一個致命原因令曼聯近年沒有進步
自費格遜離隊後，曼聯一直與「強隊」呢個名字拉不上關係。2013 - 2014球季開始至今，曼聯喺英超內只係攞過一次英超亞軍，以及喺歐霸攞過一次冠軍。而以上兩個比較上大既比賽入面，全部都係喺摩連奴既帶領下獲得。到底係咩原因令到曼聯當時可以比較成功，而又係咩原因令到曼聯之前或之後都得唔到呢啲殊榮？
費格遜離開曼聯之後，一直有多個領隊帶領過曼聯。由千古奇冤莫耶斯、暫任領隊傑斯、方丈雲高爾、串王摩連奴，到今時今日既蘇斯克查。當中雲高爾同摩連奴都算係頂級領隊，但成就往往不及費格遜。到底錯在球員、錯在管理，還是錯在帶領方法呢？
相信三個原因都一定有，但小編認為最致命既原因一定係冇一個特定既風格比曼聯。哥帥帶領既曼城以控球高壓迫搶為主；高普帶領既利物浦以高壓逼搶以及快速反擊為主；能夠擊敗利物浦既馬體會用防守反擊完勝對手。以上三支球隊，都有一個共通點，就係有一個好明確既贏波方式。相反，今時今日既曼聯仍然冇一個十分明確既方式。
今季面對強隊時，曼聯都算有一種風格，就係以防守為主。主打防守反擊，利用前場既速度去偷雞。但當面對弱隊時，曼聯比大家既感覺就係有啲進退失據既樣子。球員好努力咁嘗試做一啲配合，貫徹蘇斯克查既進攻風格，以短傳為主，嘗試「猜散」對手或者做好多「撞牆」，球員雖然不斷嘗試，好可惜效率方面真係唔夠，始終球員能力有限。唔能夠好似曼城咁，踢到水銀瀉地般。每次面對比較弱既對手，曼聯都有一個輸波既方程式。首先球隊喺上半場一直都做唔到太多入肉既攻勢，下半場球隊嘗試多加球員壓前做配合，最後一個反擊或者一個死球攻勢就被對手攻破大門。
莫耶斯帶領既曼聯，以高空轟炸為主，九九八十一斬亦都係佢喺曼聯既成名作。但球隊入面當時頂得之人唔多，又只係簽咗爆炸頭費蘭尼作補強。要徹徹底底地貫徹莫耶斯既風格確實唔容易。加上好多球員已經進入退休時期，對於從未教過大型大隊既莫耶斯嚟講係一個好大既挑戰。最後既結果大家都應該記憶猶新，球季都未完莫耶斯已經被解僱。最近莫耶斯亦都有講過，若當年莫耶斯冇被解僱，應該會簽到巴爾、卻奧斯以及法比加斯。其實當時既曼聯除咗球員老化問題嚴重之餘，喺翼鋒以及中場既實力實在有限。而當時莫耶斯選擇借走韋費特沙夏轉用贊奴沙，中場又淨低香川真司、馬達、費查、卡域克呢啲球員。全部球員都唔係打莫耶斯嗰家波，而能力又唔高真係好難贏到波。如果當年真係簽到以上三個球員，曼聯喺進攻方法就可以變得多變同立體。
接著曼聯搵咗有名氣既教練，雲高爾上任。雲高爾上任第一個球季，立即羅致咗迪馬利亞、白蘭特、梳爾、洛荷、靴利拉以及域陀華迪斯，同時借咗法卡奧到曼聯。曼聯既表現確實有進步，由上季第七變成第四。但仍然與費格遜年代有好大既差距，始終費Sir帶既時候，曼聯係一支班霸。而喺雲高爾帶領既第一季，曼聯雖然表現有提升，但始終表現都唔算十分出眾，同時又未能夠貫徹到隊領既控球打法。加上好多經佢手簽既球員都踢唔出水準，包括迪馬利亞、白蘭特、法卡奧等等。因此喺第二季，雲高爾又簽入迪比、舒韋恩史迪加、舒拉特連、達米安、馬斯亞以及羅美路。可惜用咗好多錢簽咗好多新球員加盟既曼聯，喺表現上都冇乜太大進步，加上入波唔多令曼聯高層以及球迷都非常唔滿意，最後球隊喺 2015 - 2016 只係排第五完成球季。