基柏：係時候真真正正認識我 聯賽盃事件係一個大誤會

相信一講起車路士門將基柏．阿里沙巴拿加，唔少人第一時間都只會諗起佢當年喺聯賽盃決賽拒絕換出，落曬領隊沙利面嘅事件。呢件事真係講到今時今日都仲有唔少人用「領隊」呢個花名去稱呼佢，又話沙利同隊友們之後一路都好憎同睇低基柏，但實情其實又係唔係咁呢？
基柏今次借助 The Player's Tribune 呢個平台寫咗一篇個人自白，由佢細細個講到去效力車路士嘅一切，希望今次呢篇自白可以令大家更加深入認識佢，而唔好再對佢有任何誤解。

---------------------------------

唔少人話一張相勝過千言萬語，但似乎都不一定。

5月29號，我地喺歐聯決賽擊敗曼城之後，有人幫影咗呢張相，而我相信呢張信比起千言萬語可以代表更多更多字，對我黎講可能多到可以寫本書。當時我捧起緊個獎盃，好開心咁大嗌緊，企我後面嘅隊友亦都係到慶祝緊。

呢張相表達到好多野。首先就係歐聯冠軍對我地球員黎講有幾咁重要。我地季初開頭開得唔係幾好，不過季尾就可以話係完結得超乎我地想像咁好。
第二就係顯示到我地有幾團結。教練團隊令到我地每個人都覺得自己喺球隊係重要嘅一員，所以佢非常值得大家嘅支持以及認同。呢個原因亦都解釋咗點解呢個冠軍對我黎講咁有意義，同埋點解我喺車路士有喺「家」嘅感覺。足球場上，無野開心得過同隊友分享勝利嘅喜悅。

第三就係呢張相顯示到歐聯冠軍對我個人黎講有幾重要。實在係一種開心到好難用言語解釋嘅感覺。當我捧起呢個獎盃嘅時候，我諗起好多唔同嘅時刻，有開心同唔開心嘅，但就係呢啲時刻帶到我黎今時今日呢個位置。呢啲時刻係一啲好私人嘅故事而我係從來無分享過畀任何人聽。我知道大家都可能會覺得西班牙人係好識得交際同開放，最起碼西班牙有好多地方嘅人都係咁。不過我係黎自 Ondarroa 呢個市鎮，喺北岸嘅一條漁村，喺呢度住嘅人其實好少分享佢地嘅感受。無論係好定唔好，我嘅性格亦都一直亦都同呢到嘅人一模一樣。

無論會有咩後果都好，我都想分享一下呢啲時刻畀大家知道，因為我認為依家係一個好嘅時機畀大家認識我更加多更加深。

足球員經常都係電視上出現喺眾人嘅眼中。我地經常會被人分析，稱讚同埋批評。我地好清楚每個星期都睇我地踢波嘅觀眾，佢地係非常了解我地嘅強項同弱點，不過呢方面嘅「了解」其實仍然係非常皮毛以及膚淺。
其實，我經常覺得其他人就算知道我地係邊個，但佢地其實並唔真正「認識」我地，最少我自己係咁諗。

我16歲嘅時候，我同我雙親鬧咗一場好大嘅交。

我由9歲開始就同三位朋友一齊效力畢爾包。我地喺 Ondarroa 一齊返學，每星期會有三至四日嘅下晝都會同佢地一齊搭45分鐘的士去畢爾包青年軍訓練基地所在地 Lezama 練波。

但有一日，嗰陣我仲係16歲，似乎突然自己嘅呢一日終於黎到。當時我係跟畢爾包一隊嘅守門員教練 Luis Llopis 練波，練完波之後佢叫我聽朝10點半黎練波。

我當時用一個應該係全世界感到最不解嘅小朋友咁嘅樣黎望住佢。

我話：「咩呀？我不嬲下晝練波架。」

佢就話：「我知，不過你聽日同我地一齊練波。」

我話：「你地？即係邊個呀？」

佢話：「一隊。」
我當時真係開心到震，所以我即刻衝返屋企話比我雙親知。我以為佢地會為我高興，而佢地都確係有嘅，某程度上...我意思係，佢地係買第一對龍門手套畀我嘅人。我細個嘅時候成日經過屋企附近間運動鋪頭，然後我每次都會扭計咁話：「我想要呢對手套，我想要呢對手套呀！！！」而最尾佢地都妥協咗，買咗畀我。當時佢地買嗰對其實有少少太大，不過我已經鐘意到不能自拔。佢地有問我使唔使去換過另一對細啲嘅，不過我死都話唔使，呢對得架喇。

之後我就拎住呢對大到差唔多可以遮埋手肘嘅手套去練波。

講返轉頭，咁我就同我父母講我聽日可以同一隊一齊練波嘅消息，不過佢地好擔心我嘅前途。佢地係一個非常謙虛同勤力嘅人，傳統 Ondarroa 居民嘅特質。所以佢地有一個好重要嘅問題問我：

「咁返學嗰邊點算？」

我當時真係覺得難以置信，係同一隊一齊練波呀，仲有邊個會擔心學業呀？但佢地一路都諗唔明我點解可以為咗練波而唔返學。

而當我同一隊練咗幾次波之後，佢地就真係開始同我表達不滿：「你睇下，咁樣落去唔得架。你依家先16歲，你應該要繼續讀書！」
最後佢地仲黎到練波嘅地方去問守門員教練 Luis，要求佢解釋下依家嘅狀況。Luis 當時個樣好似諗緊「呢兩位乜水呀？」咁樣，笑到我呢。咁我父母就同佢傾咗一陣，Luis 同佢地解釋球會認為我係對畢爾包嘅未來黎講好重要嘅一位球員。之後我估我嘅父母應該明白我嘅處境，明多咗少少咁啦....

