曼聯開季首戰即甩轆，問題出現喺邊一到？
曼聯終於迎來英超第一場既比賽，可惜以1:3不敵水晶宮。呢個比數引起好多球迷對領隊以及某些球員不滿，當中正義凜然既連迪洛夫以及蘇斯克查就係最多球迷不滿既兩位。同大家分享問題所在之前，先同大家簡單講講今場曼聯既問題。
曼聯今場陣容同上季勝利十一人改咗少少，因為有太多不穩定既因素喺隊中。好似係門將到底用近年嚟跌Watt既迪基亞，定係如日中天既甸軒達臣呢？傷癒復出既梳爾又夠唔夠狀態出任正選呢？新球員雲達碧克又會唔會即刻替曼聯正選上陣呢？曾染上武漢肺炎既普巴又會唔會正選呢？傳奇號碼11號既新主人美臣格連活，又會唔會因為最近既一個醜聞，而冇機會上陣呢？而最後蘇斯克查就選擇繼續相信迪基亞。搵迪基亞把關，另外梳爾、普巴都能夠上陣，相反雲比沙卡做屈居後備。而新球員雲達碧克以及格連活都係坐喺後備席先。
正選陣容
馬斯亞(中鋒)
華舒福(左翼) 般奴(攻中) 占士(右翼)
普巴(防中) 麥湯文尼(防中)
梳爾(左閘) 麥佳亞(中堅) 連迪洛夫(中堅) 福素文沙(右閘)
迪基亞(門將)
上下半場，曼聯攻勢都欠奉，幾乎所有球員都不在狀態，普通傳控都未做得好。相反對手水晶宮雖然縮後嚟踢，但反擊非常湊效。憑住韋費特沙夏以及佐敦艾耶既能力，令曼聯一對中堅不斷出醜。加上水晶宮兩翼，沙夏同唐辛表現對板，令曼聯喺前場一失波就會經常險象環生。上半場初段，先有唐辛為水晶宮打開紀錄。然後下半場71分鐘，連迪洛夫因喺禁區內犯手球，被判十二碼。佐敦艾耶主射比迪基亞救出，可惜經VAR Check之後，發現迪基亞喺艾耶起腳前，已經離開球門線，令水晶宮有多一個機會重射十二碼。而水晶宮亦都隨即選擇換人主射，最後前曼聯球員沙夏不負所望，成功替球隊擴大紀錄。6分鐘之後，曼聯一個傳中球，令水晶宮出現解圍失誤，皮球跌落曼聯新球員雲達碧克腳下，最後成功射入，為曼聯追成較接近既比數。但四分鐘之後，韋費特沙夏再一次以個人能力，擺脫連迪洛夫，隨即遠射得手，成功梅開二度。最後以1:3擊退曼聯，全取三分。
賽後曼聯球迷直指連迪洛夫嚴重失準，令曼聯痛失三分。到底整場比賽，曼聯既問題出現喺邊呢？係咪全部都關連迪洛夫事呢？而中前場完全冇威脅，又係因咩原因呢？即刻為大家逐一解答。開始之前再一次講，小編唔係一個球評家，只係同大家分享愚見，講得唔啱唔好見怪。
先由連迪洛夫講起，今場波連迪洛夫喺運氣嗰方面，真係好差，三球波都關佢事，第一球、第三球，大家或者會覺得真係佢既問題，但係第二球手球，真係完全冇運所致，嗰一球真係冇得怪佢。咁講番第一球，連迪洛夫喺包位嗰到，完全冇錯，錯就錯在唔夠硬朗，佢既踢法又唔似雲比沙卡咁會落地落鏟，唔能夠將波省走，但係去到嗰個位，其實都有少少講運氣。因為要做既野其實都做曬，反而麥佳亞同梳爾都有少少收步，好似想捉路，估對手會拗番出去十二碼點既位置，都係導致呢個失球出現既原因。
講到第三球，連迪洛夫好似就責任大啲，佢亦都係唔夠硬朗，另外因為一啲經驗既問題，令到呢球波失咗。首先，明顯地連迪洛夫喺嗰球係非常心急，好想直接截咗球波，然後做反擊。但估唔到沙夏同佢自己一齊到，變相又係講運，睇下邊個可以「困」贏。咁講好似三球都輸運？又唔係，其實連迪洛夫唔應該同沙夏去搶嗰一下，因為佢身為中堅，係球隊防線最後既一兩位，咁易標出去就只會令到球隊防守出現漏洞。其實佢只要慢一步，唔好刻意去搶，反而等沙夏攞咗先，再喺後面施加壓力比沙夏，已經足夠。呢一下明顯地係經驗未夠，以及唔夠硬淨而失。假設嗰球如果係麥佳亞或者係拜利，一早就可以輕鬆解決咗。
