真係暫代領隊卡域克最後的戰役（賽前陣容預測-曼聯對阿仙奴）

上場曼聯作客史丹福橋球場一比一逼和車路士，除左取得寶貴既一分，呢場比賽亦大大加強左球員既信心。卡域克兩場領軍取得一勝一和成績，兩場都因應戰術需要，果斷試過收起般奴費南迪斯與及大師兄C朗拿度。另一角度睇，因佢早知球會正物色新領隊，佢係毫無包伏下可以盡情展現佢自己既帶隊風格。因蘭歷克已經官宣左會做半季領隊，現因申請工作證需時，呢場仍未能以領隊身份帶領曼聯，所以呢場仍然由卡域克領軍，期望佢係最後一場領軍下能帶領曼聯贏多一仗。

今場面對復甦緊既阿仙奴都絕不易踢，佢地近五場聯賽賽事只係輸過俾級數俾佢高既利物浦，其餘4場係全部贏晒，不經不覺由榜尾升到上頭5，因得失球較差先落後鎚仔幫一位。雖然分數上同榜首就唔係差得遠，但要爭冠軍就有難度，以保四為目標會較實際，畢竟前列三頭馬車既質素同陣容深度都不是阿仙奴可以媲美。達叔都慣常用4-4-1-1陣式，又睇下卡域克會唔會改變陣式去克制對方。
曼聯今場番到主場作賽，相信都會以贏波為目標。現時有18分排喺第八位，距離第四位置有5分差距，呢場6分波不容有失。我預測卡域克會改用4-3-3陣式出擊。龍門繼續係迪基亞。上場麥佳亞停賽就起用連迪路夫拍拜利，表現非常稱職下守和車路士。麥隊長坐完波監出黎，我估佢會正選上陣，拍住連迪路夫鎮守中路。雲比沙加同泰利斯繼續出任二閘。逗後防中會係麥湯文尼，前面一對左右中場係雲迪碧克同般奴費南迪斯，期待兩個可以產生到化學作用。左右翼會係福仔同辛祖，繼續支援前鋒C朗拿度。

預測曼聯正選陣容
迪基亞
雲比沙加 連迪路夫 麥佳亞 泰利斯
般奴費南迪斯 麥湯文尼 雲迪碧克
辛祖 C朗拿度 華舒福