犯錯後要儘快調整 年青門將心理質素有待改善

又係英超門將賽後評嘅時候，今次就想講下兩位年青門將似乎因為先前嘅犯錯失波，而之後又未能重拾狀態而引致即使本身有能力處理都變成連番失誤。
1. 美利亞 Illan Meslier
首先想講嘅係列斯聯嘅門將美利亞 Illan Meslier。呢位門將現時只係 20歲，但上季季尾已經成功由前皇馬門將卡斯拿 Kiko Casilla 手中搶到列斯聯嘅正選門將一席位，一路到依家升班到英超仍然係教練比爾沙心目中嘅一號門將，有唔少球迷都睇好佢日後可以成為法國國家隊成員之一。

而美利亞今季一路表現都唔錯，無論係撲救定係傳送方面佢都完全唔似一個只係 20歲嘅球員，不過今場作客對住水晶宮就終於暴露咗佢缺乏經驗嘅呢個小弱點。首先水晶宮嘅第一個入球係黎自一個角球攻勢，丹恩以一個頭鎚攻門成功打開紀錄，而呢一球美利亞雖然算係撲得到個波，但由於佢準備丹恩攻門一刻已經跳咗入去自己龍門嘅白線後，令到佢撲到個波一刻其實已經過曬白界。

犯錯唔緊要，最緊要重拾信心調整好自己重新出發。之後水晶宮嘅第二個入球亦都唔係美利亞嘅錯，因為艾斯嘅罰球確實係射得靚，不過之後水晶宮嘅第三個球就係今次嘅重點。雲安荷治喺左路傳出一個地波，省中列斯聯嘅艾達哥斯達，最後變成一個折射射穿埋美利亞嘅十指關，令水晶宮當時領先 3:1。
呢一球睇返慢鏡，唔知美利亞嘅信心係唔係已經有所動搖，令到佢準備迎接呢個傳中波嘅身體姿勢同埋重心擺到亂曬。首先美利亞嘅上半身完全正面對住個波，如果佢企喺近柱隔離都還好，但佢嘅企位同近柱都有兩三個身位距離，呢個姿勢令到佢如果要撲向龍門嘅方向就只會撲埋入網。你可能話，如果佢識撲向前咁咪唔會撲入網囉，不過由於睇返呢球係一個折射球，美利亞要喺咁短時間內作出反應其實本身已經唔易，仲要佢向前撲（即係等於再減少自己嘅反應時間）似乎對佢就有太高嘅要求。然後美利亞嘅重心已經擺曬向外，即係已經一心諗住出迎迎接呢個傳中，完全無為任何向龍門方向嘅波做準備，變相令到佢回身變得困難。

所以呢一球我認為美利亞如果要係佢原本嘅位置準備，身體可以向外擰多大慨10至15度，令到佢撲救時右臂打橫延伸嘅角度都只會係撲出界，即使雲安荷治並無省到哥斯達傳中成功，呢個本身已經半向外嘅身體姿勢會令到佢需要完全轉身對住外面嘅時間縮短。同時好重要嘅就係靠小跳步去重整自己嘅重心，儘量唔好偏左偏右，將重心維持返係中間去預備任何方向嘅射門。

2. 藍斯度 Aaron Ramsdale
之後想講嘅就係錫菲聯嘅藍斯度 Aaron Ramsdale，呢位22歲嘅英籍門將以一千八百萬鎊由般利茅夫轉會錫菲聯之後一直都受到唔少壓力，因為好多人會將佢同上一季由曼聯外借至錫菲聯，表現神勇而且同屬英籍嘅甸軒達臣作比較。
藍斯度其實係錫菲聯嘅青訓產品，所以呢次轉會都算係愛回家而大部份錫菲聯球迷都表示支持。不過黎到之後，暫時藍斯度嘅表現都只能算係中規中矩，雖然都有作出唔少精彩撲救，但同時亦都有犯上唔少錯誤令本身可以救到嘅波都變救唔到，而今場車路士對錫菲聯比賽入面車路士嘅第四個入球就係其中一個例子。
本身車路士嘅第二同第三個入球，藍斯度已經分別因為唔敢出迎同出迎位置錯誤令到捷維爾同泰亞高施華幫車路士增添紀錄。都係同一句，錯唔緊要，最緊要儘快重拾自信，完場之後再做詳細檢討。但似乎藍斯度同之前美利亞嘅狀況一樣，信心有所動搖。

比賽去到80分鐘，錫菲聯一個傳球失誤令到車路士嘅添姆華拿得到一個單刀機會。藍斯度本身見到華拿同佢仲有一段距離，佢非常決斷地即刻移後，補返佢同門線中間嘅空位。本身呢個決定非常之好，原因就同上一個 Post 講甸軒達臣一樣，14碼以外嘅單刀波出迎封位其實係無乜作用，寧願逗返後等前鋒再推先再做反應。去到華拿起腳一刻，藍斯度其實成個準備動作都做得唔錯，點知最後一刻佢突然決定捉路重心移向遠柱，最後華拿只係射一球藍斯度左手手旁嘅波，但藍斯度重心已經偏右嘅關係就變成一個無可能回身撲救嘅情況。
呢兩球波其實又係好似之前分析過嘅無數咁多球波一樣，無可能怪責門將。但事實係如果位門將可以冷靜啲去處理，每個微細位置都再做好啲，又真係唔係無得救。大家又覺得兩位門將今場嘅表現同埋係幾個失波嘅應對上表現如何呢？