英超丨賽後文章 : 利記車仔逐漸擺脫迷惘 (利物浦 0-0 車路士)

高普教練生涯第一千場比賽，兩支陷入低潮而稍有起色嘅球隊對碰，從中逐漸擺脫迷茫。
利記防中法賓奴狀態下滑，18歲小將巴斯迪得到應付大戰嘅機會。雖然佢需時令傳球更穩定，但巴斯迪搭住基達同堤亞高，中場速率已明顯提高，呢位小將亦提供到掃蕩效果。

巴斯迪冒起，令利記中場問題減緩。當下燃眉之急嘅係解決死球防守問題。由雲迪克未受傷時，球隊面對曼城、賓福特到今日面對車路士，對方都能以角球/罰球製造入波，今場早段車仔角球入波只係僅僅越位，其後一次左路罰球亦製造到巴迪亞斯近門頭槌，好在艾利臣表現回勇化解危機。

羅拔臣今場相當活躍，除勤於前插至左輔位，亦曾到中路偏右串連快攻，再衝入右邊小禁區攻門，可惜只差半步，未能趕及皮球。

車路士方面，新兵梅迪歷令球隊進攻更完整。施耶治右邊持球牽引利記防守，再送斜線俾左邊嘅梅迪歷衝鋒陷陣，不失為一個好辦法，可惜今次只差埋門一腳。

梅迪歷初到英超後備上陣，適逢紅軍中場強度下滑，便立即展示實力威脅其後防。一次左輔位以一敵三，令唔少人諗起當年嘅夏薩特，帶波快而細緻，呢位來自烏克蘭嘅翼鋒值得期待。

🧧🧨
最後，小弟祝大家兔年身體健康！開開心心！有多啲好波睇😆😆