歐聯賽後評 - 拿華斯罕見失誤

歐聯小組賽又返黎喇，昨晚其中一場最多人留意嘅相信一定係 PSG 對曼聯嘅賽事。而不負所託，兩位門將拿華斯同迪基亞都有唔少精彩撲救，而迪基亞更被選為呢場賽事嘅最佳球員添。之不過其實 PSG 失嘅第二球其實拿華斯都算係出乎意料地犯上咗一啲比較微細嘅失誤，而個人而言我覺得以佢嘅能力係絕對可以避免從而令巴黎唔使輸波添。
PSG 輸嘅第一球係一球12碼，曼聯當然係派出般奴費蘭迪斯操刀。第一次主射嘅時候其實比拿華斯捉到路成功撲出，點知 VAR 老時常出現，影到拿華斯喺般奴費蘭迪斯掂波一刻雙腳離開曬白界，所以判曼聯重射。而般奴費蘭迪斯補射就決定再射返同一邊，今次拿華斯捉錯路，令 PSG 先落後 0:1。

不過12碼一係入一係唔入，無得好講，只能夠慨嘆新例下門將嘅優勢真係愈黎愈少。之後 PSG 其實曾經憑住馬斯亞嘅烏龍球追平 1:1，可惜於87分鐘普巴喺禁區頂橫傳比華舒福之後，華舒福推多兩推一下快腳射地波直飛遠柱入網，令曼聯繼上季之後再次於歐聯賽場作客擊敗 PSG。

呢球就咁睇，有人可能會話華舒福射得咁靚之餘拿華斯都叫有反應啦，咁都有得話佢失誤？首先我發覺華舒福起腳一刻，拿華斯先剛剛跳起做撲救前嘅小跳步，令到佢身體可以做出反應一下其實已經遲咗少少。再加上小跳步之後佢淨係得左腳有落地，右腳只係做出凌空向左掃嘅動作，變相佢飛撲去右邊需要用到嘅 Power Step 由右腳變咗做左腳，令到拿華斯無用到最順嘅右腳借力再飛去右邊。
小跳步之後右腳凌空向左掃嘅動作其實有唔少門將都會咁做，對家嘅迪基亞就係一個例子，呢一個動作係為咗移開右腳令右手可以有足夠空間落地救到一啲比夠近身偏右嘅地波。其實拿華斯失呢球之前已經用過呢個技巧一次而且係成功嘅，就係69分鐘撲出同樣係華舒福嘅射門，不過呢球嘅角度就比較正中，而且拿華斯企得比較前去封位，所以呢球拿華斯就可以成功做出撲救。但87分鐘嘅呢一球其實華舒福射到貼曬柱，加上角度比69分鐘嗰球較窄，令拿華斯並無之前企得咁前封位，令到個射門絕對唔算近拿華斯身旁，所以今次拿華斯確實地係用錯咗技巧去救呢一球，

不過點講都好，華舒福呢下快腳確實係射得靚，加上拿華斯其實全場表現都算非常唔錯。呢一下電光石火之間嘅本能反應，相信佢撲嘅一刻都無特別諗要點做。不過相信以拿華斯嘅能力，佢一定會好唔甘心自己竟然去到後段咁樣失波令球隊輸波。

歐聯 20/21 巴黎聖日耳門 對 曼聯精華：
https://www.youtube.com/watch?v=vUT-46D-Cf8