好波不如好運，曼聯「負碌」晉級將是某些球員的噩夢？
喺文章開始之前，先同大家重覆小編係一個曼聯球迷！因為以下內容將會爆鬧蘇斯克查，所以先向所有球迷澄清，本人並非反曼，小編只係反蘇斯克查。
自從復賽後，曼聯喺八日內要踢三場比賽，今日僥倖地淘汰諾域治之後，三日後又要繼續英超比賽。賽程本來已經佈得密密麻麻，但憑住蘇斯克查精彩既輪換以及比賽中既換人安排，令小編不禁為幾位球員講聲，多X謝。喺開始鬧蘇斯克查之前，循例上都講下呢場比賽曼聯到底咩事。
今場曼聯既正選名單都有好多變動，首先門將改用羅美路、右閘改用達洛治、中堅改用拜利、中場改用費特、麥湯文尼、左右兩邊用馬達以及連加特、中鋒就用恩哈路。總共八個輪換調動，排陣如下：
恩哈路(中鋒)
連加特(左翼) 般奴費南迪斯(攻中) 馬達(右翼)
費特(防中) 麥湯文尼(防中)
梳爾(左閘) 麥佳亞(中堅) 拜利(中堅) 達洛治(右閘)
羅美路(門將)
後備：迪基亞、福素文沙、班頓威廉斯、皮里拉、馬迪、普巴、格連活特、馬斯亞、華舒福
整場比賽曼聯一直係佔優既一隊，控球權長期喺曼聯腳下，奈何一直做唔到攻勢。隊中達洛治、費特、麥湯文尼、馬達以及連加特表現嚴重地差。達洛治解圍唔拖唔水，傳中質素一般；麥湯文尼、費特兩個球員連簡單既傳球以及控球都會甩甩漏漏；連加特警覺性超低、缺乏走位、所有動作都好慢；馬達長期處於隱形狀態，以往喺防守球員背後左穿右插既打法冇咗，上半場比賽，諾域治攻勢比曼聯入肉，更差啲打開紀錄，幸好麥佳亞喺禁區將皮球省走。最終，上半場曼聯喺冇太大壓迫之下，悶和收場。
下半場初段，曼聯表現一直冇任何改變。表現差既繼續差，表現平庸既仍然帶唔起隊波。雖然曼聯有做到攻勢，但講到入肉既攻勢，幾乎搵唔到一球。比賽去到51分鐘，梳爾壓入禁區出波，馬達同對方後衛同時起腳，一方射門一方解圍，最後皮球轉展之間跌落恩哈路腳下，隨即起腳，雖然角度以及力度不是非常好，但因為起腳離龍門距離近，令告魯爾冇任何機會撲救，曼聯先拔頭籌，領先0:1。接著，諾域治亦都有一球罰球攻勢差啲令曼聯失波，可惜諾域治未能把握。呢一個攻勢已經響起入球警號，但曼聯仍然係冇太大改變。比賽去到75分鐘，諾域治年輕球員簡維喺娥眉月頂起腳遠射，皮球直飛右下角，羅美路力挽狂瀾，卻徒勞無功，1:1。88分鐘，般奴接應拜利傳送，隨即「後抽」彈比恩哈路，令恩哈路有一個半單刀機會，諾域治防守球員高路斯見情況不明，隨即喺禁區頂落手拉跌恩哈路。球證出示紅牌，將高路斯驅逐離場。失咗波既曼聯好似喺諾域治打少一個既情況下，先開始清醒，攻勢唔只多咗，亦都入肉咗好多。雖然曼聯攻勢多咗，但諾域治門將告魯爾愈打愈有，多次將曼聯既埋門沒收。可惜比賽時間去到118分鐘，曼聯再一次以運氣攻入對手。普巴放咗個波入去禁區，然後背住龍門既恩哈路再彈入禁區中間，混戰之下皮球喺麥佳亞腳下，最後成功射入，1:2。諾域治雖然有三個球員圍住麥住亞，但三個球員搵波都唔夠麥佳亞快，最後麥佳亞亦當選曼聯最佳球員，而告魯爾則是全場最佳球員。
