輸近柱一定係門將負全責？解構日本反勝靚波
【 輸近柱一定係門將負全責？ 】
世界盃又一場令人驚喜嘅賽事，日本成功反勝德國 2：1，相信又令到唔少人跌曬眼鏡。權田修一初段嘅犯規引致12碼實在嚇死唔少日本隊球迷，好彩之後重拾信心屢救險球，仲成為埋呢場比賽嘅官方最佳球員。
而德國隊嘅門將紐亞 (Manuel Neuer) 其實都神救咗一下，可惜最後都係要失兩球，而第二球嘅「近柱」波令佢受到唔少批評，但其實又係咪真係可以怪曬佢呢？輸近柱又係唔係一定係門將要負全責呢？
－－－－
比賽尾段，日本隊後場獲得一個罰球，板倉滉喺右路長傳畀後備入替嘅浅野拓磨。由於德國嘅舒拿 (Niklas Sule) 包曬越位，中間嘅魯迪加 (Antonio Rudiger) 又舉曬手慢慢行以為一定係越位，最後得返舒洛達碧克 (Nico Schlotterbeck) 一個回身追住長驅直進而且第一腳控得好靚嘅浅野拓磨。
紐亞見到舒洛達碧克緊貼住浅野拓磨，以及壓緊佢落底線，加上個波又唔算離腳，所以唔出迎係非常合理嘅做法。如果紐亞夾硬衝出嚟，未必可以喺浅野拓磨起腳前停低做準備，隨時仲會同舒洛達碧克撞埋一齊。當浅野拓磨推到差唔多到小禁區角嘅範圍，舒洛達碧克仍然未搶到個波，紐亞就立即半坐低做好 Set Position。
雖然個波同紐亞距離好近，射高波嘅機會唔高，但由於角度愈推愈窄，浅野拓磨射左右兩邊嘅機會愈嚟愈低，所以紐亞做出半坐低嘅動作，上半身仍然挺直，其實都係一個非常之好嘅決定。因為既然射唔到左右就唯有射中間，如果紐亞坐得太低，上半身烏前嘅話，隨時有機會被對手簡單挑射笠過。
當浅野拓磨都起腳一刻，由於個波同紐亞得返大約三碼距離，要做反應非常之難，寧願封好位擴張身體由得佢省好過。所以紐亞立即將右邊下盤扭向前，下半身形成 K 腳姿勢防止被通大細，雙手繼續垂低掌心向外擋中腰波。
所以其實紐亞喺呢個位置上可以封到嘅位都封曬咁濟，始終咁近距離仲要咁窄角度，最大機會要面對嘅多數都係地波至中腰波。點知浅野拓磨最後就係射中紐亞封唔到嘅上路波，剛剛好喺佢左邊膊頭擦過入網。
－－－－
剛剛提到紐亞下盤扭動做 K 腳，而喺人體構造嚟講唔多唔少點都會令左邊膊頭向後，再加上咁近嘅射門，大家都係人一個，本能反應會有少少縮都好合理。咁啱球波就係擦過縮後咗嘅左邊膊頭位，有時就係咁簡單，咁啱一出一入。
雖然既成事實都無咁多如果，但從執行以及精益求精嘅角度，你話紐亞係咪完全無嘢可以再做好啲呢？會唔會把握浅野拓磨入到禁區推前一下，唔使多但走前多一步封位？又或者嘗試用多少少力令左邊膊頭唔好扭得太後？
呢球浅野拓磨射得靚就肯肯定㗎喇，而紐亞我個人認為能夠逼到浅野拓磨一定要射呢個位，衝下網頂先入都算係咁，絕對唔會怪曬或者點怪責紐亞。
如果呢球失波真係要諗係邊個位置出事，個人認為包越位嘅舒拿以及魯迪加似乎比起紐亞有更大責任，就好似當時 Now TV 評述員 謝德謙 Tse Takhim 話齋：「窄位射個衝網頂波，坦白講真係唯一可以選擇㗎啫，喺呢個窄位裡面。但要講嘅，未必數到紐亞。中間中堅魯迪加舉手佢無追，大意，喺佢背脊位走，呢個結果我覺得魯迪加有啲責任要負。」
