《有片睇》分析一個可能適合馬斯亞既位置
曾被喻為新亨利既馬斯亞，今年年尾即將踏入25歲。25歲對一個球員嚟講，可以話係一個非常當打之時。好多球員到咗呢個年紀都已經去到好高水準，例如穩企球會正選位置甚至能夠代表國家隊，帶領球隊攞好多獎盃。但係對於當年貴為最貴既20歲以下球員馬斯亞嚟講，似乎喺能力方面仲差咗少少咁。馬斯亞曾經代表過法國出戰國家隊比賽，但好可惜加盟曼聯之後，反而令到佢代表法國國家隊既位置都冇咗。其中最重要既原因當然係法國競爭力好高以及馬斯亞表現唔夠穩定。今次小編就會淺談一下佢由加盟曼聯至今，當中既一啲轉捩點以及未來應該點用改進自己，令到佢可以更上一層樓。
馬斯亞(Anthony Jordan Martial)
年齡：24歲(1995年12月5號)
身高：181CM
國籍：法國
慣用腳：右腳
馬斯亞當年19歲喺摩納哥以6000萬歐元轉會曼聯。以冷靜、高速盤球同埋過人能力成名，當中更因為阿仙奴對摩納哥一役，佢既精彩演出，令球迷們印象深刻。以下係當年馬斯亞阿仙奴既一場比賽。對住高速既比爾連，靈活既馬斯亞當時可以話係話過就過，加上同前曼聯球員，貝碧托夫既配合，令阿仙奴後防表現得患得患失。
https://www.youtube.com/watch?v=scOCuNnw8RI
轉會過曼聯之後，第一個轉捩點當然係佢既第一場比賽，喺奧脫福主場迎戰宿戰利物浦，馬斯亞喺下半場中段後備入替馬達，85分鐘接應楊格既傳送，以高速盤球之後Cup過史基泰爾，右腳燙遠柱取得曼聯生涯既第一個入波。接住亦都因為打法以及冷靜同埋入球方式非常似同樣代表過法國既亨利，而有新亨利之稱。馬斯亞當年出眾既表現亦都令佢成為2015年歐洲金童獎得主。
2015/2016，即加盟曼聯既第一個球季，身穿9號球衣既馬斯亞就為曼聯攻入17球以及8個助球，成為曼聯陣中既神射手。好可惜因為伊巴謙莫域既加盟，上一季既表現出色既馬斯亞遇到佢喺曼聯既第一個難題，就係9號球衣由原本屬於馬斯亞佢自己變咗屬於伊巴謙莫域。及後日子，馬斯亞表現可以話係一沉不起。接住又傳出過馬斯亞喺感情方面受到困擾，令表現下游等等。2017/2018球季，曼聯既9號波衫曾經有空缺過，以為曼聯會比番馬斯亞著，點知又到盧卡古攞咗呢件9號波衫。身穿11號波衫既馬斯亞咁就著咗兩年，表現雖然隨著時間都變得穩定番少少，但已經再唔係以前表現出眾、非凡既馬斯亞。
及後仲要面對山齊士既加盟，馬斯亞可以話係失去曬信心，更不斷傳出因山齊士加盟，令到馬斯亞上陣機會減少而有離隊既可能性。喺摩連奴執教時期既馬斯亞可以話係平平無奇，表現浮浮沉沉。接住輪到蘇斯克查接任以及山齊士長期因傷患困擾，馬斯亞可以踢得番水準。及後盧卡古既離隊，令到馬斯亞重獲9號波衫。
馬斯亞今季表現雖然未到好耀眼，但係絕對係曼聯既重要人物，佢今季不單止入球數字唔差，助球次數亦都唔少。雖然係咁，但係因為其他球員受傷既關係，馬斯亞由打左翼變成打中鋒，好多球迷都對馬斯亞打中鋒表示不滿，當中最多球迷講既一定係佢做唔到最基本既一樣野，就係狽住防守球員，控穩個波等球員支援。呢一點，亳無疑問馬斯亞係做得好差。但係小編想幫佢抱不平，打中鋒本來就已經唔係馬斯亞最擅長既位置，加上身型單薄，高又唔係特別高，矮又唔係特別矮。要馬斯亞做到好似伊巴謙莫域咁，得住個防守攞定個波真係唔易，要好似查維亞靴南迪斯當年喺韋斯咸咁，靠低重心同靈活去控定個波又唔得。
其實代入馬斯亞既角色，確實係左右為難，明明踢緊翼鋒，依加臨時拉夫搵佢打中鋒，仲要比球迷咁樣話。雖然佢打中鋒確實表現係一般，有啲球迷甚至話佢成場冇腳好波。但係佢最叻既一定係，成場可以踢得好差，但係就係做到助球同入波。呢一點，確實令球迷吹佢唔脹。確實，小編玩咗Football Manager都好耐，一直都覺得前鋒踢成點，唔係最重要，最重要係取得入波、助攻，幫到球隊贏波。雖然馬斯亞喺好多比賽入面，佢都係成場冇影，攞親波都甩，但當個波喺佢腳下，佢冷靜既處理以及把握機會既能力，作為蘇斯克查既你，根本係冇辦法會收起佢。
但係小編最近有一個新諗法，認為馬斯亞都可以試下去踢。就係影子前鋒(Shadow striker)。喺小編既記憶之中，馬斯亞係一個好鐘意打短傳同隊友做配合既球員。趁現時曼聯有一個控到波既前鋒恩哈路在陣，其實馬斯亞真係可以嘗試呢一個位置，因為佢有遠射能力，又鍾意同隊友配合，把握能力又高。做一個後上既前鋒確實係唔錯，不過如果打呢個位置，可能就會令到佢出色既盤球能力有啲嘥。
另外，好多球評家都講過曼聯最缺乏走動，由其馬斯亞最為明顯。雖然係咁，但係小編覺得好多時佢唔係唔肯走，係唔識點樣走。一直打開翼鋒既佢，走動確實唔需要太多變化但當佢移到中間，確實喺跑動既需求以及變化就要變得多元化。其實馬斯亞都一直有現身或者轉身向前跑，但係從來都冇好似馬達咁，跑去後衛既身後做接應。如果肯做前者既角色，又點會唔肯做後者既角色，我認為最主要既原因都係冇呢個習慣同知識。只要蘇斯克查肯喺呢個位置落多啲苦攻，或者可以令曼聯進攻更加多元化。
如果曼聯可以繼續放馬達喺右邊，而又多一個球員喺中間做多啲走位入契，確實係可以令曼聯既進攻更加立體。咁樣般奴費南迪斯就更加可以發揮到佢既威力，同時又唔洗同華舒華、占士、鍾泰希等等既球員，爭位踢，或者呢個角色，會係雙贏既做法。