蘇B考牌最後一戰 - 曼市打吡（賽前陣容預測-曼聯對曼城）

周中既歐聯賽事，曼聯作客阿特蘭大苦戰下，僅靠C朗完場前入波逼和對手；曼城則以四比一輕輕鬆鬆擊敗布魯日，係死亡之組暫時排榜首。講近況，曼聯就有少少回勇；曼城除左上場輸左俾水晶宮，再上場聯賽盃打和韋斯咸，其他賽事都贏波而回，近況狀態不俗。今場亦係蘇B考牌最後一戰，再次輸鑊甘既就好大機會人頭落地，又要睇下佢點安排陣容部署啦。

我預測就算曼聯主場出戰，蘇B都唔會揀對攻，特別係華拉尼同連迪路夫既受傷，相信會同對熱刺場波一樣 - 先守再搏偷雞。預測會繼續排出5-3-2陣式。龍門繼續係迪基亞。華拉尼同連迪路夫既受傷，蘇B應會改用拜利、麥佳亞、梳爾踢三中堅。拜利上場出色既表現唔駛擔心，最擔心就係麥隊長既發揮。左右翼衛會係雲比沙加同泰利斯。講防守，泰利斯同達洛特都係五十步笑百步，都係放題居多，但左路順棍就會先起用泰利斯。最後都應會睇狀態而二選一。三個中場會係麥湯文尼、費特同般奴費南迪斯，防守時形成平排三中場，進攻時留麥費係中路串連，推番般奴上一格支援前線。前線會再見到「721」組合 - C朗拿度拍卡雲尼。理論上一老一少會比較好，但福仔始終唔係踢開中鋒，位置感麻麻，亦唔擅長孭住人踢波。或者可以試下用綠木，睇下有咩火花。
預測曼聯正選陣容
迪基亞
雲比沙加 拜利 麥佳亞 梳爾 泰利斯
麥湯文尼 費特
般奴費南迪斯
C朗拿度 卡雲尼