日常冷知識 - 從手套設計透視賽會贊助商嘅陰謀？
唔知大家有無留意，有時會見到有職業球員要遮住手套上面嘅牌子 Logo？曾經有人以為保方同 Puma 鬧翻要簽第二個品牌，所以臨轉牌子之前就遮住手套上面隻豹 🐆 更有傳聞係歐聯官方贊助商 Adidas 為打壓其他品牌而做嘅小動作……
呢個世代最緊要 Fact Check，所以今日就同大家解釋一下點解會有呢個情況。如果有留意嘅朋友，可能同時會發現遮住 Logo 呢個情況只會喺同 UEFA 歐洲足協有關嘅賽事（例如歐聯同歐霸）先會出現。其實係因為 UEFA 有一條對於龍門手套 🧤 商標嘅規例 (UEFA Equipment Regulation, Edition 2018)，就係手套上嘅品牌商標唔可以大過 20 cm² 。
所以如果龍門手套上面嘅商標大過 20 cm² 📏 嘅話，就唯有搵野遮住佢先可以落場。不過呢條例就好似得 UEFA 先有，因為睇返其他歐洲本土聯賽既賽事，或者國家隊嘅賽事，都好似無發生以上要遮 Logo 嘅情況。
而 Nike 作為一間大廠，又點會向呢條規例屈服 😎 大家可以留意下 Nike 贊助嘅龍門，例如係曼城嘅艾達臣 Ederson Santana de Moraes 同埋利物浦嘅艾利臣 Alisson Becker，佢地喺踢英超同歐聯嘅比賽就算戴返同一隻配色嘅手套，個 Nike Logo 都有大細之分。英超就戴返正常大細設計既 Nike Logo 版本，而歐聯比賽就戴一對個 Nike Logo 細過 20 cm² 嘅落場版手套。而無論大剔定細剔手套，Nike 都有公開發售，做 Nike 手套嘅 fans 真係個荷包無返咁上下厚都搞唔掂...💸 💸 💸
然而剛剛提及嘅艾利臣亦都有因為呢條規例搞到自己都亂埋 😂 話說就喺剛剛 2019 年嘅世界冠軍球會盃中，艾利臣為利物浦上陣嘅時候，唔知佢係咪撈亂咗以為世冠盃喺 UEFA 歐洲足協搞嘅比賽，當發現自己帶咗大剔手套去卡塔爾，就喺四強對蒙特雷果陣搵啲膠紙遮住個 Nike 大剔。之後可能自己發現咗，又或者 Nike PR 提返佢，話其實世冠盃無相關限制，所以艾利臣踢決賽嘅時候就終於醒覺，解禁返手套個 Nike Logo 出黎喇！