥今場防守表現難免下滑之下，小弟認為克羅地亞可被睇高一線。