令到格連活特不似預期的一季係因為...？
上季季尾格連活特既大爆發，令到唔少球迷對格連活特既將來充滿信心並寄予厚望，可惜今季格連活特進步速度以及表現不似預期，令到曼聯球迷對佢信心都有下滑，格連活特既將來會係點呢，相信依加都係一個問號，會係好似以前曼聯既青訓咁，愈踢愈搶眼、愈踢愈好定係愈打愈沉，只係曇花一現呢？
格連活特(Mason Greenwood)
年齡：19歲 (2001年10月1日)
身高：181CM
國家：英格蘭
慣用腳：左右腳
位置：中鋒、翼鋒
喺講今季格連活特既表現之前，先講一講上季佢亮麗既數據。上一季佢喺英超出賽31場，一共1311分鐘，攻入十球以及一個助攻，而喺歐霸賽事亦都有5球進帳以及2個助攻，上一季季初至季中既表現都唔係十分出眾，但喺季尾經過咗一個Lockdown之後，曼聯以及格連活特既表現就突飛猛進，當時上陣九場，攻入5球以及1個助攻，而當時佢只係踢咗666分鐘，可見佢喺嗰段時間有幾勁。可惜今季喺英超至今上陣23場，一共1296分鐘，但只有1個入波以及1個助攻。比較番上一季既英超數據，至今格連活特只係少踢咗15分鐘，姐係話出場時間幾乎冇變，但貢獻卻差天共地。可能有球迷會話佢今季唔夠運，因為上一場有兩球中柱，但睇番數據，原來都今季都只係得兩次中柱，假設嗰兩球計佢入波，佢今季既入球數字都唔合格。
撇除入波唔講，我地再仔細啲分析埋其他數據。今季格連活特喺英超入面，錄得4次Big Chances Missed，而上一季只係得2次。而另一個重要數據就係射門命中率，今季佢射咗40腳就只有10腳中龍，命中率只有25%，上一季射咗39腳，就已經有20腳中龍，命中率51%，可見佢今季射門中龍既命中率有明顯下降既跡象，足足低咗25%。我地再幾個球員去比較一下格連活特。首先係現時英超射手榜第一既沙拿，因為佢都係出任右翼一職，喺打法以及位置上都係差唔多，所以呢個比較都算合理，而佢今季既命中率都有44%。再用今季令人大開眼界既班福特以及卡華特利雲去比較，佢地命中率亦都有42%，最後搵埋孫興敏既數據去比較，佢都有51%既射門命中率。
以上四位球員，當中有兩個係打翼鋒既位置，同格連活特打既位置一樣，佢地都有超過40%既中龍命中率。而另外兩個今季如日中天既射手，卡華特利雲以及班福特都係超過40%。可見身為一個射手或者係球隊既得分球員，命中率絕對唔可以低到好似今季咁，只有25%。咁到底咁失望既表現，係啲乜野原因導致呢？
唔知各位球迷睇唔睇到，其實格連活特喺今季既踢法同上季係唔同。今季我地見到格連活特好多時起腳既時候，佢都係喺一個非常大壓力既環境下起腳，或者係喺一啲根本冇乜機會既地方起腳。我地再用上一季既數據去比較一下，上一季佢喺傳中方面，就只有10次，而Big Chances Created亦都只係得一個，但今季已經有21次既傳中以及3個Big Chances Created。由此可見，今季格連活特或者係蘇斯克查其實係著重佢喺傳中方面既次數，希望佢可以為隊友帶嚟多啲機會。但可惜隊友唔給力，令到格連活特只係錄得1個助攻。另外佢喺射門既意欲亦都冇因為要多創造機會而減小，可惜因為有好機會佢都選擇咗交比隊友，相反機會唔大先走去起腳，令到今季既射門命中率低咗咁多。
咁到底格連活特係應該著重喺助攻定係入波為主呢，相信大家都清楚應該後著為重要。因為見到今季曼聯喺入球上面，確實唔多，而佢喺傳中既質素亦唔係十分出色。如果仲係要佢喺呢一方面做落去，只會令到佢既進步愈嚟愈少，甚至停滯不前，不進則退，最後長江後浪推前浪。
