英超球證係造王者? 回望近年經典爭議判決，都出奇一致地……

經過各種爭議，英超各種判決尺度係點？冇人知，因為賽事中唔同比賽嘅判決欠缺一致性。例如鞋底翹起踩中對手係咪就構成「嚴重犯規」要罰紅牌？理論上唔係，但實際上似是而非。不過從另一角度睇，近年一啲經典爭議判決，都出奇一致地……⬇️⬇️⬇️⬇️
2021/22球季
12月利物浦作客熱刺失分，因而失去榜首位置。上半場哈利簡尼飛鏟唔中波之下，鞋底踩中羅拔臣，冇罰紅牌，只有黃牌。(第2幅)

同季2月曼城作客愛華頓，比賽尾段洛迪喺自己禁區內用右手二頭肌位置控球，係手球(第3幅可見)。然而愛華頓未有獲得12碼， VAR無動於衷，最終曼城一球僅勝，保住榜首位置。

當季曼城以一分優勢奪冠。⛵🏆

2022/23球季
二月份阿仙奴被賓福特迫和1-1。賓福特東尼入球過程中，助攻嘅諾加特處於越位位置，但入球仍然有效。(第4幅)

當季曼城後上奪得英超冠軍。⛵🏆
2023/24季初
曼城、熱刺、阿仙奴同利物浦四隊處於爭冠行列。
第7輪曼城作客輸俾狼隊，同一輪利物浦作客熱刺，鍾斯踩波車之下，鞋底踩中比蘇馬，VAR覆檢後判鍾斯紅牌出場。(第5幅)
其後迪亞斯冇越位下入球，旁證判越位，VAR冇劃線冇介入判決，事後被指出當時錯誤理解為原判入球有效。
下半場祖達兩黃一紅被逐，但第一張黃牌無中生有，祖達並冇接觸比蘇馬，比蘇馬倒地係因為左腳腳踭「困」中右腳膝頭而失平衡。(第6幅)
最終利物浦9打11之下以1-2不敵熱刺。

一星期後曼城作客阿仙奴，高華錫兩次飛鏟冇踢中波，鞋底分別踩中奧迪加特同懷斯，只得一張黃牌。只不過曼城逃得過踢少一人，逃不過不敵阿仙奴。(第7幅)

第11輪比賽，阿仙奴同熱刺兩支北倫敦球隊亦難逃一劫，不敗金身一齊被破。
先有阿仙奴作客紐卡素被哥頓一箭定江山，入球過程中包含三個嫌疑，皮球出界、祖列頓推跌加比爾、越位。PGMOL賽後指三個嫌疑都未能確定，所以維持入球有效嘅原判。(第8幅)
皮球出界同越位喺欠缺鏡頭下，的確未能確實判斷，而祖列頓爭頂前已經雙手從後壓住加比爾，爭頂一刻加比爾嘗試起跳但跳唔起兼向前倒地。當然，祖列頓雙手有否令加比爾倒地，屬於主觀嘅事情。
翌日，熱刺主場被車路士以1-4擊敗。比賽轉折點在於，阿根廷中堅羅美路喺自己禁區掃把腳踢中波後，鞋底印中同胞安素費蘭迪斯，繼而被判紅牌+12碼全餐。(第9幅)

判熱刺輸十二碼無可厚非，但呢球以至以上提到鞋底踩中人嘅犯規算唔算serious foul play? (例書中定義喺最尾一幅) 當中「使過度的力量或危及對方球員安全」一句，可圈可點，其實都係球證主觀嘅事情，反映現時球例中「嚴重犯規」容許球證主觀判斷嘅空間頗大，令同一賽事中唔同比賽嘅判決尺度欠缺一致性。

其實英超無須害怕被各界批評，因為球迷唔會捨得罷睇，而爭議性判決甚至誤判，甚至能帶嚟話題同熱度。
而從另一角度睇，其實各種尺度不一嘅「嚴重犯規」，加上各種誤判，尺度都非常一致……🫢🫢
今輪聯賽過後，曼城重回榜首位置⛵🏆

小弟冇證冇據，當然唔可以斷言match fixing甚至league fixing嘅存在，亦絕對唔希望有。以上只係陳述一系列事實，加上些少值得討論嘅地方。

自己一直欣賞曼城嘅足球，哥迪奧拿麾下嘅球隊，經過不斷進步，現時因爐火純青而獨一無二，彷彿告訴世人「波，就係咁踢」，冠軍呢家嘢，其實唔洗人哋「做俾你」嘅。⛵🏆👍🏻