曼聯終於威番場（賽後分析-曼聯對維拉）
《正選陣容大改動》
曼聯經歷左四場輸波兼一球不入情況下，坦克終於係呢場波選擇大幅改變正選陣容。龍門冇變動。防線因梳爾又有小問題出唔到，左閘起用達洛治；而華拉尼則病好可以復出，取代小將甘華拿拍伊雲斯；右閘出番雲比沙卡。中場方面，收起左運財童子麥湯文尼，將般奴費南迪斯同艾歷臣踢一對八號位，小將明奴繼續踢逗後防中。前場方面，華舒福復任正選踢左翼，唔需要再遷就加拿祖踢右翼；右翼則試下俾加拿祖踢，支援前鋒凱倫爭取入球。
《死球問題從未改善》今場頭三十分鐘，曼聯既表現係比維拉差。一如既往既死球問題係今場再次浮現，仲要一輸就輸兩個死球。先唔講安拿拿係咪真係唔能夠出迎打手鎚，麥堅處理罰球既線路落點力水都係靚既，而維拉亦有隊員係個波既線路跟進，相信都會影響到安拿拿既判斷。角球尾柱走甩人亦唔係今場先發生，只係維拉又把握到曼聯區域聯防既問題。呢個問題相信要交俾防守死球既教練解決。
《幾樣野令隊波可以反勝》
不過，球隊最後能夠反勝亦有幾樣野值得讚賞。
［第一：鬥志、拼勁同紀律性］
隊波頭三十分鐘確實係唔多入到局，搶到控球後，無論交波還是盤扭都經常失，要輸到二比零後先醒。落後兩球下，整隊都冇被比數影響信心，鬥志同拼勁都見到有。最重要係戰術執行既紀律性，冇話因為輸緊就亂咁踢，繼續踢領隊既部署。係上半場尾十五分鐘，已經見到曼聯係有條件入波，只係仲未入到。
［第二：戰術上係有針對維拉既攻守］
先講進攻，曼聯後場build-up時，達洛治會內收入黎中路同明奴踢平排防中。小弟認為此舉係想保護明奴，如果後場組織失誤，中路多一個機動力較強同對抗性好少少既防守型球員，等明奴可以放膽去用波。當個波順利去到中場，達洛治既自由度較大，可以前插入half-space幫手進攻，留明奴一個係中場串連。另外，艾歷臣出場以為佢會沿用上年踢法，墮後到左閘位置幫手做波，但今場坦克要佢盡量留守前場，如達洛治前插，佢先墮後係中場控制節奏。目的係要前場有五個球員去牽制對方四後衛。要知道維拉今季賴以成功就係佢地既越位戰術，但越位戰術既危險性就係防線推得好高，但前場施壓不足令對方可以輕易放長傳扔身後跑。今場曼聯前場五個都係不停搵機會去跑對方中堅同閘位或者中堅同中堅既身後空間，連福仔都唔係好多時會係邊路等波上腳。缺少左明斯同卡殊既維拉，高位防線要回追福仔凱倫同加拿祖就明顯好吃力，正正亦係坦克針對既地方。
防守方面，曼聯今場極具紀律性。4-1-4-1企位，用凱倫作壓迫一對中堅連門將既啟動點。般奴同艾歷臣死追雷斯同丹當卡，兩翼招呼對方兩閘。人釘人下，維拉中堅只能揀直線傳俾墮後現身既屈堅斯，或者傳俾移入中路形成box midfielder既積及藍斯同麥堅。平排中場只得雷斯用波能力較好，所以只要捕到雷斯就有機會打到轉守為攻。呢個模式就算係頭三十分鐘踢得唔好果陣都成功，多次係中路搶到控球，只係搶完交果腳波或者接應果個隊友既決定做得差。第一個入球就係呢個防守模式，先有般奴既傳送再有福仔橫傳加拿祖。
［第三：埋門質素有進步］
曼聯今場十三射七中，命中率多過50%，係近幾場既最高，射門次數亦係近四場最多。要入波就要射波，要射波就要先創造到機會。今場埋門質素高左，好大程度係球隊創造到合理既機會埋門（唔係鳩射）。你好難場場都靠運氣搏一兩個球員有入波運就出佢，始終要有球員去組織去製造機會。到尾段攻唔入，再換入運財童子去搏先係正常做法。
《總結》
呢場反勝絕對係球隊呢半季既亮點，話晒都叫贏左第三就冇理由唔開心下。除左比數贏之外，我地既越位次數直頭係大勝（9:0）。維拉係裝越位方面真係要讚，但曼聯前鋒既學界式越位絕對需要檢討，起碼有四至五次既越位係自己低能而產生。下場對近況回勇既森林，冇左麥佳亞要點樣招呼基斯活特，會係坦克首要面對既難題。