整場比賽曼聯一直處於上風，由開賽之前直至比賽完結既嗰一刻一直冇變。論板凳深度，諾域治比下去；論球員實力，諾域治比下去；論賽前戰績或近況，諾域治比下去；論比賽表現，曼聯一直可以控制住整個球賽既發展，然而曼聯喺呢場波，竟然要打到120分鐘，仲差啲輸埋。除咗曼聯一眾球員要負責之外，蘇斯克查都要負上責任。曼聯喺呢八日內，要踢三場比賽。先係作客走落倫敦惡鬥熱刺，再重番曼市主場面對錫菲聯，三日後再次搭三個鐘車程去諾域治比賽。曼聯球員已經要喺一星期內面對兩次高強度比賽，再加上舟車勞頓，理論上已經攰死一班球員。點解今場般奴、梳爾同麥佳亞仍然要喺呢場比賽入面做正選呢？呢場比賽入面，明顯見到般奴同梳爾真係攰，表現同前一兩場大不如前，下滑得好犀利。
睇番曼聯一隊名單，其實係有足夠既球員替代佢地，但唔知點解蘇斯克查唔換埋佢地三個。到底係因為啲咩原因呢？小編真係諗唔通。可能係因為佢地三個係曼聯既重心，一定要有佢地三個肩負整隊波？如果因為咁，小編又想逐個分析一下。
首先係麥佳亞，隊中鍾斯冇任何傷患，點解連後備都冇？然後福素文沙今季好似從來未試過正選上陣，佢真係差成咁？定係拜利唔夠級數，擔心帶唔住福素文沙呢？唔清楚，或者麥佳亞真係好重要。至於梳爾呢？有一段時間，威廉斯更能夠搶走梳爾既正選位置，能力上唔差得遠喇掛？點解都係要後備上陣呢？相反右閘雲比沙卡今場就可以抖足整場。最後講到般奴，一隊名單入面有咁多中前場球員，真係唔可以比佢抖下？馬達打攻中，翼鋒交比鍾泰希、高美斯得喇掛？可惜最後兩位連後備名單都唔見。
正選要佢地三個繼續打都算，換人方面再一次令小編睇唔透。先係63分鐘，換入威廉斯、格連活特同華舒福，小編睇到佢地三個喺場邊，以為會換走梳爾、般奴啦，點知係換走馬達、達洛治同連加特。當時小編嚇一跳，然後得啖笑。整場比賽，無疑地換咗嗰三位球員，冇一個係打得好。但好老實，成隊冇一個係打得出合格既水準，除咗恩哈路之外。如果每一個都打得差，點解唔換啲下場要打正選既球員呢？眾所週知般奴對曼聯既需要性有幾大，般奴下場出賽既機會幾乎係九成。真係連少少時間都唔比佢抖下？至於威廉斯喺場邊，我以為會換走梳爾啦，點知換走達洛治都唔換梳爾。明明班頓威廉斯左右閘都打到，點解又唔比梳爾抖下，要換走達洛治呢？達洛治今場雖然都有好多失準既情況出現，但幾乎整隊都有呢個問題。相比之下，達洛治真係咁差？比賽去到75分鐘，曼聯失波之後蘇斯克查即刻要噤制換人，將費特、麥湯文尼換出，換入普巴同馬迪。小編覺得呢一次換人合情合理，因為失咗球波，唔想打十二碼，逼於無奈都要收起兩個冇狀態既防守球員。但就係因為呢一個逼於無奈，令到般奴、梳爾、麥佳亞要踢足120分鐘。
