甸恩軒達臣被小習慣拖累 臨完場前失作客入球

歐霸盃32強首回合賽事，由曼聯主場對住AC米蘭。曼聯繼續因為迪基亞需要回國陪住太太而缺陣從而繼續派出甸恩軒達臣出任正選門將。曼聯本身憑住迪亞路嘅頭鎚領先1:0，而呢球當拿隆馬其實如果見到根本出迎唔切應該要立即企近底線爭取反應時間。企到咁出只會令自己處於 No Man's Land 嘅位置益咗射手，不過今次嘅重點並唔係佢，而係甸恩軒達臣 Deano。

臨完場前 90+2 分鐘，AC米蘭得到一個角球。由 Krunic 開出，落點大概喺偏近柱嘅小禁區頂。個波飛到一半， Deano 曾經諗住出迎從而企出咗兩步，不過佢好快就知道自己根本唔到位所以立即退後，呢個係一個非常好嘅決定，避免咗犯上當拿隆馬嘅錯。


可惜 Deano 退後之後，當AC米蘭嘅 Kjær 搶點成功頭鎚攻門一刻，Deano 嘅手臂後揮習慣出現了。加上佢因為後退完想憑小跳步重整身體重心，Kjær 頂中波嗰下 Deano 其實雙腳仲係凌空緊，個波飛到一半 Deano 雙腳先至著地，隻手亦都係呢下先至放返去身體前面大概腰部位置。

咁代表乜？即係 Deano 真係做好 Set Position 嘅時候其實同個波得返3碼嘅距離，而呢個頭鎚攻門嘅速度一啲都唔慢，大大減少咗 Deano 所剩餘嘅反應時間。最後 Deano 只可以儘快拉返起隻右手嘗試撲救，最後雖然撲到但都照入，就係因為佢只夠時間舉高右手但唔夠時間對準個波，從而出現一個根本拍唔準嘅情況。好多時職業守門員撲到都照入，其實並唔係坊間成日講話佢隻手臂或者手腕唔夠力，而多數都係因為事前嘅準備動作做得唔夠好，令到佢隻手根本唔能夠擺係一個正確嘅位置所導致。

咁呢下 Deano 應該可以點做？首先上半身黎講，角球攻勢加上呢個距離嘅攻門其實諗唔到點解要有手臂後揮呢個動作嘅需要。因為角球攻勢嘅頭鎚攻門多數都係高波，隻手放到咁低其實只令到救高波嘅時候使用更長時間舉高隻手，加上咁近嘅距離如果對方射得好貼角其實都無得救，手臂揮得幾大力都唔會夠時間飛得夠遠。不過既然已成習慣，要佢突然完全唔用係非常之難，所以佢只好盡量喺呢啲情況逼自己早少少後揮，又或者試下淨係遠距離射門先至後揮。而下半身，我認為 Deano 後退一刻嘅決定可以更加快同埋小跳步做得更加密同碎，從而令到佢可以喺對方攻門一刻雙腳已經著地令佢嘅身體可以更加早做好準備。而呢一樣野其實亦都好考門將閱讀球賽嘅能力，因為要睇得好清楚邊個位有對方球員而且最大機會攻門，而選擇喺佢觸球前一刻做好準備。