足球教學 — 基本功教學：的波

基本，基本，基本。腳法可以好花巧、射球可以好獨到，不過基本功仍然係不可或缺嘅，任你有懷斯嘅極重腳頭，如果盤球、扭波做得唔好，你根本入唔到射程範圍起腳。

今次阿叔就同大家講下一切控球嘅原點：的波！其實呢個技巧可能好多人都識，不過你又無試過好有系統咁練一次呢？如果你係初學嘅，就更加要跟住呢set練習，日日訓練自己嘅控球！

最基本嘅，就係「的」一下先！初時可將皮球彈一彈地先，再用腳面將皮球踢向自己身體，再用手接住。熟咗之後就可以skip咗彈地，用左腳的波、接住、放手，再用右腳的波、接住、放手。
進階一啲，就可雙腳一齊練！都係用手攞住個波先，放手，右腳的波、交去左腳，左腳向上的，用手接住。

最後，就可以進行「無限迴廊」式訓練！每次的波次數都加一，即係的一下，接實；的兩下、接實，直到失敗為止！你最多可以做到幾多下呢？
http://www.youtube.com/watch?v=iXXpw4vAEYE&list=PL1F38A7FC6AF5FC99