曾經貴為全球最高身價既年青球員——梳爾

勞基梳爾，係小編繼小豆之後最愛既球員，原來唔經唔覺就嚟喺曼聯迎嚟第六年。梳爾既稱號可以話係多不勝數，例如艾夫拿接班人、英格蘭未來國腳、最貴年青球員等等。毫無疑問，梳爾當年真係令好多球迷充滿期望，所以先咁多稱號，可惜傷患真係令到佢既足球生涯變得不似如期，今次小編想同大家仔細分析下梳爾呢位球員。
勞基梳爾(Luke Shaw)
年齡：24歲（1995年7月12號）
身高：185CM
國籍：英格蘭
慣用腳：左腳
位置：左閘、左翼衛、左中堅


2012 - 2014年喺修咸頓打出名堂，之後曼聯以高價收購咗佢。當年既修咸頓可以話係星光熠熠，當年既好多球員依加都幾出名㗎，例如熱刺既加沙尼加、雲耶馬、阿仙奴既張伯斯、利物浦既佳尼、路夫蘭、拉蘭拿、愛華頓既舒拉達連，仲有域奇林拔、奧斯禾度、積洛迪古斯、獲特包斯、吉田麻也等等，領隊都唔少野㗎喎，嗰個就係普捷天奴喇。梳爾可以話係嗰期入面，最早出名同最早入大球會既球員。能夠喺云云球星下，最早被大球會睇中，可想而知當年既梳爾打得幾咁好。

2014 - 2015球季，因為艾夫拿既離隊以及梳爾既能力，令佢成為咗大家眼中既艾夫拿接班人，而波衫都用番艾夫拿用開既3號，好可惜當年既梳爾都唔係打得特別好，唔知係咪因為肩負住太多呢啲稱號同寄望呢？一年之後，梳爾都由3號改著番佢之前著開既23號波衫。


以為改著咗23號波衫，將會迎嚟一個新開始，好可惜踢咗四場正選仲攞到一個入球之後，喺歐聯對燕豪芬既賽事入面，遇到一個嚴重受傷，足足抖咗288日。呢一次意外斷腳，差啲令到佢要截肢。當時唔止要接受休養一年既事實，更因為呢次傷患，需要接受心理輔導。對於一個18歲既小朋友嚟講，遇上咗一個踢得唔好既球季已經好大壓力，仲要面對斷腳既經歷，喺球場上面帶住氧氣罩離場，真係唔容易克服。



足足缺陣咗51場比賽既梳爾，喺新一季踢咗幾個月之後，十月份再一次受傷，好不容易先喺一月好番。接住，又喺同一個球季再一次大傷，又要休息百幾日。可幸地，喺受傷之後仍然得到英格蘭既徵召。以為梳爾可以有機會喺英格蘭入面盡顯自己既身價既時候，梳爾再一次面對受傷。佢喺英格蘭對西班牙既賽場當中，同卡華查炒埋一碟，個頭撞落地下嗰時，好似冇乜知覺咁，最後再一次要用擔架以及氧氣罩送佢離場。
送院之後梳爾都喺社交平台報平安，話冇乜事，好快梳爾都復出。喺冇病冇痛既情況下，梳爾終於踢到喺曼聯真真正正既第二季。但今季季初，梳爾又再次受傷，十月頭傷癒復出之後，十日之後再一次受傷。經歷過林林總總既傷患之後，梳爾到現時為止都終於算係健健康康。



