個人主義 vs 團體主義
0850：真的不應該等嗎？
「等 teammate 呀？」無端端有條友同我搭嗲。
「係呀，我哋本來報咗四人學界爭標組，唔知點解變咗報體驗組。咁我就照跑喇，但係呢班人真係......」既然佢哋見唔到我車尾燈，求其搵個人吹下水都好嘅。
「好似我咁離隊走喇。我叫小皮呀，你呢？」
「我叫 Alex。」
「我走先喇，你慢慢等喇。」「你慢慢等」呢四隻字對我嚟講真係難聽過粗口，有乜理由明明可以去爭標組試下爭冠嘅，今年居然索性跑 Hea 到核爆嘅體驗組。隨住小皮離開，我終於見到我班隊友死翻上嚟。
「明明就唔使急，唔好 Chur 我哋喇！」隊友大眼仔第一個講嘢。
我忍，最多忍埋今年，下次唔好再見。
咦？我上年好似諗過呢句嘢噶喎，點解我唔又唔做呢？
0850：被放棄後重新上路
「唔緊要嘅，我哋都會跑到上山噶喇。」作為搞手，本隊長當然要提高翻隊員士氣，再去終點完成賽事。
「不如臨走前自拍張先喇。」一齊跑到，時間慢啲又有咩所謂喎，最緊要齊心、努力。成績？都打成咁喇，唔係好重要嗟。
0902：回到熟悉的戰奏
卸下隊友的包袱，可以重新一個人上路，係件令人歡快嘅事。
例如我不斷同其他人 Say hi，佢哋都會應我，都會互相講句加油；同時，企足咁耐嘅工作人員，十足各位跑手嘅 Fans，都係要多謝佢哋嘅。
喺山上，每個跑手好似都有共通嘅語言，有可以畀我跟嘅戰奏。
就我小皮而言，I am neither the special one nor the outrageous one, I am the happy one.
********
送走咗條麻煩友之後，我哋三個跑得舒服咗，又好似跑得快咗。
聽講頭十有獎牌攞喎，不如試下衝喇。
********
我都知你哋噶喇，呢班嘢年年跑山路，過咗第一個水站之後，例牌無氣。
「唔好意思。」一班著紅色衫嘅人，叫我哋借借。我覺得我哋速度差唔多，憑咩要我俾條路你？
「讓喇。」禾狗講呢句嘅同時，拉咗我埋一邊，讓條路俾紅衫人呢組人過。後面大眼仔同牛仔都好配合。
我揈開佢隻手，再畀一個憤怒嘅眼神三人。
我實在諗唔到點解唔 reject 佢哋，雖然我都會畀少少專業精神跑埋今年，不過唔該唔該，Alex 唔該記得你下次唔好再同佢哋一隊喇。
0950：被挑機後要回應
保長隻腳有少少陣痛，但佢決定拉住拉住咁跑。全隊速度都略為下降咗。
「加油呀，唔好停呀，就到噶喇。」隔籬有個 Helper 為各人打打氣，當然包括保長，但係佢好難視加油為一件好事，因為佢抽抽哋，再加油真係好易出事。就算保長再努力向前，始終難逃頂唔順嘅命運：「俾我唞一唞先......」
唔鍾意出聲嘅高佬同On 仔，諗緊停定唔停之際，「行先喇，好快追返。」保長揈晒手想佢地行，而呢個時候，唔太掂嘅保長開始問自己問題。
「或者我係咪應該放手？應該寬恕呢？」其實要停，不但因為抽抽哋，其實同時自己都有好多嘢要兼顧：有新路線、小皮走人，點樣堅持落去......一路嘅變遷，咁跑法，保長身體當然唔掂，但心理上所受的壓力亦非一個普通人可以承受。
企翻起身，保長見個景咁靚，求其對 fo 影咗張相加個caption。
而家試下行翻起隻腳，再開始跑。
衝線後記：
接落嚟，三個小組嘅人，各自跑向終點；途中無咩大變化。
小皮跟據自己計法，佢跑到四人學界組挑戰組第2嘅時間。不過以個人賽嚟講，佢差第10位十幾分鐘。
「唔，我係咪應該努力啲呢？」小皮無特別下咩決心，佢只係提自己下次要找三個更好嘅 Group Mate，再跑一次呢一個組別，務求攞到獎。
再望望 Snapchat 見到保長張自拍同風景相，小皮打從心底笑咗出嚟 - 打從心底恥笑咗一陣。
********
保長就為自己跑到第11而沾沾自喜。
「今年排名退步咗，不過今年開頭開得咁差，有第11都算係咁喇。」保長係第一個開腔，也是最後一個開腔嘅人。
On 仔同高佬都無出聲，點解？除咗自知時間可以再做好啲，兩個都知道自己下年好大機會唔會再同保長一組喇：On 仔有其他人邀請，高佬都被邀請去一個中國集團贊助嘅比賽。
「我哋去慶功喇，食咩好呀？」保長繼續佢搞手嘅本色，帶懷著心事嘅二人去薩莉亞食餐飽。
********
心不在焉嘅Alex，無理會隊友。跑完自己一個做 Cool Down。
「嘩，我哋響呢組排第四呀。」
「下次一定可以做好啲架嗟。」
「係咪呀，哈姆大郎。」三個人成個細路仔咁係到笑。
Alex 雖然好努力唔理佢哋，但係聽到呢句，都不爭氣地笑了。Alex 雖然係頭先下定咗決心離隊，但係走唔走到，其實係要睇自己夠唔夠狠心。佢知道自己可以，但佢唔想咁樣做。
Alex 坐咗係地下，向天嘆一口氣。
(一個甚無營養且無聊嘅故仔就此完結)
封面圖片來源：Skysports
本專欄Facebook專頁：https://www.facebook.com/hammershome
Fantasy Premier League 的Classic League 序號：786407-212197