做旅行搞手，真係好辛苦

如果，係一班朋友入面做約食飯、約聚會同約踢波搞手係辛苦過做擔泥的話，咁做約旅行搞手真係擔十次屎都唔夠死。至少如果約食飯d人唔肯firm，話：「睇下到時得唔得閒先啦」其他人都真係可以開定位，邊食邊睇下佢係咪真係黎。至少約踢波d人話：「sor阿要OT遲d到」，你都可以去球場同阿叔搓兩腳或者表演下費托扭過空門而不入。
但約旅行的話，如果個frd講：「好似都有d貴，諗下先啦。」唔通你話：「好阿，係飛機到等，黎就call我啦」咁咩。而且最邪惡的是，越大班frd，成功的難道系數就越高。

首先你要過第一關的係揀地點。成班frd我都唔奢望可以去歐美動物大遷徙咁。咁，東南亞啦。
「越南點睇阿？」作為搞手的我當然要比d貢獻先。

「下？越南有咩好玩阿？日日食河粉咩」朋友A邊篤iPhone 邊說。

「咁日本囉，去關西都好似幾正。」我心諗，日本由毒撚至港女都會中意，一定無死掛。
「咁多大陸人，同宜家去唔扺阿，等yen跌下先啦。」港女B突然又會咁關心政治同財經都有。

「泰國呢？」『我唔食辣嫁！』

「新加坡？」『環球影城好細囉。』

揀個地點仲難揀過老公，講講下真係可以成班去長洲訓一晚就算。看來唯有出殺手鐧「高雄啦不如」『好啦雖然上年先去過。』

唔知點解台灣係一個萬試萬靈的地方。

好啦，有了地點你以為可以一勞永逸？少年你太年輕了，惡夢才剛剛開始。然後你要做的係買機票。有買過機票的都知，機票價格同花生價格一樣，日日都唔同好似過山車咁。如果真係太多人，分分鐘要拆幾班機添。「喂，不如等到星期二先啦，好似有fanfare阿」嗱，一等你就輸了。如果星期二fanfare無出你的目的地、突然貴左幾百，咁你得到的答案將會係：「下咁貴的，都係唔去啦！」

有時成班人咁去旅行個價唔係太貴就算啦。至少，買左機票就賊船已上，走不掉的了。買完機票，就當然到搞酒店啦。張床大唔大、地點近唔近、附近有咩食、廁所乾唔乾淨、幾錢、邊到買、邊個同邊個一間房。分分鐘仲chur過你番工寫proposal。搞左一大輪，決定到，立即上網book，「屌，咁快比人book哂」。在WhatsApp group留下這句之後，你又要由頭再叫大家揀過了。
做旅行搞手除左慘過擔屎之外，其實都係姣婆守唔到寡。到最後見到成班人係機場打卡時，真係會笑得特別燦爛。
如果喜歡我們的文，比個like我地啊呀!https://www.facebook.com/godiorey2015/