《危機解密》曼聯球員問題逐一點評（兩閘篇）

顯示分享連結
曼聯喺「後費格遜年代」已經換咗五次領隊 (唔計暫代領隊)，始終冇辦法將曼聯帶返以前嘅高度。早前曼聯左閘梳爾 (Luke Shaw) 接受訪問時表示球隊上下唔係團結一致，亦唔係每一個球員都全力以赴。可見曼聯嘅問題除咗管理層同埋領隊之外，球員嘅心態都係一個好重要嘅元素。
上回我哋已經探討咗門將同埋中堅球員嘅問題，今集我哋就繼續以球員角度出發，逐個點評雙閘球員，睇一睇到底呢班一隊球員心態上出咗咩問題。

右閘：
２９　雲比沙卡 Aaron Wan-Bissaka
心態：★★☆☆☆
能力：★★★☆☆
表現：★★☆☆☆

曼聯右閘位置自前隊長華倫西亞離隊之後一直都係球隊嘅一大問題，直到蘇斯克查將雲比沙卡帶到奧脫福，以為問題就此解決。
的確，雲比沙卡嘅一對一防守能力算係頂尖，但其防守意識同埋專注力欠奉，頻頻出現失位、夢遊嘅情況。最為人垢病嘅當然係佢嘅進攻能力，無論盤扭、傳中、傳球都欠缺技術，相信大家對佢次次邊線回後、毫無目的性傳中嘅畫面並唔陌生。
喺呢個依賴雙閘進攻嘅現代足球體系，不得不承認右路啞火的確係曼聯低迷嘅原因之一。

２０　達洛 Diogo Dalot
心態：★★★★☆
能力：★★★☆☆
表現：★★★☆☆
經過一年後借 AC米蘭嘅經驗之後，被摩連奴稱為「最佳年輕右閘」嘅達洛終於返番曼聯。明顯地達洛嘅風格屬於「攻強守弱」，其傳中、盤扭技術上有一定能力，亦係近期受新帥蘭歷克重用嘅一大原因。
心態上達洛亦有不錯嘅表現，最近對維拉嘅杯賽賽事入面被對手剷傷後仍然帶傷忍痛踢足九十分鐘亦係一大引證。

左閘：

２３　梳爾 Luke Shaw
心態：★★★★☆
能力：★★★★☆
表現：★★★☆☆
左閘梳爾正正就係提出曼聯球員心態問題嘅人，當然佢自己本人嘅心態亦有一定程度嘅水平。經歷斷腳慘劇嘅梳爾已經成為曼聯穩定嘅正選左閘，而另一左閘泰利斯嘅到來反而令梳爾打出自己最佳嘅水準。
雖然近期狀態有所回落，但相信佢短期內亦會穩佔曼聯左閘位置。

２７　泰利斯 Alex Telles
心態：★★★★☆
能力：★★★☆☆
表現：★★★☆☆
當初泰利斯加盟曼聯嘅時候，相信有唔少人都相當期待佢嘅進攻能力能夠提升曼聯嘅整體攻力，結果泰利斯嘅最大功用卻係激發梳爾嘅表現。喺有限嘅上陣機會入面，泰利斯都展視出其強大嘅爭勝心同埋進攻能力，不過要喺左閘位置爭贏梳爾相信仍需努力。

如果喜歡我們的文章，請即分享到︰