唔想一個人睇波？玲玲師傅醒你鼠年脫單攻略！

男人成日話同班兄弟一齊睇波有幾爽幾自由，其實好多時係冇得揀，甚至平時都係自己一個喺屋企毒自一人睇，如果你咁啱係曼聯迷、熱刺迷、阿仙奴迷，成日和波輸波，嗰個心情真係有苦自己知，你話如果有個女朋友陪住一齊睇，輸咗有人安慰，贏咗一齊興奮，就幸福好多啦！

眨下眼又就到農曆新年，好多人嘅煩惱都係拜年見到啲親戚，一定被追問「拍拖咩呀？」之類尷尬問題，弊在狗年已經過咗兩年，都仲做緊「單身狗」。另一邊廂，歐洲各大聯賽繼續密鑼緊鼓如火如荼，球迷就當然寧願留喺屋企瘋狂睇波，唔想出去應酬啲姨媽姑姐。不過唔使擔心，只要你掌握催旺桃花嘅攻略就有機會脫單成功，因為今年庚子金鼠年係雙春兼閏月，只要好好把握機會，好姻緣話嚟就嚟。

毒樂樂不如眾樂樂，想搵方法唔使新年一個人睇波？玲玲師傅教路：今年嘅東北為一白桃花星，而桃花星屬水，想拍拖嘅朋友，記得喺東北放水種嘅鮮豔花卉，又或者擺放粉紅水晶、紅紋石同紅色絲帶花都有幫助。唔單止整靚你間房，仲可以催旺姻緣！

除咗屋企嘅佈置之外，都可以喺個人身上著手。任何生肖嘅單身一族想提升愛情運，可以佩戴一啲粉晶飾物。除此之外，諗住新年足不出戶喺屋企睇波就可以等運到，直頭係犯咗大忌，新春期間應該多啲出街沾下旺氣，如果唔係又點識新朋友呢？就算係出街去啲有喜慶氣氛嘅地方影相打下卡，俾人感覺你個人樂觀開朗、多采多姿都會有幫助。

今年嘅大年初一至初四，喺西九文化區就啱啱好有個國際巡遊表演，費用全免，到時現場會有嘉年華、舞台表演、攤位，夠晒精彩。仲有一點千祈唔好忽略，就係西九文化區唔同地方都會掛滿特色燈籠，記得要搵齊打卡位，喺呢啲花型裝飾度影幾張靚相，用埋呢個可愛嘅filter影相吸睛，po上IG同Facebook，就吸引到異性嘅注意啦！

玲玲師傅教路鼠年旺桃花攻略
宜

• 東北位放水種鮮豔花卉/粉晶/紅紋石/紅色絲帶花
• 配戴粉晶飾物外出
• 用可愛造型吸睛

忌

• 新年足不出户
• 桃花位亂放擺設

跟足以上攻略，新一年實情場得意，唔使再一支公睇波！