丹尼獲特左飛右撲 助威爾斯保住一分

歐國盃終於開鑼，A組賽事由威爾斯喺阿塞拜彊嘅巴古奧林匹克球場對住瑞士，雙方門將分別係李斯特城嘅丹尼獲特以及慕遜加柏嘅桑馬。
其實桑馬同丹尼獲特兩位今場嘅表現都非常之好，桑馬上半場救出摩亞嘅頭鎚非常精彩，而丹尼獲特呢位前利物浦門將仲接二連三救出瑞士多個射門，為威爾斯保住一分，所以今次就想簡單分析下佢今場三個精彩撲救。
首先就係上半場瑞士角球攻勢，沙基利開出一個偏低嘅波去近柱住，舒亞高難度右腳撞射。獲特本身企中間位置，立即衝前移步對返準近柱。然後獲特憑住佢嘅企位加上反應選擇以右手擋出舒亞嘅射門，睇落容易但無論喺移步嘅功夫同埋技巧嘅選擇上都係非常高水準。如果移唔切步或者夾硬落手救，就唔會好似依家咁睇落係「舒亞射埋獲特隻腳到」聽落咁輕鬆。
然後下半場出黎無耐，瑞士前鋒安保路大步推過兩個威爾斯後衛，形成半單刀狀態。丹尼獲特本身企得較出，見到安保路準備射門佢立即縮後兩步爭取反應時間。其實安保路射門一刻獲特仲未停低曬，但當個射門飛到去安保路同獲特中間，獲特已經停低曬並將重心稍微向前從而希望可以產生更大嘅反作用力撲走個波。最後獲特成功以左手將射門撲出底線，有時就係呢一兩步爭取到嘅少少反應時間令門將將個射門由撲唔得變撲得走，所以千祈唔好睇少移步對門將有幾重要。

最後一下又係瑞士角球攻勢，今次由列卡度洛迪古斯開出一個高波，落點大概為小禁區頂。相信獲特見到小禁區頂太多人爭頂，所以決定寧願回後再對準落點做準備。最後安保路頂中，雖然唔算好應好有力，不過睇得出個拋物線仍然飛緊向龍門框內，獲特首先要睇清楚個波嘅去勢，然後調整重心準備以右腳做 Power Step 跳高撲出呢個楣頂波。唔好以為個波慢就一定易救，其實有時以為快但點知慢咗嘅波，周不時都會唔小心陰到啲門將，因為佢地一早做曬對住快波嘅準備動作，點知變咗一個相對較慢嘅波，如果調整唔切隨時會翻身不成。
相信今場獲特嘅表現，都成功令到大家明白威爾斯點解即使以往大賽用開水晶宮嘅軒尼斯，今場都揀獲特做正選。似乎踢完今屆嘅歐國盃，獲特嘅身價將會上升唔少。