到底英超最後會係邊隊降班——下集

先同大家講聲唔好意思，因為小編對好多球隊既認識唔夠深，資料蒐集方面又唔夠充足，所以上集某啲已受傷，確認收咧既球員都提及喺文中。上集講完最尾三隊既情況，今集同大家講下屈福特、韋斯咸同埋白禮頓既情況。

第17名：屈福特(Watford)
講到今季既屈福特，大家應該最印象深刻既一定係將利物浦既英超不敗紀錄打破，但唔知大家又記唔記得季初屈福特都有代表作嗰喎。講緊既就係喺曼城主場比曼城大炒8:0，點解想攞呢場波嚟講，其實就係因為今季屈福特有個特點，就係每當失波之後，都好難將隊波重整，然後取得入球。好多時更因為失波，急住搵方法追和，結果輸得更加多。講到陣容方面，屈福特人腳雖然唔算好，但係又未算最差，至少今季都曾經贏過曼聯、利物浦，仲要兩場都贏得好有說服力。嚟緊仲有九場英超比賽比屈福特護級，當中面對既強隊既次數都唔太多，如果能夠喺對修咸頓、諾域治、紐卡素、韋斯咸攞多啲分，再喺強隊都偷到雞，成功護級既機會都唔微。

第16名：韋斯咸(West Ham)
韋斯咸近幾季水準一直都好飄忽，英超既第一場已經喺主場比曼城血洗0:5，接住又和咗白禮頓，個頭可以話開得幾差下。雖然係咁，但接住先後贏咗屈福特、諾域治、曼聯以及賽和維拉，以為今季水準可以穩定少少。點知贏完曼聯之後，竟然接住係十場不勝既尷尬紀錄。結果韋斯咸喺季中叫番莫耶斯重返韋斯咸。莫耶斯帶領既韋斯咸第一場就即刻有好表現，主場以4:0擊敗般尼茅夫，一洗頹氣。點知話口未完，又接住七場不勝。雖然韋斯咸班波既底子，確實係唔錯。前中後既球員實力，照道理應該排喺英超中游。但近呢幾季，韋斯咸既球員，真係個個輪住受傷。一啲球員好番又打唔番水準，好似韋舒亞、蘭仙尼等等。試問咁既情況下，韋斯咸點會踢得好呢？不過好消息既就係韋斯咸新加盟既保雲有唔錯既表現，希望佢真係可以帶領韋斯咸護級成功啦。如果護級失敗，恐怕韋斯咸都會星散，話曬班球員都唔係老，實力又唔係冇⋯⋯餘下仲有九場英超賽事，當中熱刺、狼隊、車路士同曼聯叫做難打啲。但呢四隊又唔係話冇可能贏到，四隊實力都相近，水準又比較飄忽，絕對有能力偷雞贏波。另外，仲會面對住諾域治同屈福特呢啲應力冇咁高既球隊，相信打番水準既話，韋斯咸護級之路應該比起其餘五隊易。

第15名：白禮頓(Brighton and Hove Albion)
白禮頓今季表現中規中矩，冇太大既失誤同樣冇太大既突出表現。唯一最大驚喜應該係查漢巴殊，相信大家對佢都唔太陌生。雖然球員既水平以及表現都唔係特別高，但防守力確實係不能忽視。今季截止第二十九週，失波只有40球。失球數字可以媲美今季既車路士、熱刺等等。不過唯獨入球數字就略少，只有32球，餘下既賽事睇嚟白禮頓喺進攻方面都要加啲心思。另外，最近白禮頓近九場不勝令球隊面臨護級危機，而嚟緊仲有九場英超賽事，白禮頓要面對阿仙奴、李斯特城、曼聯、利物浦、曼城，如果當中一分都攞唔到既話，降班機會都幾大，希望白禮頓能夠保持佢地一貫既防守能力，能夠喺以上比賽偷到雞，咁下年就可以繼續喺英超賽場見面。


總結兩集，六隊既小小分析。小編認為諾域治、維拉同埋屈福特就最易降班。因為餘下既對手對佢地嚟講實在唔易打。當然，足球永遠都係未到完場都唔知結果既。韋斯咸同般尼茅夫今季表現咁差，話唔定佢地其中有一支球隊要降班都唔奇。不過，面對呢個嚴峻既疫情，而英國人又冇乜防疫既知識同行動，政府又坐以待斃，英超最後完唔完成到九週既比賽，都仲係言之尚早。同樣住喺英國既小編就暫時唔會番香港，始終唔想影響到其他香港人，唯有自求多福，少啲出街。最後希望大家身體健康，注意個人衛生，一齊打贏呢場仗。