幾個月之後我就同一隊一齊準備季前熱身賽。當時嘅教練係比爾沙，佢係一位天才。然後我仲可以同查維馬天尼斯，路蘭迪呢啲剛剛代表西班牙拎到世界盃嘅球員一齊練波。一開始我覺得成件事真係好夢幻，但慢慢開始我就知道我可以同佢地練波絕對唔係無原因的，球會係真係相信我嘅能力。

2013年嘅春天，當時我仲係18歲。我已經幫西班牙拎到 U19 嘅歐國盃同埋提升到畢爾包嘅 B 隊，當時我仲同緊畢爾包一隊一齊練波。

之後幾年所有野都發展得好順利，但突然間來自西乙嘅 Ponferradina 向畢爾包提出想借我過去幫手。雖然係一個好消息，不過如果接受咗呢個外借要求就代表我要離開畢爾包，而畢爾包係我嘅母會之餘仲係我由9歲開始計嘅第二個屋企。我當時覺得我未準備好離開一個咁舒適同受保護嘅地方。
我諗咗好耐，最後我都係決定接受呢個挑戰。而依家睇返，呢個決定亦都係我人生中其中一個做得最好嘅決定，因為我喺 Ponferradina 證明到畀自己同信任我嘅人睇，我係可以同球壇最好嘅一批人競技，我係夠料做一個職業足球員。

過多幾年之後喺2018年嘅暑假，收到另一個突如其來嘅消息，就係車路士希望收購我。

坦白講，我初初根本無諗太多。因為我份約入面嘅買斷金額要成八千萬歐元。而畢爾包根本無諗住同車路士進行任何談判。畢爾包以往都無為一啲重要球員例如馬天尼斯、路蘭迪同靴里拉等等做任何轉會嘅談判。當然一間好似車路士咁大嘅球會對我有興趣令我非常開心，不過我根本無諗過呢單轉會會真係發生。

過多幾日之後我嘅經理人同我講，車路士開咗一個雖然未夠八千萬歐元但都係一個好大嘅銀碼。我當時心諗「嘩！咁佢地都真係好想要我喎」。而當車路士最後出到買斷價嘅時候，我就真係要面對呢個咁重大嘅決擇。

我用咗好多日去考慮。雖然踢車路士要承受嘅係一個好大嘅責任，但一間咁大嘅球會想重金禮聘我都確實係對我能力嘅一個肯定。我可以係到好高興地話比大家聽，我最後當時能力講咗呢句：「一於去啦。」
往往人生中最難做嘅決定，就係一啲會令人成長嘅決定。

當年8月8號，我簽約成為車路士球員。

8月11號，我喺哈特斯菲為車路士第一次上陣。

所有野都發生得好快，感覺上我好似穿越咗時空黎到一個新嘅時間點咁。我當時只係僅僅透過西班牙嘅電視台認識我喺車路士嘅隊友。而我嘅英文...明顯係麻麻地。

好好彩地，車路士當時非常歡迎我，而且仲有幾位西班牙同鄉喺陣中，包括法比加斯、莫拉達、柏度、馬高斯阿朗素、艾斯比列古達等等。當時仲有剛剛由皇馬加盟球隊嘅高華錫，而佢又識得講西班牙話，所以好似多咗一個同鄉咁。

我喺車路士嘅第一季表現唔錯。我好快就適應咗英超嘅節奏，而英超絕對係一個對守門員黎講最難適應嘅一個聯賽。我地成功打入下屆嘅歐聯、對住阿仙奴贏咗歐霸盃，然後我又可以正選代表西班牙國家隊。

對我黎講，唯一就係聯賽盃決賽嘅嗰一刻令我喺車路士嘅第一季留下一個污點，一於喺呢度同大家解釋清楚。
其實所有野都係一個非常之大嘅誤會。

曼城當時喺加時完全控制緊個戰局，而且踢多幾分鐘就去到互射12碼嘅階段。我做完一次撲救之後，我感覺到隻腳有啲唔妥，所以我叫咗物理治療師出黎幫我睇睇有無事。而其實除咗我自己想檢查清楚之外，我都想借呢個機會畀我嘅隊友抖一抖氣。

突然之間我見到當時嘅教練沙利叫卡巴尼路去熱身。沙利似乎覺得我唔可以繼續落去。而我當時嘅諗法，無論係對與錯都好，其實我自己係畀隊友抖下氣順便浪費下時間。我其實根本無一啲好嚴重嘅問題會令到我踢唔到落去。

