《有片睇》仔細分析般奴費南迪斯到底適唔適合曼聯

效力緊士砵亭既般奴費南迪斯(Burno Fernandes)，最近再次同曼聯繫起唔少熱話，好多傳聞話佢將會加盟曼聯。亦因為好多事件令到般奴費南迪斯加盟既可能性大大提高，例如發現疑似般奴費南迪斯既人，出現喺曼聯既專車到以及李奧費迪南喺社交平台(Twitter)上發佈Brunooooooo既字眼等等。既然球壇傳到似層層，今日小編就為大家仔細分析到底般奴費南迪斯適唔適合曼聯。
般奴費南迪斯(Burno Fernandes)
年齡：25歲 (1994年9月8號)
身高：179CM
國籍：葡萄牙
慣用腳：右腳
位置：中場中、進攻中場、右中場

喺分析費南迪斯之前，小編都帶番個頭盔先。因為小編都冇乜睇過葡超，而葡萄牙國家隊既比賽都係好小睇。所以對般奴費南迪斯既印象，都係喺網上既片段得嚟，如果大家覺得我既見解有誤，請網民們高抬貴手，見諒見諒。

先同各位介紹一下，般奴費南迪斯係一位士砵亭既攻擊球員，通常出任進攻中場，為球隊提供輸送為主。從幾段網上既片段當中，小編發現左費南迪斯既幾樣優點同缺點。

首先，由死球開始講起。般奴費南迪斯係士砵亭劊子手。十二碼、前場罰球、角球，佢都一力承擔。十二碼射既方式由普普通通助跑射波，到最近用左車路士既佐真奴式射法。而罰球既射法，般奴費南迪斯都有幾種，包括美斯式既Chok埋去，遠小小佢會用Curve既方式，亦都有近代非常普遍既急墜方法。可見佢對罰球既研究都有一手。至於角球方面，佢都係採用Curve既方法，同曼聯現時開角球既費特差唔多，如果成功加盟應該可以令兩邊角球都係內彎。

死球方面，睇落好似唔錯，不過假設費南迪斯真係去到曼聯。罰球以及十二碼又輪唔輪到佢射呢？因為事實上，曼聯陣中確實有好多罰球好手。例如普巴、華舒福、楊格、馬達甚至格連活特都唔錯，如果費南迪斯真係嚟到曼聯，佢會唔會好似當年既迪比一樣，有能力但係未輪到佢射呢？

講一講小編對費南迪斯既認識先，從一啲球皇片入面睇，其實費南迪斯同大家預期既可能有啲出入。曼聯依加最缺乏10號位球員派牌，所以好多球迷都話一定要出馬達，而補強方面大家都想球隊喺10號到補充，目的就係加強球隊既創造力。但奈何費南迪斯既踢法唔似係派牌既角色，佢既助攻次數大多數都係用角球以及一啲明刀明槍既傳球，如果球迷們想睇啲好似迪布尼、施華嗰啲劏穿既波，可能就少啲機會喇。
雖然創造力方面就唔係特別強，不過般奴費南迪斯都有一點，係曼聯依加最缺乏既野。好多球評家或者講波佬都曾經講過，曼聯喺進攻轉兩邊既速度好慢。而呢一點，確實係曼聯其中一個致命傷。好多時，曼聯做轉向既工作，都要經過兩個中場，好少做一啲長傳既工作。令到防守既一方，好容易就能夠跟隨住皮球既方向，慢慢佈防。簡單嚟講，我地用利物浦作為例子，佢地好多時會用長傳去令到進攻速度加快，例如中場既軒達臣或者閘位球員好似阿歷山大阿奴。而做到呢啲工作既曼聯球員，喺近年嚟真係愈嚟愈少，甚至可以講現時係得普巴一個做到。

對比之前既曼聯，有史高斯、卡域克、朗尼等等。依加每一場曼聯既比賽都係邊線比中場，再交比另一個中場，再去到另一條邊線。速度確實係比之前慢左好多好多。但般奴費南迪斯就有膽色同埋能力去交長傳。喺好多片段入面，都會見到佢有好多長傳，如果真係加盟曼聯既話，雖然創造力唔會高好多，但可以肯定既係多餘既傳球就會減少，速度都會快啲。
另外，般奴費南迪斯都有一個優點係曼聯好需要。就係遠射，對上兩編專欄講費特，我都曾經講過曼聯其實都幾需要遠射。而準繩方面，費特或者係皮里拉確實都唔合格，而相反地費南迪斯既遠射都唔錯。另外有一個特點就係無論左腳右腳，佢都射到波，而且力度都十足。呢位士砵亭隊長喺球隊入面，都時常出現遠射入球，某啲仲要係高飛曲墜既靚波，都幾令球迷期待。

雖然，睇落去般奴費南迪斯確實好似幾適合曼聯。但到底嚟到喺曼聯既角色又係咩呢？會唔會好似達洛治、馬達咁，冇位比佢踢呢？呢樣都幾令人擔心㗎，因為般奴費南迪斯唔係一個防守型既中場，叫佢去做搶截，等同搵馬達做冇分別，即使有心但恐怕無力。曼聯前場球員其實選擇好多，中前場普巴、馬達、馬斯亞、占士、華舒福、格連活特、高美斯、鍾泰希、連加特等等。如果陣容不變翼鋒照用的話，前場已經放左3個人。後防雲比沙加又唔會唔用㗎啦，咁後防一定4個人喇，咁姐係中場要用3個球員啦，到底可以點樣排呢？上一編專欄都講過今季既曼聯防守有幾咁差，唔通照打一個防中？真係令領隊非常頭痕。

般奴費南迪斯喺葡超踢到識飛咁，不得不承認其中一個原因就係葡超能力唔高，嚟到英超賽場，表現又會唔會好似迪比咁，名大於實呢？雖然講咁多都係言之尚早，但到底般奴費南迪斯係咪真係適合曼聯，真係要考考蘇斯克查既功力喇。
另外附送般奴費南迪斯精華片段。
https://youtu.be/wvFhq2mwKHQ