其實曼聯喺買人方面可以仿效默西賽德郡兩支大球隊

曼聯球迷成日都話要買人，買完一個又一個，球星一籮又一籮，近年來曼聯買既球星真係多到冇人有，但有邊個可以長留、有邊個可以帶領曼聯重返皇朝呢？改朝換代咗咁多季，由莫耶斯直至今日蘇斯克查，當中既球星真係數唔曬。當年非常當打既馬達、年青有為既梳爾、有腳法既迪馬利亞、世界盃打得好好既白蘭特、入球停不了既法卡奧、依加喺里昂踢到有聲有色既迪比、攞過好多大大小小獎盃既舒韋恩史迪加、曾被譽為新亨利既馬斯亞、神鋒伊巴謙莫域、重返老家既普巴、喺國米踢得一帆風順既盧卡古、智利射手山齊士。真係數極都好似仲漏咗啲球員咁。仲要未計一啲高價買入，但質素參差既球員。講親曼聯近年嘥既錢，真係講唔停。如果有一位曼迷喺2013年昏迷，今日醒番睇到過去咁多年有咁多出名既球員以及用咗咁多錢去簽人，真係唔會相信喺後費格遜年代竟然攞得幾隻盃隻。
雖然係死敵，但身為曼迷之一既小編，都真係覺得要好好仿效利物浦既買人操作。(知道㗎曬，又話小編係偽曼迷嘛)，無論大家睇完點樣話小編都好，小編都好想喺呢度比球迷反思下，到底係咪一定要高價去買球員？係咪喺球壇入面，搵唔到啲庶渣價錢，燒鵝味道既球星呢？當然，講到買人，始終係球會話事，我地呢啲球迷都係得個Up字，但係小編最近見到啲曼迷當買唔到辛祖既時候，就喺到埋怨。其實有咩好埋怨，當今球壇得佢一個識踢波咩？點解死敵經常可以喺英足壇入面搵到咁多筍盤，但近年既曼聯永遠就唔去試呢？


如果大家唔係好清楚近年利物浦喺英足壇入咗啲咩筍貨，唔緊要。今日小編就只用利物浦喺修咸頓買到既球員嚟講。2014年利物浦先後喺兩個月內，收購咗當時打得好好既域奇林拔、拉蘭拿以及路夫蘭。2015年利物浦再次喺修咸頓收購當時又係打得好出色既佳尼。2016年利物浦喺修咸頓再搵到文尼。直至2018，利物浦再喺修咸頓收購雲迪克。以上幾位球員，就只有域奇林拔係一早走咗，而拉蘭拿、路夫蘭以及佳尼都係今季先走，每一位除咗為利物浦效力得耐、有滿意既表現、曾經係球隊既正選之外，仲要係平到爆。利物浦除咗喺修咸頓搵到呢埋筍貨之外，當然唔少得既就係搵到曾經效力侯城既羅拔臣。

但我地睇番咁多季曼聯喺買人方面既操作，要不是係一啲英超高價球員，就係一啲外地聯賽既球星。今季恩哈路曾經為曼聯踢咗好幾場波，當中表現亦都非常之好。奈何蘇斯克查用用下，又係得個擺字，善忘既球迷們就好似忘記咗咩係庶渣價錢，燒鵝味道。



其實英超有好多球員能力都唔差得去邊，但偏偏球迷們就好似只留意球星。或者有啲球迷真係冇乜留意英超其他隊伍啦... 其實用番今季既修咸頓，當中都有好多好既球員㗎。好似最近前曼聯領隊就搵到靴爾保加盟熱刺。另外，除咗今季打得超好既丹尼京斯之外，仲有英超死球專家獲特包斯。球迷經常話賣走普巴，搵佢都唔錯㗎，死球準，長傳準，半個工兵，搵佢做替補分分鐘仲好過費特。另外尼敦列蒙，喺修咸頓都踢得好好，速度又快射術又唔差，左右翼都能夠勝任。喺英超打滾咁耐，威脅都仲咁大，一定唔洗擔心水肚不服或者唔夠料。講到曼聯要一個停到波既中鋒，朗治亦都唔差，高高大大，頭槌好，停到波，啱曬曼聯。


淨係求其搵隊波，都已經有幾個幾啱曼聯既球員。都仲未講阿士東維拉、韋斯咸、般尼呢啲球隊。其實喺英超入面，真係球星云云。好似近年既愛華頓，經常喺英超搵好多球員番嚟，雖然今季成績差咗啲，但實力始終有喺到。米高堅尼、施格臣、伊禾比，禾確特甚至係曾經喺水晶宮踢到識飛既傷兵保拿斯。以上通通都係喺英格蘭其他球會到執番嚟，價錢唔貴但質素有保證，其實仲好過喺其他聯賽買啲貴價球星。

今季曼聯既板凳深度有幾高，應該大家都好清楚。好多球迷都話要大執又要買球星，根本就係冇可能。貴一貴買加利殊、辛祖番嚟，倒不如平平地買幾個今季喺英超打得幾好既球員。防守搵般尼、維拉既一對中堅又得，中場執番一兩個修咸頓既球員又得，前場搵番一兩個愛華頓既球員都得。左又執幾件，右又執幾件，分分鐘仲抵過買一個辛祖番嚟。


不過講還講，小編都係唔支持曼聯一次過換咁多人既，但係講到曼聯近年來既操作，真係慘不忍睹。大家成日話要買啲貴英人，倒不如考慮下平既英足壇人好過啦。到時就算買到啲唔啱用既，起碼都冇咁蝕呀嘛。好似當年利物浦買京斯、林拔咁。小編始終都係喜歡費Sir嗰種買人操作，庶渣價錢，燒鵝味道。平平地搵番個好似小豆、華蘭西亞咁既球員，曼迷都夠曬開心。不過希望到時候既蘇斯克查肯換下人啦。

小編就舉咗好幾位球員出嚟做燒鵝例子，唔知其他球迷有又覺得有邊位英超球員有燒鵝咁既質素庶渣咁既價錢呢？