兩雄相遇，以和為貴？（賽前分析-曼聯對阿仙奴）

曼聯近期狀態火熱，狹住三連勝氣勢係主場挑戰阿仙奴。賽前落後6分，排係第5位。經過頭兩場嚇親人既賽果，坦克對利物浦賽前既自發跑步操，激發整隊球員既鬥志士氣，再果斷地將麥佳亞同C朗先列後備，成功連贏利物浦、修咸頓同李斯特城，由榜下游上番黎頭半版。球會再課水重金買左防中卡斯美路同坦克契仔翼鋒安東尼，加強隊中長期缺乏既防中同右翼位置，此舉成功激活左麥湯文尼，而辛祖同華舒福表現亦有所改善。值得一讚係坦克唔會固執自己理念，先放棄4–3-3改踢4-2-3-1，再係陣式下加入自己既進攻同防守理念，令球員表現大躍進。今場面對強隊阿仙奴，隊中只有馬斯亞算係正選而又受傷，係時候考下坦克牌啦。預計佢都係會沿用近呢三場踢法，減少後場組織，多放長傳俾前線哨，有機會先係前場進行逼搶，前場改以高位遮線令阿仙奴冇咁輕易係後場組織。龍門繼續迪基亞。防線維持不變，左右二閘係馬拿斯亞同達洛特，華拉尼拍馬天尼斯出任中堅。卡斯美路今場應該會正選拍住艾歷臣踢平排中場。左右翼係辛祖同伊蘭加聯同攻擊中場般奴費南迪斯支援華舒福攻堅。
預測曼聯正選陣容
迪基亞
達洛特 華拉尼 馬天尼斯 馬拿斯亞
卡斯美路 艾歷臣
伊蘭加 般奴費南迪斯 辛祖
華舒福

阿仙奴狀態相當火熱，開季五場全勝，入13球失4球。不過呢五場波既對手係中下游為主，考驗未算話真係好大。但前一場對富咸下半場先落後下反勝對手，呢場波就真係見到整隊球員踢逆境波既能力同心理質素。特別係中堅加比爾既來回地獄又折返人間，呢場反勝得到既不只係勝利，而係所有年青球員得到既信心同對自己既肯定。今季新加盟既耶蘇仔完美融入、薛真高既加盟改變整隊進攻防守體系、沙利巴結束外借生涯穩固防線，絕對係今季阿仙奴表現好既重要因素。不過，係呢場大戰前夕，球隊傷兵突然湧現。奧迪哥特、柏迪、薛真高、藍斯度、艾利尼同尼爾遜都應該因傷缺陣，大大影響阿迪達既排兵佈陣。作客奧脫福球場會唔會選擇排出一個較保守既陣容？個人相信未必會，缺少藍斯度影響甚大，加上防守中場位置剩番沙加一個，靠守未必有本錢。達叔有機會選擇以攻代守，貫切自己既進攻理念。門將被迫起用馬菲端拿，防線維持不變，賓韋治同泰安尼踢二閘，中堅沙列巴拍加比爾。一對防中起用沙加同盧干卡。左右翼用馬天利尼同薩卡聯同攻擊中場史密夫路支援耶蘇仔攻堅。
預測阿仙奴正選陣容
馬菲端拿
賓韋治 沙列巴 加比爾 泰安尼
盧干加 沙加
薩卡 史密夫路 馬天利尼
耶蘇