世界盃又一場令人驚喜嘅賽事，日本成功反勝德國 2：1，相信又令到唔少人跌曬眼鏡。權田修一初段嘅犯規引致12碼實在嚇死唔少日本隊球迷，好彩之後重拾信心屢救險球，仲成為埋呢場比賽嘅官方最佳球員。
而德國隊嘅門將紐亞 (Manuel Neuer) 其實都神救咗一下，可惜最後都係要失兩球，而第二球嘅「近柱」波令佢受到唔少批評，但其實又係咪真係可以怪曬佢呢？輸近柱又係唔係一定係門將要負全責呢？
－－－－
比賽尾段，日本隊後場獲得一個罰球，板倉滉喺右路長傳畀後備入替嘅浅野拓磨。由於德國嘅舒拿 (Niklas Sule) 包曬越位，中間嘅魯迪加 (Antonio Rudiger) 又舉曬手慢慢行以為一定係越位，最後得返舒洛達碧克 (Nico Schlotterbeck) 一個回身追住長驅直進而且第一腳控得好靚嘅浅野拓磨。
紐亞見到舒洛達碧克緊貼住浅野拓磨，以及壓緊佢落底線，加上個波又唔算離腳，所以唔出迎係非常合理嘅做法。如果紐亞夾硬衝出嚟，未必可以喺浅野拓磨起腳前停低做準備，隨時仲會同舒洛達碧克撞埋一齊。當浅野拓磨推到差唔多到小禁區角嘅範圍，舒洛達碧克仍然未搶到個波，紐亞就立即半坐低做好 Set Position。
雖然個波同紐亞距離好近，射高波嘅機會唔高，但由於角度愈推愈窄，浅野拓磨射左右兩邊嘅機會愈嚟愈低，所以紐亞做出半坐低嘅動作，上半身仍然挺直，其實都係一個非常之好嘅決定。因為既然射唔到左右就唯有射中間，如果紐亞坐得太低，上半身烏前嘅話，隨時有機會被對手簡單挑射笠過。
當浅野拓磨都起腳一刻，由於個波同紐亞得返大約三碼距離，要做反應非常之難，寧願封好位擴張身體由得佢省好過。所以紐亞立即將右邊下盤扭向前，下半身形成 K 腳姿勢防止被通大細，雙手繼續垂低掌心向外擋中腰波。
所以其實紐亞喺呢個位置上可以封到嘅位都封曬咁濟，始終咁近距離仲要咁窄角度，最大機會要面對嘅多數都係地波至中腰波。點知浅野拓磨最後就係射中紐亞封唔到嘅上路波，剛剛好喺佢左邊膊頭擦過入網。
－－－－
剛剛提到紐亞下盤扭動做 K 腳，而喺人體構造嚟講唔多唔少點都會令左邊膊頭向後，再加上咁近嘅射門，大家都係人一個，本能反應會有少少縮都好合理。咁啱球波就係擦過縮後咗嘅左邊膊頭位，有時就係咁簡單，咁啱一出一入。
雖然既成事實都無咁多如果，但從執行以及精益求精嘅角度，你話紐亞係咪完全無嘢可以再做好啲呢？會唔會把握浅野拓磨入到禁區推前一下，唔使多但走前多一步封位？又或者嘗試用多少少力令左邊膊頭唔好扭得太後？
呢球浅野拓磨射得靚就肯肯定㗎喇，而紐亞我個人認為能夠逼到浅野拓磨一定要射呢個位，衝下網頂先入都算係咁，絕對唔會怪曬或者點怪責紐亞。
如果呢球失波真係要諗係邊個位置出事，個人認為包越位嘅舒拿以及魯迪加似乎比起紐亞有更大責任，就好似當時 Now TV 評述員 謝德謙 Tse Takhim 話齋：「窄位射個衝網頂波，坦白講真係唯一可以選擇㗎啫，喺呢個窄位裡面。但要講嘅，未必數到紐亞。中間中堅魯迪加舉手佢無追，大意，喺佢背脊位走，呢個結果我覺得魯迪加有啲責任要負。」