值得一提，2015 - 2016 球季係李斯特城奪冠之年，而第二至第五既分數，只係5分差距。重金禮聘簽咗咁多球員，加上所有強隊跌Watt，曼聯表現好應該有進步，或者起碼打到歐聯。好可惜最後只係排第五，曼聯最後只能夠搵雲高爾徒弟摩連奴接任。雖然當時既曼聯有一個非常明確既球隊風格，以控球為主。而球隊又簽入咗好多球員去貫徹球隊作風，然而球員能力以及打法同球隊風格唔一樣，令好多球員表現都只係一般甚至唔合格。
昔日教車路士既摩連奴，空降到曼聯執教，除咗引起咗好多花生之外，都令到曼聯重返風光一時。摩連奴執教曼聯之後，立即重金禮聘普巴回歸，另外又引入神鋒伊巴謙莫域、麥希達恩以及拜利等球員。摩連奴喺曼聯既第一季，雖然喺英超既賽場上未算踢得非常好，但喺歐霸賽事上面就成功衛冕冠軍，令到球隊來季重返歐聯賽場。雖然能夠攞到一個比較大既錦標，但事實上摩帥執教曼聯既第一季，表實確實一般。只係歐霸既對手比較弱，而喺四強同決賽既時候就比較有運，先能夠成功衛冕。加上球隊仍然未打得出領隊既要求，所以摩連奴第二季再添兵。其中最觸目既一定引入神鋒盧卡古代替伊巴謙莫域。以及喺後衛方面作補強，引入連迪洛夫。摩連奴喺第二季執教曼聯，算係比第一季成功得多。雖然歐聯輸比西維爾，但喺英超賽場確實令曼聯高層以及球迷非常滿意。而摩連奴亦都非常高興，因為球隊能夠貫徹領隊既風格，就係以防守反擊為主。最後該球季曼聯喺英超排第二，但分數同第一既曼城相距19分。但值得一提既係，該球季曼聯係全英超失球第二少既球隊，少曼城1球而已，喺防守方面絕對值得稱讚。
可惜，好似搵到執教曼聯方程式既摩連奴喺第三季既表現反常，雖然引入咗中場費特，但表現不似如期，加上上季滴水不漏既防守喺第三季都經常出現漏水既情況，無論喺英超以及歐聯既賽事球隊表現都不如理想。因此曼聯喺聖誕快車期就解僱咗摩連奴。而接手既就係蘇斯克查。
小編用摩連奴執教既三季同大家分享一下小編既睇法。第一季雖然成功攞到歐霸冠軍。但喺攞冠軍既路程確實唔易行，雖然喺抽籤上佔優，但事實上有幾場比賽中，係打得非常吃力，好多時都只係五五波，未能夠攞到太多優勢。其中兩大原因，第一，未摸得清整隊球隊，喺執教風格上同球員踢法唔同。第二，由費格遜到雲高爾年代，球隊實在有好多野要大執。例如邊啲球員要留隊，邊啲要賣走，邊啲要外借，球員應該點樣發展等等。曼聯經歷咗幾個混亂既球季，整隊波都亂七八糟。要解決確實唔係一時三刻既事，所以可見摩連奴喺第一個球季真係教得唔係十分好。
第二個球季，曼聯開始重回正軌。首先，執教上有一個非常明確既踢法，而球員都好易適應呢種踢法。呢一方面，要讚一讚摩連奴以及選摩連奴帶領曼聯既人。因為眾所週知摩連奴最擅長就係打防守為主，波圖、國米等等都帶領得好出色。加上摩連奴又好醒目，摸清楚球隊既有多幾底子，知道球隊喺進攻上出現好大問題，所以用防守反擊而代替雲高爾既控球打法，甚至係莫耶斯既高空轟炸。無可否認，曼聯喺費格遜後年代，入球都大不如前，無論係球員實力以及風格都有別，要繼續貫徹打進攻風格真係唔易。除非好似曼城咁，一次過大手引入多個頂級球員，然後將整隊球隊轉型。加上喺防守上改善比進攻上改善嚟得容易，所以第二季摩連奴將球隊風格改變，以少失波代替多入波。結果喺第二季，曼聯成功踢番上英超第二。
