《C朗－勝利執著？ vs 打不死精神？》

90+2，C朗頭搥建功，為葡萄牙追成1─1。補時追和，興奮程度有如絕殺般激動，但C朗第一時間唔係衝去角球旗擺出一貫嘅皇者入球慶祝動作，而係喺網入面執返個波，然後匆匆跑返去中圈，爭取時間開波。慶祝？僅僅同隊友擊咗下掌。


當時距離完場只係得返2分鐘補時。

「友誼賽啫，使唔使咁搏？2分鐘，淥杯麵都未滾啦。」

當時可能大部份人都係咁諗，但偏偏C朗唔信，唔甘心1─1完場，而最後又真係畀佢喺最後最後最後一個攻勢（90+4），再次用頭搥攻入反超前2─1嘅一球。如果唔係球證要睇視像裁判決定入波係咪有效，C朗早已將破門後嘅激動留喺慶祝嗰陣。


有人覺得過份上心：「使唔使咁搏呀，友賽啫，又唔係大賽─」；亦有人認為鬥心正確：「友誼定正規賽，都要用超過100%嘅鬥心面對─」

你係覺得「對勝利太執著」定係「有鬥志打不死」，真係觀點與角度（當然外加球迷對C朗嘅印象），但至少佢話到畀我知，原來漫畫入面非常老土但又好熱血嘅情節，現實都可以發生─

只要未完場，仲有贏波機會，當你想放棄，就係真正完場嘅時候➖

真係好老土，但我受呀！

足球，唔係應該就係要咁咩？