拉舒福特兩大最需要改善的問題
其實早喺六月既時候，小編已經曾經寫過拉舒福特，但係因為今季曼聯最後既一場比賽入面，拉舒福特既表現令大家彈到上天，又話佢冇得再進步，又話佢似韋碧克，又話佢只係比傳媒過份吹噓既一位球員。小編見到大家對佢既反應咁熱烈，今日就再一次講一講拉舒福特。
喺對上一篇講拉舒福特既文章入面，已經提及過拉舒福特面對最大既問題，就係Decision making，一位既好球員除咗腳法要了得之外，佢既決定亦都好重要，但要改善判斷以及決定既能力，真係唔容易。因為球員本身要有豐富既閱讀球賽能力先得，而呢一方面唔係個個球員教完就會識，因為好多時都取決於球員自身既能力。有啲球員可能喺呢方面本來就好啲，自然學得快，自然能夠靈活運用，加倍進步。但有啲球員本來喺呢方面弱，就算喺呢方面不斷鑽研、下苦功，出嚟既表現都係一般。情況就好似本來你對數學、數字、三維空間唔太敏感，你點努力都好，都好難超越一啲本來對數字好敏感既人。另一個例子，小編曾經睇過一個研究，搵咗沙維定唔知恩尼斯達做實驗。實驗就係睇下佢既視野以及分析速度等等，而佢既表現係比一般人快以及諗得仔細。以上既例子就證明有天分，喺Decision Making入面都會做得好啲。
咁到底作為球員，應該點樣去令自己既閱讀球賽能力提高呢？方法當然好多，但小編相信拉舒福特最需要既就係睇多啲波以及搵到一個伯樂。千其唔好覺得睇多啲波係廢話，好多踢波叻既球員，睇波都唔多㗎。就算有睇既習慣，都有分「用心去睇，用腦去分析」同埋「Hea睇，純粹支持」既分別。用歐霸賽事對西維爾做例子，曼聯失既第一球竟然有人話係班頓威廉斯企位有問題，但事實上身為一個閘位球員，企喺嗰度包麥佳亞，係合情合理。當然，佢走甩咗尾柱既球員，係佢既問題，但係喺企位方面，根本冇錯。而以上呢一個例子就話比大家知，好多人不論係球迷或者球員，喺睇波既時候都唔係完完全全識得分析，或者分析得正確。因此，拉舒福特要改善佢decision making既問題，首先真係要睇多啲波，而且係要認認真真去分析。
另外點解佢需要一位伯樂呢？用隔離屋曼城做例子，當初哥帥未到曼城既時候，史端寧既能力大家有目共睹，除咗喺腳法上有問題之外，佢喺決定性方面都做得好差，但隨著時日既洗禮以及哥帥既教導之後，明顯地見到佢進步得好快。雖然喺歐聯既賽事入面，佢再一次敗家，但係論近呢一兩季，佢確實係進步咗唔少。
曾經既曼聯後備殺手蘇帥，喺球員時期確實係唔差，但明顯見到佢喺教波上面，真係好差。呢一點喺小編對上N多篇文，都提及過，仲比球迷鬧過我，淨係識插個領隊，所以唔再講佢喇。但佢既能力明顯地同哥帥差幾條街，不論係戰術、用人、定係喺教導上。蘇帥已經帶領曼聯足足一整季，大家有冇見到一位球員喺佢既帶領下有明顯既進步呢？好老實，小編就唔覺喇。但調番轉睇下哥帥既球員或者係高普、林伯特既球員，明顯係進步咗唔少。所以拉舒福特要改善呢一點，一定要搵到一個伯樂，因為唔係個個球員都有能力、有天分靠自己改善decision making，所以領隊對佢嚟講，真係好重要既一環。