呢三球入波連迪洛夫當然要負責任，佢亦都係最大問題嗰一位，但係曼聯有冇做到知己知彼呢？小編就有所保留。喺呢三球入面，明顯地連迪洛夫都係輸佢最弱嗰一環，就係唔夠硬淨，呢一點其實麥佳亞同蘇斯克查都有責任。首先，水晶宮呢一班波，呢一個打法都已經唔係第一日既事，沙夏、舒立普、佐敦艾耶等等，都係一啲好衝得、好撞得既球員，如果拜利做得後備，姐係話佢其實已經足夠狀態以及冇傷患，咁點解唔搵拜利打正選呢？如果拜利係未足狀態，杜安沙比甚至跟咗好耐一隊操既文治都應該係後備，而唔係拜利啦。另外，曼聯失咗第一球，已經話咗比曼聯知，連迪洛夫輸咩，同埋對手係贏啲乜，難道唔可以將麥佳亞同連迪洛夫既角色交換？就算領隊冇講，麥佳亞係咪好應該喺場內做調動呢？身為領隊同身為隊長，兩位喺曼聯基本上最大既職球員，都唔安排，唔改善。咁佢地又有冇責任呢？
另外，明顯地蘇斯克查喺呢場比賽入面既準備都非常唔足夠，唔知大家記唔記得，小編就好印象深刻。上一季季初，曼聯又係主場又係對水晶宮，連迪洛夫都係輸「硬朗」呢一樣野比舒立普。當時既佢就係同舒立普一對一爭頭槌，最後頂輸失埋波。如果有做足功課，點會唔知呢一點，點會仲搵連迪洛夫出去同人鬥力鬥身位。仲要呢一個弱點，上季連迪洛夫已經出過好多次事，點解都冇改善呢？如果人手就係得咁多，要限米煮限飯既時候，係咪應該用戰術去隱藏連迪洛夫既缺點呢？
今場波水晶宮只係靠一招，防守反擊，根本邊一個中堅做包位，邊一個中堅做爭頂，分別唔大。只要唔好輸第一點就得，但幾乎成場波都係輸第一點，點解會冇人去作出改善既呢？呢一點除咗係連迪洛夫既責任，兩位話得事既曼聯職球員，又有冇責任呢？
講到中前場既配合以及組織，曼聯同上季一樣冇改善過。所有問題仍然存在，我寫文都寫咗十幾次，比完波跑動少、跑動人數又少、兩邊轉換超慢、勁少長傳、對手塞曬喺中路，依然要繼續打中路、兩閘完全做唔到威脅幫唔到兩翼手等等... 根本冇一點有改善過。
好多球迷會話出占士等於打少個，小編曾經都講過，佢既腳法唔好，技術唔好，但係只要閘位球員幫佢手，基本上占士既表現就會好好多。文沙同占士喺右邊幾乎又任何配合，梳爾同華舒福亦都一樣。華舒福鐘意扣大位起腳，但係梳爾冇走上去OverLap，令到華舒福有更多空位，加上佢永遠一對二既情況下，要有表現除非佢係夏薩特啦。
中場般奴落咗嚟攞波，又冇人喺攻中位幫手，上一篇文章講雲達碧克，都提及過雲達碧克最好既就係好多無球跑動以及入禁區，令到曼聯入禁區人數增加。但係蘇斯克查唔知咩原因，又唔出佢先。到到曼聯有攻勢既時候，永遠禁區頂就少咗一個人。普巴同麥湯文尼喺工作上雖然冇重疊，但係位置上面重疊，咁借問聲出兩個人喺同一個位置到，又係做乜呢？
之後輸緊一球，收起普巴換入雲達碧克，明顯地改善咗少少。但取而代之既就係冇人識轉邊，因為普巴已經走咗。搞到要用麥湯文尼做轉邊，每次轉方向都要經幾位球員先可以完成。遲問咁既轉邊速度，點樣去喺中路到撕破對手防線呢？
防守冇Form，進攻又冇Form。整個轉會市場過咗一半，都係傾右翼中堅同閘位，難道大家真係覺得中鋒唔洗？小編就覺得燃眉之急係中鋒喇，蘇斯克查冇Form，球員又唔識打中路滲入，點解唔做多啲落底傳中呢？今日場波，入嗰球正正就係傳中，而另一個具威脅既攻門，嚟自文沙既傳送，格連活既頭槌，都係靠傳中所得。如果買番個好似基奧特既球員，做啲簡單啲既踢法，咪仲好。啱啱場波，去到尾段小編覺得仲衰占莫天材九九八十一斬，完全唔知做緊乜。
蘇斯克查又要學人比教訓，雪格連活。又即刻令到隊波連小小既表現都冇埋，搞到小編想講番句：冇咁大個頭就唔好帶咁大頂帽。仲要雪得嗰半場，好似形式上做啲野比球迷睇咁。
球迷們成日都覺得因為曼聯買唔到人，而踢到成咁。或者覺得係球員冇狀態，令到隊波搞成咁。Come On，上一季到今場，一直都冇一套有說服力既打法出嚟。若然冇戰術，談甚麼勝利。小編非常認同球員冇狀態，今場波冇一個球員有足夠既狀態，但係咪冇狀態等於冇戰術呢？上場利物浦都冇狀態，一樣比大家見到咩係Form。相反曼聯呢？
難道辛祖既加盟會令到隊波有戰術可言？如果真係既話，曼城一早喺好多年前，已經好成功。錢佢地當時冇咩？點解咩獎都冇？點解去到哥迪奧拿執教，先變得愈嚟愈好？難道戰術真係小於球員能力？