雖然傷患確實擔誤咗梳爾既足球生涯，但係梳爾既生涯又點止因為傷患困擾而差，佢都曾經被摩連奴多次批評態度唔夠好，更因為咁令到好多傳媒傳出梳爾要離隊既消息。亦因為摩連奴既多次批評，令梳爾直頭話摩連奴根本就係針對佢。當時佢地兩個既關係實在唔係太好，但係梳爾繼續默默耕耘，終於愈踢愈好，摩連奴都因為佢既表現令佢公開稱讚佢既態度同埋表現。而梳爾都因為咁，開始明白摩連奴當時點解要針對佢，仲認為當時既摩連奴閙得佢好啱，接住既梳爾可以話係愈踢愈好。
雖然係愈踢愈好，但係經歷過兩次帶住氧氣罩仲要用擔架抬出場，要再踢得好放實在唔係一件易事。或者因為咁，梳爾既打法都開始變咗，以前走上走落，控咗個波敢於向前推進，到今時今日以保守為上，確實令梳爾既表現冇咁Sharp醒。加上班頓威廉斯既出現，某程度上確實係比下去。


小編仲好記得班頓威廉斯啱啱上一隊既時候，因為佢既活力同埋膽識，令好多球迷刮目相看，甚至有球迷話梳爾可以賣走。喺今季冬季既轉會市場入面，都曾經傳出過梳爾去李斯特城既新聞。不過最後梳爾都仲係留喺曼聯，最近蘇斯克查更加搵到一個更加適合佢既位置，就係左中堅。1米85既身高，加上一定既頓位、速度以及多年既英超經驗，打呢個位置確實令到佢搵到佢既第二春。雖然蘇斯克查比咗個新位置梳爾，但係當打番四後衛既時候，梳爾仍然係左閘既第一人選，證明梳爾既實力同埋領隊對佢既期望仍然好高。
但不得不承認，面對足球既發展以及對球員水平既要求，曾經係英格蘭希望既梳爾，到今時今日只不過係一個高價既左閘，進步既速度確實要更加多。小編有時會喺度諗，到底一個閘位球員，要兼備啲乜，而梳爾又差啲乜呢？

以前既閘位球員，叻一樣野就夠，防守可以叻到好似尼斯達、簡拿華路嗰啲咁叻或者可以好似卡路士進攻咁叻，但今時今日閘位球員既要求已經唔同咗好多。首先防守要夠穩，進攻又要夠狠，腳法同埋長傳都要有番咁上下水準，先算係一個好閘位球員。好似阿歷山大阿奴、羅拔臣、列卡度皮里拉、馬些路、卡華查、甘美治等等。以上既球員無論喺防守或者進攻都係非常出眾，咁先算為一等一既閘位球員。佢地喺長傳方面既技術非常好之餘，喺防守搶截都非常準確，可以話攻守兼備。


但對比番梳爾，喺防守上面都尚算合格但喺進攻方面，確實仲有差啲火喉。如果要盤球上前場或者同前場做配合，而梳爾克服到既話，梳爾係咪至少要改善下佢既長傳能力呢？喺現時呢個足球世界入面，快速轉向確實係好重要，而好多進攻好好既球隊喺呢方面都做得好有水準。好多時會利用兩閘做斜角既長傳球打穿防守，但喺曼聯入面確實未有一個閘位球員做到呢一點。如果真係克服唔到上前幫忙既梳爾，又想成為世界級既閘位球員。喺呢一方面，確實要下多啲苦功。仲有幾個月既25歲既梳爾話老唔老，話後生唔後生，如果真係能夠改善既話，絕對仲有能力，攞番個英格蘭正選位置番嚟。


最後，小編想同部分曼聯球迷講，球員總會有低潮期，亦都有好多障礙喺球員生涯上面，點樣去解決同埋改變先係最重要既一環。唔好因為一啲球員比其他球員比下去，就話賣走佢、踢走佢。只要搵到一個方法去解決，嗰位球員永遠都係一個好球員。好似梳爾咁，如果真係克服唔到壓上前既，打個左中堅一樣係個解決方法。如果真係愛曼聯，真係愛每一個球員，唔好當球員係一個安全套，反而多啲支持、多啲鼓勵。足球員都係人，都想有球迷支持，少啲負面說話，多啲正面鼓勵，先可以令球員甚至球隊東山再起。過多幾個月，幾個外借球員，即將會重返曼聯，球迷既支持對佢地真係好重要。希望大家真係支持每一位曼聯既球員。