魯拿臣連環失誤 令阿仙奴近況雪上加霜

週中舉行咗英格蘭聯賽盃賽事，當中包括由阿仙奴主場迎戰曼城嘅比賽。當中阿迪達收起門將蘭奴，以今季由法甲迪安加盟嘅冰島籍門將魯拿臣 Alex Runarsson 擔任正選，不過佢今場嘅表現真係令到就算唔係阿仙奴球迷嘅朋友都會感到好唏噓...
首先開波無耐曼城一個左路攻勢，由施真高推到落非常貼底線嘅位置傳中，以當時個波嘅距離魯拿臣企返喺門框中間位置係正確決定，令自己可以同時應付近柱及遠柱嘅波。但當施真高斬一個前柱落點嘅波嘅時候，魯拿臣本身反應已經慢咗，加上佢預判個波嘅飛行路線以及落點錯誤，然後連阿仙奴嘅梅斯達菲完全無留意身後嘅加比爾捷西斯，令到魯拿臣最後搶點失敗比加比爾捷西斯快佢一步頂入。

呢一球比較好嘅處理方法係，首先魯拿臣應該反應夠快去預判到個波比較貼近柱，然後諗定要接實定打出，再走到去前柱喺梅斯達菲身後搶點作出攔截。但由於魯拿臣本身反應已經慢咗，令到佢點都唔會夠捷西斯搶，咁呢一刻佢應該即刻修正並企後兩步爭取反應時間做撲救。可惜現實中佢明知自己慢咗都仍然決定出迎，但只能企喺捷西斯身後等波到，最後令到捷西斯同頂入空門無分別。
之後去到比賽嘅第41分鐘其實魯拿臣救咗一球好精彩嘅單刀。當時由霍頓喺禁區頂一個後腳交咗比捷西斯，而當時捷西斯單刀面對住魯拿臣，而因為捷西斯已經入到14碼以內所以魯拿臣果斷出迎，大大縮窄捷西斯嘅射門角度。最後魯拿臣一下超快反應嘅撲救擋出捷西斯嘅半腰高度射門，實在值得一讚，可惜之後嘅兩個失波再次令人失望...


比賽去到第54分鐘，曼城有一個禁區頂嘅罰球機會。當時由馬列斯操刀，其實最後佢只係射一個遠柱而大慨去到頭嘅高度嘅一個射門，正路使用 W 手係可以接實或者撲走，點知魯拿臣一下牛油手就漏咗入網，令曼城領先 2:1。其實呢下使用「牛油手」呢三個字係唔足夠形容，因為當中魯拿臣其實係犯上幾個問題而引致呢一下甩手。
首先由馬列斯未射門前，魯拿臣嘅企位已經做得唔好，唔知係咪因為啲人牆同反人牆遮擋咗佢嘅視線而令到佢企得過份貼近柱，其實佢大可以企返左兩步望到個波已經可以。之後由於曼城嘅反人牆排得相當好，本身已經擋住曬魯拿臣嘅視線，而洛迪更加喺馬列斯起腳一刻推開高拿斯勒，個波就係正高拿斯勒原本企嘅位置飛向球門方向，殺魯拿臣一個措手不及，加上魯拿臣嘅 Set Position 做得唔好，兩隻手放得太低（差唔多放到去膝頭隔離），令到佢救呢球波需要額外嘅時間去遞高隻手做撲救。

馬列斯射門一刻，除咗魯拿臣準備得唔好之外，佢仲突然向左邊跳咗一小步，可能佢終於見到個波一刻先發覺自己企得太過大細邊，但點知向左邊跳之餘，佢嘅左腳落地一刻係比起右腳跳得更後，左腳最後係企到踩埋白界線，令到而兩隻腳同上半身嘅身體平衡完全亂曬，加上門將準備動作向後跳，令到佢身體好難產生足夠嘅反作用力去撲走射門。

最後再加上佢兩隻手臂擺太貼身，無伸前啲令到前臂有足夠空間向後屈曲做卸力，硬橋硬馬咁接呢個射門。最後就係呢幾個原因令到魯拿臣咁樣就撲咗個波入網。


之後比賽第59分鐘，就係阿仙奴失第三球嘅時候。呢球又係呢個 Page 講到口臭嘅輕出問題，相信有睇開我嘅講解嘅朋友可能睇呢球嘅時候都已經大約明白發生咩事同埋點解魯拿臣做得唔夠好。首先霍頓得到一個左路嘅單刀機會，而其實個波一路都未入到去離門中心14碼嘅位置，魯拿臣可能因為上一球失到無曬信心，搞到忍唔住要出迎封阻呢一球單刀。

最後魯拿臣唔單止輕出，仲選擇使用 Engage & Smother 呢招，雖然個波嘅位置確係偏側，但其實個波一啲都唔算離腳，要使用 Engage & Smother 成功撲救係非常之難。再加上霍頓射門之前魯拿臣已經做出一個半跪低嘅姿勢，等於教埋霍頓要笠過自己。而霍頓最後亦都就係一下笠射就射破咗魯拿臣，令曼城當時領先到 3:1。

雖然魯拿臣今場幾個失波當中嘅表現確係強差人意，不過 25歲對於門將黎講仲係非常後生，希望佢唔好咁易比今場嘅失誤打沉自己，加油啦魯拿臣。

另外如果對接波手法同埋單刀想有進一步嘅了解，可以參考我地嘅「門將技巧101 系列」嘅文章同片段，詳情可以睇返下面展示嘅連結。

英格蘭聯賽盃 阿仙奴 對 曼城 精華https://www.youtube.com/watch?v=o2boz3JRhuE
===============

門將技巧 101 － 技術分析

第一回 －手法與時機


第二回 － 單刀
上集
https://www.youtube.com/watch?v=t9R3MCgWUlo
下集
https://www.youtube.com/watch?v=MeqhJ28w8Hk