迪基亞罕有小失誤 準備動作何其重要

前晚其中一場歐聯比賽由曼聯對住土耳其嘅巴沙克舒希，今次曼聯終於報仇成功以 4:1 擊敗巴沙克舒希，而今次蘇斯克查就收起上次嘅正選甸軒達臣起用返迪基亞做正選。而今場迪基亞其實表現繼續算係唔錯，似乎甸軒達臣嘅回歸真係對佢有正面嘅影響。不過今場曼聯失嘅一球，雖然呢球罰球巴沙克舒希嘅杜魯治射得靚，但其實迪基亞喺準備動作 Set Position 上仍然有改進嘅空間。
呢球罰球離球門正中央大慨28碼，角度偏門將嘅右手邊。首先大家睇到迪基亞嘅企位對於呢個角度嘅罰球黎講其實係企得比較深（圖1），雖然已經有人罰擋一擋，但由於有返咁上下嘅距離，其實要射穿人牆嘅難度並唔算太高。

而企得咁深加上迪基正心口正面面對住個波（圖1），即係代表佢嘅右邊膊頭同時直接指向龍門內（圖2），咁就會令到門將撲救近柱波嘅時候比較吃力。因為雖然近年都有唔少教練指導佢地嘅門將向「前」大慨45度撲而唔係平時打橫嘅90度撲救，從而再封窄射門嘅角度，但咁樣就會變相提前咗門將同個波接觸嘅時間，即係話門將向前撲嘅反應要比起向橫撲更快先可以做到呢一個向「前」撲嘅動作。而迪基亞呢下嘅 Set Position，就正正令到佢要有非常快嘅反應向前撲先唔會將個射門撲入龍門。

到最後杜魯治呢球罰球雖然唔係射中死角，但因為有返咁上下球速而令到迪基亞反應唔切只可以向自己嘅右邊撲救而唔係向前撲，所以當迪基亞已經接觸到個波嘅一刻個波已經過曬白界。所以呢一下我認為迪基亞除咗可以企前多大慨2碼倒之外，應該右邊膊頭指向門柱外，令到佢如果可以喺門線前撲到個波都唔會撲埋入網。
講到尾杜魯治呢球真係射得算唔錯，雖然我認為就算迪基亞做足剛剛所講嘅準備動作都未必一定可以救到，但起碼做好咗自己嘅本份做好 Set Position 先，咁就唔會好似呢球咁睇落覺得失得咁難睇，搞到過曬白界先撲到個波了。