其實佢今季喺進攻方面，都試過唔同既角色，右翼當然經常出任，而中鋒既位置佢都踢過，但明顯地當佢飾演中鋒既時候，顯得進退失據，患得患失。出任中鋒既時候，好似唔知幾時出嚟現身攞波，現咗身又做唔到一個支點既角色，控唔穩個波回唔到比隊友。幾次踢中鋒都有災難式既演出，可見佢絕對唔係中鋒既材料。而相反佢喺翼鋒既位置，踢落下就即刻唔同曬，始終呢一個位置先係佢既擅長既位置。雖然佢兩隻腳都好靈活，冇一隻腳係會差啲，但係佢既踢法其實比較單一化，點解咁講？我地見到今季佢好多次可以成功落到底線，但係喺出波既質素都係比較參差。所以作為防守球員，佢地都係專注封佢既大位就已經足夠。
喺呢啲情況下，格連活特當然係要強化佢喺傳中方面既能力，但係閘位球員其實都有唔少既責任。格連活特既能力，喺上一季季尾已經證明過比大家睇。所以喺之後既日子，好多時對方面對格連活特，都會選擇一個埋去對位，另一個就逗住，當格連活特一擺脫第一個防守球員，第二個防守球員就立即出嚟幫忙做破壞。格連活特依加好多時都係面對緊兩個防守球員，經常喺呢一個困局入面，而隊友又做唔到太多幫手既工作，間接令到格連活特既威脅減低咗好多。
我地再一次用沙拿同格連活特去比較，沙拿同格連活特都係一樣，喜歡推去大位起腳，但點解威脅會大咁多呢？重點就係在於沙拿背後有阿歷山大阿諾去幫佢，阿諾每一次都會走到落底幫佢拉開對手，令到沙拿壓力減低，而另一邊沙迪奧文尼同羅拔臣都係有異曲同工之妙。相反格連活特背後既雲比沙卡喺幫忙既角色上面，發揮唔好，亦都冇經常落到去一個好深既位置，拉唔開對方既防守球員，最多都只係同格連活特重疊位置。喺呢個情況底下，表面上好似2打2，但事實上係格連活特以一敵二，因此沙拿同格連活特既竄擾力就有好大既分野。
雲比沙卡睇落去好似防守好出眾，進攻都幫到少少，但事實上喺進攻方面根本冇乜幫到忙，只係多咗個人企喺到，駁下腳咁解，亦因此點解佢會落選英格蘭大國腳。其實講到要幫到格連活特既球員，不妨可以諗下達洛治，最近都有報道指AC米蘭唔會收購達洛治，即借用完結後會重返曼聯。假設佢真係重返曼聯，其實達洛治就係最似利物浦既阿諾，因為不論佢既腳法以及傳中能力都係優勝過雲比沙卡好多。
今季既踢法以及隊友既唔給力，令到格連活特既表現不似預期。到底格連活特喺將來會係點，真係好睇蘇斯克查既安排，如果唔係佢只會得番幾個結局。第一，可能佢需要轉會，搵一個適合佢踢法既球隊，不論係閘位球員以及戰術都要好似利物浦或者係曼城咁，容許到翼鋒推到大位之餘，閘位球員亦都幫要到佢。第二，就係愈踢愈沉，之後就變咗曾經如日中天，今日只係一個普普通通既翼鋒球員。其實喺近代我地見到好多球員都有呢個情況出現，因為現時球壇既發展，真係愈嚟愈快以及愈嚟愈成熟，好多球員喺好細個既時候已經有好完善既訓練，加上小小天賦，好容易就成為明日之星，令到好多初出茅廬既球員，喺唔進步既情況下就有其他球員取替佢既位置，之後再唯有轉戰其他球會或者聯賽，再踢唔番上去就會變成近代既前多蒙特球員，馬里奧葛斯、前皇馬既伊拿拉文迪、前巴塞既阿費利等等愈打愈沉...
上幾段曾經講過格連活打中鋒既結果，就係踢得一塌糊塗、患得患失，已經證明咗佢絕對唔係中鋒既材料，而曼聯翼鋒又有好多好高潛質既球員，例如阿密迪亞奴、柏利迪斯，加上一堆老臣子，好似拉舒福特、馬斯亞，格連活特既將來，都唔係唔洗愁㗎，希望蘇斯克查呢為曾經既禁區之狐可以造就格連活特成為新一代既禁區殺手，而唔係變成下一個馬里奧葛斯。