又要扑多次鎚仔（賽前預測陣容-曼聯對韋斯咸）

曼聯上場聯賽驚途駭浪下，賽事末段憑後備入替既連加特遠射建功，再憑迪基亞係補時階段救出盧保既12碼，以二比一反勝韋斯咸。過左幾日既聯賽盃又到，對手又係韋斯咸，但今次就番主場出戰，睇下今場又可唔可以再贏波晉級。

相信蘇B都見識到人地中路防守既嚴密程度，今場應該唔會再諗住先入佢中路啦掛，最好就擺番兩隻翼，利用個人突破力同邊路既小組配合令對方需要加重人手在邊路佈防，再快速轉向攻擊中路先係上策。因賽程頻密，聯賽盃亦都需要作有限度輪換。甸軒達臣受武肺影響，應該都未能上陣，所以迪基亞會繼續正選上陣，把守最後一關。 左閘泰利斯仍有傷，梳爾頂硬上。中堅華拉尼可以抖抖，會起用拜利或者連迪路夫。對面安東尼奧應能復出，個人希望用拜利去應付，但相信蘇B都係繼續用冰人拍住麥隊長。右閘可以用下大佬達洛特，等佢踢下備戰歐聯賽事。上場強攻中路失敗，預計會改用番兩隻有速度既翼鋒，左翼連皇右翼辛祖會係上策。普巴或會抖抖，上場雲迪碧克對年青人踢得中規中矩，可以試下用佢拍麥湯文尼。費特呢兩場都慌失失奇兵咁，抖抖冷靜下先。攻擊中場般奴繼續指揮進攻，而C朗已連續踢左幾場，卡雲尼或會代替佢出任前鋒，等C朗稍稍休息。
預測曼聯正選陣容
迪基亞
達洛特 連迪路夫 麥佳亞 梳爾
辛祖 雲迪碧克 麥湯文尼 連加特
般奴費南迪斯
卡雲尼