喺當刻，小編諗既係，如果今場一開始係比啲副選踢，最後六個換人名額換番佢地會唔會好啲呢？記得當初歐霸分組賽，蘇斯克查都會用鍾泰希、高美斯呢啲球員，但今場竟然連後備都冇。明明講到兩個賽事既重要性，歐霸還比足總盃重要，點解歐霸佢地有得踢而足總盃冇份呢？喺比賽去到75分鐘，失咗波之後小編真係嬲到想曼聯失多球，出局算數。點解咁講？英超方面曼聯和咗熱刺，同車路士分數上已經差一大段距離。加上蘇斯克查嗰啲所謂輪換，又唔換走啲踢得多既球員。仲想兼顧英超同足總盃，真係諗多咗。加上足總盃之後既對手都唔差，阿仙奴、錫菲聯、曼城、車路士，要攞冠軍一啲都唔易，去到四強又要一班正選既踢多場硬仗。倒不如專注英超，好好地攞番個歐聯一席位好過。
梳爾本來已經係一個易受傷既球員，過往亦都因為受傷，令狀態、表現以及身價下滑，難得今季少咗咁多傷患，點解要用到盡梳爾呢？般奴要曼聯最重要既棋子，上次對錫菲聯已經比人踢到，差啲傷埋。嗰陣時小編仲擔心緊如果佢傷咗點算，今場又要踢足120分鐘。喺比賽去到110幾分鐘，仲要見到般奴喺前場失咗波之後，狂奔去防守。呢一刻小編真係替兩位球員心痛，明明曼聯板凳深度咁足夠應付呢場比賽，竟然都要望住佢地兩個走足120分鐘。
完場後鏡頭影咗蘇斯克查幾秒，佢摸一摸皮里拉個頭，而皮里拉則黑曬口面。緊係黑曬口面啦，連呢啲細比賽佢都冇得出。小編當時除咗替皮里拉傷心之外，更加擔心三位喺青年軍踢到好好，今季首次榮升一隊既球員，加拿、鍾泰希、高美斯。
曼聯要佢地續約，係咪起碼比佢地見到自己既未來呢？喺呢場比賽入面就只有格連活特有份踢，其餘今季升上一隊既，就連後備都冇，更加唔敢諗下年有冇正選踢。小編喺到大膽咁講一句，鍾泰希續咗份新約真係一個好錯既決定，作為曼聯球迷見到呢啲事真係好心痛。亦都好明白今時今日，點解高美斯份約仲未傾好，好老實我係高美斯，就算係蘭尼表弟都同曼聯冇情講，份約傾都唔洗傾。
今屆歐洲金童獎100位被提名球員，當中曼聯既格連活特、高美斯、加拿都成功被提名。但就只有格連活特間唔中有得喺一隊上陣。我地再睇下其他英超球隊，曼城既Eric García、Phil Foden、車路士既Billy Gilmour、Callum Hudson-Odoi、阿仙奴既Bukayo Saka、Gabriel Martinelli，以上咁多位球員，就算唔可以成為球隊既正選球員，都起碼有得踢下一隊既比賽。相反曼聯嗰三位呢？都有，一隊訓練時既比賽咪有得踢囉。
你可以話阿仙奴正選唔強，所以佢地有能力打正選或者上陣。咁曼城、車路士又點計？蘇斯克查最大問題係口講一套做又一套，講就話好重視佢地，覺得佢地遲啲係曼聯既未來，但連機會都冇比過佢地。咁既處事風格，作為金童獎被提名球員，會點諗？
呢一場比賽晉級之後，除咗係梳爾、般奴既噩夢之外，亦係幾位年青球員既噩夢。有得踢既就踢到攰死，冇得踢既就等到餓死。都未講曼聯將來又話買雲達碧克、辛祖呢啲球員。小編現時對蘇斯克查都唔抱太大期望，要佢出下啲年青球員，只希望唔好整傷梳爾、般奴呢啲球員。作為一個曼聯球迷，真係唔想佢地步夏格維斯、辛迪卡蘇拿呢啲球員既後塵。