格連：甩手之後卡比路死都唔肯比我下場繼續踢
剛剛星期一嘅 Sky Sports Monday Night Football 節目入面，搵到前英格蘭一號門將羅拔格連 (Robert Green) 上黎用門將角度講下佢對幾件事嘅見解，包括佢當年係世界盃甩手嘅事以及對於英軍一號門將候選人碧福特以及樸比嘅分析。
----------------
「世界盃惡夢」
2010 年世界盃C組小組賽第一輪賽事，由英格蘭對住美國。當時英格蘭正選門將格連將丹普斯 (Clint Dempsey) 一球角度正中嘅射門由明明可以輕鬆以下手接實但因為甩手而甩咗入網，最後英格蘭只能同美國以 1:1 打成平手。之後英格蘭嘅第二輪賽事對住阿爾及利亞，當年嘅英格蘭領隊卡比路 (Fabio Capello) 決定派出占士 (David James) 代替格連上陣。
而 Monday Night Football 嘅主持就問到格連當時發生咩事同埋之後點處理。格連就話當年其實佢唔應該用 K 腳跪低去抱呢球，因為咁樣會令到佢兩隻手無乜調整空間，而當年個波其實彈咗一下地影響咗格連嘅預判，比著依家佢就會兩隻腳企直再伸直兩隻手去接呢球，而呢個習慣佢都用咗好耐先改變到。
之後格連就話呢場比賽直到去下場比賽公佈正選名單之前領隊卡比路係無同佢講過任何野，所以其實佢同加曆查都係同一時間知道自己並無正選。格連就去問卡比路：「我去問卡比路點解唔比我踢，卡比路就話上場呢個犯錯實在太大，好難比我繼續踢，但我其實唔覺得有咁大問題，我其實已經無再諗，係佢先覺得咁大件事，但好明顯佢最後都無理我繼續比占士踢。」然後另一位主持加曆查亦都即時幫格連講說話，指格連嘅心理質素其實非常好，因為對美國失咗呢球波之後，其實格連表現絕對唔錯，仲救咗加曆查一鑊，如果唔係頭條就係講加曆查而唔係格連。而格連之後亦都話，其實呢啲犯錯每位門將都一定有試過，只係之後要努力練波去令自己下一季內唔好再犯咁多次呢啲錯誤。
「英軍一號」
之後格連就講到碧福特同樸比技巧上嘅分別。格連認為碧福特準備射門之前有太多微細動作同小跳步令到身體平衡不停地改變，並無穩陣地企好迎接射門，加上 Set Position 同埋手嘅擺位太低同向後揮令到碧福特自己為撲救射門增加難度。不過佢嘅傳送能力確係上佳，加上碧福特嘅準備動作雖然未必做得最好，但又真係做到佢要做嘅野－撲出射門，所以佢認為修夫基揀佢做一號門將都無可厚非。
而格連認為樸比嘅優點除咗身體上有優勢之外，就係佢迎接射門前甚少做多餘嘅動作，令到佢經常可以成功借力做 Power Step 從而令到佢撲得夠闊。格連特別稱讚樸比對於一啲比較接近佢身邊嘅左右兩邊地波射門迎對做得好好，因為佢每次做 Collapsing Save 之前隻腳都會先著地先再向內收，著地一刻令到身體穩定咗先然後快速將隻腳內收，從而令佢可以借呢度力儘快拉上半身同隻手落地。不過格連認為樸比嘅腳下功夫同傳送能力始終都未及碧福特，但始終佢踢開般尼而球隊對佢確係無呢方面嘅要求，所以短時間內好難可以令佢取代碧福特嘅位置。
----------------
先唔講格連嘅內容，但絕對喜見搵多啲前門將去評論現役門將嘅表現，起碼佢地知自己講緊乜。而唔係搵一班根本唔知守門員係一回咩事嘅前球星出黎淨係識話「呢球應該要救到」「XXX 應該要做好啲」「有左手唔用做乜要用 Top Hand」呢啲廢話。
然後講返格連提及嘅野，其實佢講到唔應該用 K 腳半跪式抱波，呢個都係近期一個好熱門嘅話題。首先回歸基本步，點解要 K 腳？就係驚接唔實，如果由兩隻手臂中間穿過嘅話，起碼仲有隻腳擋住唔會痾蛋。而我相信絕大部分嘅門將同教練都係咁做，只不過近年有一派嘅教練就有一個說法，就係點解唔練好你接波嘅技巧而要驚自己會甩手？呢一派嘅教練就指如果以 K 腳半跪式抱波，咁就會好似格連話齋令到下半身完全失去靈活性，而兩隻手可以郁嘅範圍亦都好窄，相反如果兩隻腳同手伸直少少而烏低個身去抱個地波，其實兩隻手可以移動嘅範圍相對地闊，而且仲可以慳返起身嘅時間儘快反擊。呢個問題絕對值得大家反思。
至於佢講到碧福特嘅缺點就實在可圈可點，首先 Set Position 無錯對於每一位門將都總會有一個「太低」嘅定義，只不過由於每個門將嘅身體構造唔同，實在好難話只要佢烏低過某一個角度就一定係太多。而格連話碧福特對住利物浦兩個撲救雖然救到但係其實做得唔好，我覺得實在係搵野黎講。
先講對住軒達臣嘅遠射，無錯碧福特係有手臂後揮嘅動作而呢樣野之前我都有講過絕對係雙面刃，只不過呢球碧福特其實揮臂嘅時機係好準確，從而幫到佢撲到呢球遠射，所以我並唔覺得佢需要完全抹甩呢個習慣，而係要練習點樣好好利用。而另一球對住沙拿嘅單刀，格連就話碧福特嘅 Set Position 同對手放得太低，但其實個波同碧福特嘅距離已經相當近，碧福特想優先保護地波射門角度實在唔難理解。
不過佢指碧福特雖然救到呢球單刀但個身其實擰轉曬，呢樣我就相當認同，等於之前講迪基亞嘅缺點一樣，單刀封位無打開曬身體去用盡身體所有部分封窄射門角度。不過其實碧福特近幾場表現相比起受傷之前都真係算有好大進步，特別喺企位同出迎方面，似乎抖咗一抖，佢嘅生理同心理都能夠從新出發。（所以唔好再話守門員唔使抖，其實佢地又要長期集中又要周圍望又要嗌又要移步又要撲波又要出迎，無論心理定生理都好鬼攰）
而格連講關於樸比嘅分析，我大部分都同意嘅，只係有時做 Collapsing Save 其實並唔係真係咁易下下隻腳都落得切地再內收。有時反應唔切其實做完小跳步就已經要做內收去拉上半身落地做撲救，所以我仍然覺得樸比上場對阿仙奴嘅「輸近柱」波唔係佢失誤，般尼後防比奧巴美羊咁輕鬆 Cut 返埋大位仲有咁多空位射門，加上樸比其實企位正中並無偏左偏右。不過呢下樸比確係有可以做好啲嘅空間，既然 Collapsing Save 都唔夠快落地，咁即係呢下可能真係要試下伸隻右腳出黎擋走個波先夠快了。
大家睇完格連嘅分析同見解又有咩意見呢？
----------------
Rob Green opens up about his costly error against USA at the 2010 World Cup
Green questions Pickford technique (需要使用 VPN 收睇)
Green weighs up Pope's pros and cons (需要使用 VPN 收睇)