《危機解密》曼聯球員問題逐一點評（後防篇）

顯示分享連結
曼聯喺「後費格遜年代」已經換咗五次領隊 (唔計暫代領隊)，始終冇辦法將曼聯帶返以前嘅高度。早前曼聯左閘梳爾 (Luke Shaw) 接受訪問時表示球隊上下唔係團結一致，亦唔係每一個球員都全力以赴。可見曼聯嘅問題除咗管理層同埋領隊之外，球員嘅心態都係一個好重要嘅元素。
今集我哋就以球員角度出發，逐個點評睇一睇到底呢班一隊球員心態上出咗咩問題。

門將：
１　迪基亞 David de Gea
心態：★★★★☆
能力：★★★★☆
表現：★★★★☆

不經不覺迪基亞已經從以前嘅黃毛小子，變成而家隊中其中一個年資最長嘅球員。
今季迪基亞表現出色，更連續奪得每月最佳球員獎項，所以話弱隊出門將並唔係冇道理。雖然迪基亞嘅傳球能力同後防領導能力相對較低，不過絕對唔會係近排曼聯低迷嘅主要原因。

２６　軒達臣 Dean Henderson
心態：★★★☆☆
能力：★★★☆☆
表現：★★★☆☆
礙於迪基亞嘅出色表現，軒達臣嘅出場機會寥寥可數。不過軒達臣嘅存在亦唔多唔少畀到迪基亞良性壓力，令佢更打醒十二分精神。
雖然偶有傳出佢不滿機會過少，要求離隊嘅消息，但亦不足以成為球隊表現差劣嘅原因，相信今個冬季轉會窗好大機會會外借離隊。

中堅：

５　麥佳亞 Harry Maguire
心態：★★★☆☆
能力：★★★☆☆
表現：★★☆☆☆
麥佳亞嘅表現唔值佢八千萬鎊嘅身價相信已經冇乜爭議，身為隊長亦唔見得畀到大家好大嘅信心。個人覺得呢位「八千萬鎊先生」嘅能力問題點都大過心態問題，正所謂「蜀中無大將，廖化作先鋒」，縱使麥佳亞頻頻「派膠」，又瘋狂追住自己友梳爾嚟 Mark，但係已經係曼聯陣中極少數可以依靠嘅「健康」中堅了。

１９　華拉尼 Raphaël Varane
心態：★★★★☆
能力：★★★★☆
表現：★★★☆☆
華拉尼嘅加盟好似仍然唔係好現實咁，可能係因為呢個法國中堅季中曾經傷過一段時間，上陣次數並唔多。當初希望呢個頂級中堅會令曼聯後防變得穩固嘅憧憬，好似亦未能兌現。能力上，心態上，相信暫時都無可挑剔，或者仲需要多啲時間習慣英超節奏，有待觀察。

２　連迪路夫 Victor Lindelöf
心態：★★★★☆
能力：★★★☆☆
表現：★★☆☆☆
當年吹捧嘅「新冰人」，慢慢被笑稱為「漸凍人」，連迪路夫防守意識上雖然不過不失，但唔夠「硬淨」始終都係佢嘅致命傷。同麥佳亞一樣都係能力問題大過心態問題，不過都係果句，一個「健康」嘅曼聯中堅，仲有咩好求。

４　鐘斯 Phil Jones
心態：★★★★★
能力：★★★☆☆
表現：★★★☆☆
原本並唔諗住著墨喺鐘斯身上，畢竟喺上一場之前鐘斯已經兩年冇為曼聯一隊上陣過。強大嘅心態係漫長嘅康復之路中不可或缺嘅，當然我哋並唔能夠奢望呢位「前朝元老」可以帶領曼聯後防，寄望佢能夠保持健康，將昔日嘅「熱血」、「打不死」精神重新灌注落曼聯球員嘅 DNA 入面。

如果喜歡我們的文章，請即分享到︰