講完decision making之後，就要睇一睇拉舒福特既心態，呢一環亦都係非常影響佢之後既日子。有天分既球員，當今球壇多的是，但要成為世界級，除咗不斷訓練之外，心態亦都好緊要。喺對西維爾既賽事上面，佢明顯地好想為球隊付出，但因為過份想Show Off自己，令到佢愈幫愈忙。
其實喺呢一方面，除咗係拉舒福特既錯，蘇帥都要負上責任。喺上半場開始佢已經有呢種既心態同表現，但明顯地蘇斯克查從來冇作出過提醒，下半場一如既往地繼續犯同樣既錯誤。小編只係猜測領隊冇同過拉舒福特講呢一點，所以小編亦都假設一下蘇斯克查有講。咁當蘇斯克查講咗，但下半場佢仍然明知故犯，咁點解唔一早就換咗佢呢？就算真係唔換，領隊又有冇責任喺比賽期間鬧下佢呢？
小編記得曾經有位名宿講過，費Sir都試過鬧C朗，原因就正正係因為太過想Show Off自己，而罔顧球隊。其實作為一位廿歲出頭既後生仔，有呢一種心態，一啲都唔奇。就連依加既超級巨星，C朗都曾經有過。但費格遜一話之外，令到佢開始反思，令到佢開始識得顧及球隊，令到佢表現愈嚟愈成熟。
相反，小編現時見到既就只有縱容，縱容拉舒福特既呢一種心態，間接地支持拉舒福特繼續Show Off自己。喺球場上面，從來心態都大於技術、能力。然而喺心態呢一環，現時球員除咗入咗個死胡同之外，領隊亦都間接地支持緊，試問咁既時候，談甚麼進步，談甚麼世界級。
之前都曾經講過，拉舒福特最優秀既除咗係佢既能力，仲係佢既心態，因為佢有好強既抗壓能力，佢能夠肩負起整隊波，揹起射十二碼既壓力，有反勝巴黎聖日耳門既勇氣。然而亦都因為年少氣盛、血氣方剛既心態，令到佢既表現開始下游，所以除咗自己要開始變得成熟，領隊都有責任提下福仔。
球迷成日話佢已經到咗頂峰，唔能夠再進步。小編繼續對呢句就話有保留，球迷們留意番，佢只係將近23歲既小伙子，咁快就話佢唔得，咁小編又想問華迪係幾時成名？簡迪又係幾時成名呢？當一個有天分既球員，喺心態上愈嚟愈正確，只會令到佢愈嚟愈厲害。論天分，拉舒福特一定有，相信所有球迷都會認同。至於心態，又未見拉舒福特愈嚟愈差，只係有啲唔成熟姐。如果咁快就話佢唔得，咁球迷們真係好嘢，仲勁過職業既球探。
Btw，作為曼迷真係希望大家唔好再「有事鍾無艷 無事夏迎春」，都唔好再過橋抽板，不論係拉舒福特定迪基亞，都救咗好多次曼聯，都令到曼聯攞咗好多分數，唔好因為一時表現低沉，就一沉百踩。小編明白咩係愛之深責之切，但都希望大家唔好忘記佢為球隊付出咗幾多。佢地唔似巴塞，佢地喺呢場波入面，好明顯見到係好盡力，喺態度上係好專業，只係球員既一啲心態問題、球員既能力以及領隊近期既世界級換作，令球隊失落奪冠機會而已。
小編相信，當球壇再出現多幾個好教練，會喺場內照鬧，會喺完場之外繼續鬧，會喺上頒獎台前仍然鬧既領隊，而又有幸教到福仔既話，佢一定能力有更大既成就。如果大家仍然繼續支持蘇斯克查做曼聯既領隊，真係唯有希望佢能夠有改善球員既能力。如果唔係，再多既拉舒福特、格連活特，都係浪費。
睇完既話大家記得讚好小編Facebook Page，要搞起一個Page真係好難，小編都只係想同大家喺Page入面玩下Fantasy Premier League，同埋講多啲曼聯既野，因為唔想成日出一大篇文，希望大家幫幫手，Click入嚟讚一讚。