名宿桑拿士唔識扮識 羅里斯躺著也中槍

本人就覺得就算一個人無世界級嘅能力都唔代表你唔可以評論世界級嘅選手嘅，最緊要講得有道理，如果唔係咁無人可以評論紐亞 艾利臣 同 奧比勒。但係如果你連講野之前都唔用下個腦，唔諗清楚就出黎指責人地，就抵比人鬧嘅。
講緊嘅係前熱刺、利物浦、格拉斯哥流浪球員桑拿士琴晚喺熱刺被韋斯咸追和 3:3 呢場賽事之後對羅里斯嘅評論。佢就話雖然以前施文都會成日用 Top Hand 技巧，但佢都係唔明點解啲門將要好似今次羅里斯咁要以 Top Hand 去救呢球，如果用返左手去救佢覺得羅里斯就一定會救到，因為佢覺得左手邊嘅波就要靠左手去救，因為個覆蓋範圍比右手好，明明佢用右手都掂到波皮，如果用左手實救到，所以呢球係羅里斯嘅錯，而事後桑拿士當然比一眾網民插到飛起....

我初初聽完佢講就嚇一跳，然後就得啖笑。首先佢話左手覆蓋度一定好啲已經一定唔正確，因為假設飛去左邊，用左手救波確實於「闊度」上係可以覆蓋得遠啲，但其實如果論高度嘅話，龍門已經打斜咗個身飛緊去左邊，左手係比右手距離地下更加近，所以「高度」上一定係右手覆蓋得高啲。

另外以 Top Hand 救楣底波有另一個好處就係，由於門將已經打橫飛緊， Top Hand 嗰隻手其實撲出去個動作同門將身體動作嘅方向係一致，而且隻手喺身體嘅上面，所以其實係唔需要用咁多力就可以伸到最盡從而去撲走個波。而如果夾硬用返同一邊嘅手，由於呢邊隻手臂喺身體嘅下面，首先手臂要打橫伸出再由下至上咁拉上去，所需要嘅力量一定比 Top Hand 多，所以呢邊隻手掂到波一刻其實隻手已經流失咗唔少能量，最後可能掂到個波都照入。
咁講返羅里斯呢球，首先以呢球嘅高度同角度，羅里斯選擇用 Top Hand 去救我覺得就一定無錯。因為其實個波嘅角度唔係真係離佢好遠之餘，高度上真係只係門楣對落少少。加上個波有返咁上下力度同速度，如果羅里斯用左手救，其實隨時連波皮都摸唔到。

其實羅里斯呢球真係飛到盡，盡曬力，唯一一個位我睇多咗幾次慢鏡發現到嘅係，見到佢其實迎接呢一球之前係兩隻手都有舉起，最後關頭先選擇用右手做出 Top Hand Save，可能就係呢一下嘅猶疑令到佢嘅右手掂到波嘅一刻並唔係最佳狀態，不過蘭仙尼呢球根本就世界波黎，電光火石之間要做決定，掂到波皮都算係咁啦，邊有得怪門將，桑拿士你都係唔好出聲算啦。

桑拿士 Sky Sports 評羅里斯片段