「球王追夢隊」功臣逐個講-後防邊路篇 : 四大閘衛

「球王追夢隊」功臣系列，上一篇講到後防中路嘅四條硬漢，今篇輪到後防邊路嘅四大閘衛。
🇦🇷🏆阿古拿
先講效力西維爾嘅左閘/左翼衛阿古拿。雖然佢速度唔算快，但喺左路進可攻，退可守。防守功夫扎實之餘，進攻方面亦能提供充足支援。最深刻莫過於八強面對荷蘭，阿古拿面對實力強橫嘅翼衛鄧費斯不落下風，下半場更搏到其禁區內犯規，令球隊得到拉開記錄嘅十二碼。

🇦🇷🏆達利亞費高今季轉投里昂前，作為阿積士近年主力，達利亞費高喺用球方面毋須懷疑。防守方面，原本認為佢欠缺穩定，但佢喺四強同決賽頂替阿古拿正選上陣時，表現非常勇悍。除防守盡責之外，佢後上次數雖然唔多，但滿有衝勁。

🇦🇷🏆摩連拿
比迪保羅遲一季由烏甸尼斯轉投馬體會，摩連拿能夠上上落落，亦敢於喺後場用球。喺後場邊路受壓之下，佢往往能搵到空間，拗腰將波送到中場，化解危機同時化解對方前場壓迫，助球隊由守轉攻。後上助攻方面，摩連拿今屆插前次數同幅度未算多，但當佢勇往直前，喺八強就能接應美斯極細緻嘅直線單刀直入，助阿珍攻破荷蘭大門。

🇦🇷🏆蒙迪亞
圓夢一刻嘅功臣。同阿古拿一樣，蒙迪亞同樣來自西維爾，喺右閘位係摩連拿堅強嘅後盾。喺決賽，摩連拿需要不斷頻撲地限制麥巴比，到法定時間尾段，集中力難免稍有下降，進而走漏開始發力嘅麥巴比。好在稍後有蒙迪亞入替，接手艱鉅嘅防守任務。蒙迪亞加時尾段不慎犯手球輸十二碼，好在及後互射十二碼能將功補過，冷靜射入第四球，令阿根廷以至世上絕大部份球迷圓夢。
⭐⭐⭐阿珍功臣系列陸續有來🇦🇷😉