曼聯經歷左四場輸波兼一球不入情況下，坦克終於係呢場波選擇大幅改變正選陣容。龍門冇變動。防線因梳爾又有小問題出唔到，左閘起用達洛治；而華拉尼則病好可以復出，取代小將甘華拿拍伊雲斯；右閘出番雲比沙卡。中場方面，收起左運財童子麥湯文尼，將般奴費南迪斯同艾歷臣踢一對八號位，小將明奴繼續踢逗後防中。前場方面，華舒福復任正選踢左翼，唔需要再遷就加拿祖踢右翼；右翼則試下俾加拿祖踢，支援前鋒凱倫爭取入球。
《死球問題從未改善》今場頭三十分鐘，曼聯既表現係比維拉差。一如既往既死球問題係今場再次浮現，仲要一輸就輸兩個死球。先唔講安拿拿係咪真係唔能夠出迎打手鎚，麥堅處理罰球既線路落點力水都係靚既，而維拉亦有隊員係個波既線路跟進，相信都會影響到安拿拿既判斷。角球尾柱走甩人亦唔係今場先發生，只係維拉又把握到曼聯區域聯防既問題。呢個問題相信要交俾防守死球既教練解決。
《幾樣野令隊波可以反勝》
不過，球隊最後能夠反勝亦有幾樣野值得讚賞。
［第一：鬥志、拼勁同紀律性］
隊波頭三十分鐘確實係唔多入到局，搶到控球後，無論交波還是盤扭都經常失，要輸到二比零後先醒。落後兩球下，整隊都冇被比數影響信心，鬥志同拼勁都見到有。最重要係戰術執行既紀律性，冇話因為輸緊就亂咁踢，繼續踢領隊既部署。係上半場尾十五分鐘，已經見到曼聯係有條件入波，只係仲未入到。
［第二：戰術上係有針對維拉既攻守］
先講進攻，曼聯後場build-up時，達洛治會內收入黎中路同明奴踢平排防中。小弟認為此舉係想保護明奴，如果後場組織失誤，中路多一個機動力較強同對抗性好少少既防守型球員，等明奴可以放膽去用波。當個波順利去到中場，達洛治既自由度較大，可以前插入half-space幫手進攻，留明奴一個係中場串連。另外，艾歷臣出場以為佢會沿用上年踢法，墮後到左閘位置幫手做波，但今場坦克要佢盡量留守前場，如達洛治前插，佢先墮後係中場控制節奏。目的係要前場有五個球員去牽制對方四後衛。要知道維拉今季賴以成功就係佢地既越位戰術，但越位戰術既危險性就係防線推得好高，但前場施壓不足令對方可以輕易放長傳扔身後跑。今場曼聯前場五個都係不停搵機會去跑對方中堅同閘位或者中堅同中堅既身後空間，連福仔都唔係好多時會係邊路等波上腳。缺少左明斯同卡殊既維拉，高位防線要回追福仔凱倫同加拿祖就明顯好吃力，正正亦係坦克針對既地方。
防守方面，曼聯今場極具紀律性。4-1-4-1企位，用凱倫作壓迫一對中堅連門將既啟動點。般奴同艾歷臣死追雷斯同丹當卡，兩翼招呼對方兩閘。人釘人下，維拉中堅只能揀直線傳俾墮後現身既屈堅斯，或者傳俾移入中路形成box midfielder既積及藍斯同麥堅。平排中場只得雷斯用波能力較好，所以只要捕到雷斯就有機會打到轉守為攻。呢個模式就算係頭三十分鐘踢得唔好果陣都成功，多次係中路搶到控球，只係搶完交果腳波或者接應果個隊友既決定做得差。第一個入球就係呢個防守模式，先有般奴既傳送再有福仔橫傳加拿祖。
［第三：埋門質素有進步］
曼聯今場十三射七中，命中率多過50%，係近幾場既最高，射門次數亦係近四場最多。要入波就要射波，要射波就要先創造到機會。今場埋門質素高左，好大程度係球隊創造到合理既機會埋門（唔係鳩射）。你好難場場都靠運氣搏一兩個球員有入波運就出佢，始終要有球員去組織去製造機會。到尾段攻唔入，再換入運財童子去搏先係正常做法。
《總結》
呢場反勝絕對係球隊呢半季既亮點，話晒都叫贏左第三就冇理由唔開心下。除左比數贏之外，我地既越位次數直頭係大勝（9:0）。維拉係裝越位方面真係要讚，但曼聯前鋒既學界式越位絕對需要檢討，起碼有四至五次既越位係自己低能而產生。下場對近況回勇既森林，冇左麥佳亞要點樣招呼基斯活特，會係坦克首要面對既難題。