【有片睇】男版阿梅！英業餘賽驚現太極手救波

睇過星爺套經典《少林足球》嘅，相信都會記得趙薇飾演嘅阿梅守龍嗰陣用太極手救波，以柔制剛，用陰柔嘅力度化解又急又勁嘅射門。喺日前英國嘅一場業餘盃賽入面，一個叫謝菲斯（Peter Jeffries）嘅門將就以匪夷所思嘅手法，將一個極近距離嘅射門撲走，技驚四座！

喺禮拜二嘅一場業餘波盃賽，干沙特以1:3不敵南盾隊，但喺比賽入面，干沙特嘅門將謝菲斯一戰成名！當時南盾隊攻緊干沙特，喺一次右路傳中，南盾隊嘅哥登近門一射，眼看入硬之際，謝菲斯右手一撥，嚟個鯉魚翻身，個波就隨住謝菲斯轉身，喺龍門口嚟吓U-Turn急轉彎，最後將個波扔番出去。英國《天空體肯》話呢吓救波係集體操、雜技同魔術於一身，但如果用中國文化去形容，應該可以話係集太極、乾坤大挪移同埋斗轉星移於一身嘅一擊！