第三個球季，曼聯無論喺進攻以及防守，都進退失據。小編認為有兩個原因，第一就係好多球隊都選擇縮後同曼聯踢，摩連奴喺無辦法之下變成攻方，但因為盧卡古只係一個禁區把握既球員，幫球隊製造機會或者控個波落嚟等隊友到實在唔係佢家波。而球隊又冇一個出色既攻中球員派牌，令到進攻出現好大既問題。第二個原因就係因為好多球隊見到縮後對曼聯有效，所以好多球隊有樣學樣。因此摩連奴就喺無辦法之下，開始喺進攻方面著手。不過好可惜，摩連奴喺進攻方面本來已經唔係十分出色，加上球員實力同佢之前帶領既車路士、皇馬唔同，要立即改善球隊同埋風格實在唔易。加上喺進攻上摩連奴亦冇一個明確既踢法，好多時都係大腳向前然後靠盧卡古控穩，再諗下一步點做，而唔係一個Form，所以球隊表現下滑。
摩連奴被解僱後，隨即上任既就係蘇斯克查。蘇斯克查接任之後曼聯即刻有好表現，先喺英超連續大勝對手再喺歐聯經典反勝巴黎聖日耳門。可惜呢個強勁既走勢都唔係維持咗好耐，曼聯又漸漸打回原形。今季曼聯表現好壞參半，幾場好表現然後又幾場回落。直至季中開始，曼聯表現先漸漸變得比較穩定，好多球迷會認為最大原因係曼聯簽入般奴費南迪斯。
小編亦好同意般奴既加盟，無疑地係令球隊變得好咗好多。但係小編認為就算般奴繼續表現好，甚至愈嚟愈多好球員加盟，曼聯都會因為戰術配合，而令球隊無法重返「頂級」水平。
球隊風格現時曼聯確實係有，但同利物浦、曼城相比，根本係兩回事。呢兩隊強旅有自己既風格之餘，佢地會好清楚隊友會點樣走，每一步點樣做。兩隊波入球都有一條方程式，佢地每一次入波都係用呢條方程式入相類似既波。但曼聯偏偏就係得頭一至兩步係一樣，之後就睇球賽既變化去做應對。簡單嚟講，曼城、利物浦除咗用球員實力之餘，仲好講戰術配合。相反曼聯只係用球員能力配搭少少戰術。
最近有前曼聯球員都講過喺費Sir帶領時期，佢地一定要將皮球傳比雲佩斯，呢個就係佢任務。而傑斯亦都講過，唔洗望已經知道雲佩斯會走邊到，點樣比佢係唔洗諗等等既說話。呢兩句除咗表示傑斯同雲佩斯夾之外，仲有一個意思就係球員已經好自動化咁做咗一啲戰術上既配合。好似今時今日既曼城一樣，佢地會清楚知道隊友點走、點入契。當去到底線出波，邊幾個位置一定有人會到，佢地已經配合到望都唔洗望。
但今時今日曼聯喺呢一方面，仍然冇任何改善。呢一個唔止係蘇斯克查帶領時缺乏既野，亦都係後費格遜時代，冇一個領隊做到呢一點。好多時候，曼聯球員都係靠自己既實力去突破，而往往忽略咗戰術配合同球隊既風格。蘇斯克查雖然好刻意去將球隊風格改變，但戰術上從來幫唔到球隊。呢一個就係曼聯同其他頂級球隊既分別以及差距。
喺賽場上，所有事情都係喺電光火石之間，如果唔係戰術令球員變得自動化，而只係靠球員喺當時當刻既應對以及分析，根本就唔能夠做到穩定。有能力既球員喺一隊波入面固然重要，但更重要既其實係一隊波有Form。錫菲聯今季打得咁好既原因，就係戰術配合得非常之好。而今時今日既曼聯比錫菲聯優勝之處，只不過係有一班能力高既球員而已。如果曼聯之後仍然冇一啲戰術去令球員變得自動化，相反仍然係繼續靠球員自身既能力做應對以及分析。大敢講句，錫菲聯好快會超越曼聯。