所以我嘗試去話畀佢知我其實無事，我根本無受傷。但當時我地喺有多於八萬人嘅溫布萊球場，沙利當時當然唔會明白我做緊乜。當第四裁判舉起個換人牌嘅時候，好明顯地我係應該要出場，但好對唔住地我並無咁做。

我做錯咗，我對所有喺呢件事入面嘅人道歉。包括畀我喺呢個場合影響到佢權威嘅領隊，沙利。一位非常專業嘅球員同隊友，卡巴尼路。以及我所有嘅隊友同車路士球迷，當時大家都承受咗好多野，包括所有比賽途中以及之後嘅一啲內在外在壓力。
球會內部其實並唔覺得係啲咩大件事。我同沙利之後一齊討論返件事，講返當時大家嘅睇法，好快就將所有疑慮一掃而空。下場比賽我被眨為後備，不過之後我又做返正選。我仲記得我對富咸嘅時候踢得非常之好。幾個月之後我地喺歐霸盃四強將法蘭克福踢出局，當時我喺互射12碼環節救出兩球。球會內部大家都無再提出聯賽盃決賽呢件事。

不過球會以外，基本上係完全失曬控。

聯賽盃決賽之後，我一拎起個電話就知我上曬全球嘅新聞。之後嘅三至四日都仲係咁。件事直頭大到壓都壓唔住，而好明顯地好多人見到嘅畫面就只係覺得我唔尊重沙利。

我當時覺得被所有人誤解，因為我當時嘅意圖從來都唔係想拒絕教練嘅要求。我有嘗試過話畀佢知我其實並無受傷可以繼續，我都有嘗試解釋過畀傳媒聽，但似乎都係雞同鴨講。

幸運地，依家呢件事對我黎講只係一個過咗去嘅趣聞。我同沙利嘅關係仍然非常之好。不過下一次如果遇到類似嘅情況，我知道我應該要點做。

不過呢個正正係一個好好嘅例子證明，有好多野都唔係表面睇嘅咁樣。
之後一季成個球會都非常唔順利，而我都無法避免。

而慢慢地我開始愈黎愈無信心，而且愈黎愈多犯錯。我非常理解眾人對我地嘅批評。我地喺壓力之下比賽，不過呢樣都係職業足球員要面對嘅其中一個問題。不過有時啲批評真係過曬火，你可以話我地犯錯，但如果去到用言語傷害一個人或者甚至作一啲同足球根本無關嘅大話，咁就真係不能接受。

我相信大家都認同批評係要有譜，而唔係亂咁黎講乜都得。

當你嘅屋企人同朋友見到一啲同你有關而又好可怕嘅消息，其實同時會影響緊佢地。所以間接地都絕對影響到你自己。但其實，我地只係一班想盡力打好自己份工嘅人。

種族歧視、威脅傷害屋企人、反同情戀言論等等，呢啲都係不能接受嘅內容。我地需要喺某個位置劃清界線。我地真係需要諗諗計點樣阻止社交平台上嘅網絡欺凌。

依家我喺車路士感覺非常良好，無論身理定心理上都係。我依家開心嘅原因係因為我覺得我比起兩年前我係一位更好嘅門將。當然我希望可以有更多嘅上陣機會。如果我話我依家做後備係好開心，你都唔會信。但我都尊重教練嘅決定。我明白有其他球員都一樣表現得唔錯。而球隊表現確係非常之好，無野重要得過咁。
如果我地唔係將球隊放喺第一位，我地無可能喺歐聯決賽可以贏到曼城。

我經常嘗試用任何角色去幫助球隊。我自細就畀爸爸灌輸一個概念，就係當我做緊一樣我自己鐘意嘅事，想達到目的唔單止要靠努力，仲要靠成功感。呢幾個星期我諗咗好多關於呢個概念嘅事，我諗返起每當我遇到難題嘅時候，我就集中返喺我自己做緊嘅野上面。有唔少球員其實好唔鐘意練波，但我係非常喜歡練波。教練絕對鐘意一位享受練波嘅球員，而且我亦都享受練波嘅過程。就算我無份上陣比賽，練波如果練得好，我自己感覺都會良好啲，同時會令我心境平靜啲。

我非常期待新一個球季，而我已經準備好繼續做我最鐘意做嘅事。我知道如果我每次練波都夠勤力，用任何方法支持球隊，好嘅結果自然就會降臨。我深深相信呢個因果關係。

無人知道未來會發生咩事，但今日我喺倫敦過得非常高興，而我希望黎緊可以同我嘅球隊車路士捧更多嘅盃，有更加多慶祝嘅時刻。

講到尾，我希望大家可以了解我更加，係真真正正了解我。我只係一位希望用盡所有能力去幫隊友嘅一位球員。而呢個亦都係我喺到嘅理由。
原文：
Kepa Arrizabalga - It’s Time You Get to Know Me

請多多支持守門員日常！
Thank you for your support on Goalie Daily!
Facebook: https://www.facebook.com/goalie.daily/
Instagram: https://instagram.com/goalie.daily
YouTube: https://www.youtube.com/channel/UCOkceg4wD4GdWiwsTRJ3EGw