港足回顧｜2006年城門谷事件下港隊嘅困苦

顯示分享連結
《康文署做事死版｜城門谷事件下港隊嘅困苦》
香港地小人多，球隊缺乏訓練時間以及場地絕對係老生常談嘅問題，而當時管理足球場嘅康文署管理都一路爲人詬病，回顧06年城門谷事件絕對可以實證康文署場地下香港球隊嘅困苦。

荃灣城門谷場地


2006年8月16日，事緣當時港隊正備戰作客烏茲別克嘅亞洲盃外圍賽，當時港隊並無將軍澳足球訓練場作代表隊固定訓練場地，因此需要使用康文署場地，當時港隊就預約左城門谷球場去進行練習備戰外圍賽賽事。

但港隊訓練當日曾經落過大雨，城門谷球場嗰度場地職員就因此要求封場。

但係港隊教練黎新祥先生就希望把握練習機會，視察地方後認爲無咩積水，場地狀態許可，所以就要求場地職員俾佢哋繼續踢，當時職員就俾佢哋試踢，港隊就試踢咗30分鐘左右，期間都冇再落雨，最後港隊係喺球場完成整個練習後先離開。

港隊教練黎新祥先生

看似順利，但問題就出現喺第2日，港隊練完波之後嗰日，足總就收到康文署職員投訴，指港隊無視封場令，隨後足總亦都對港隊教練黎新祥作出警告，並無同港隊希望操練嘅立場站在同一陣線。事件令到當時港隊軍心受到打擊，賽前教練黎sir都因此對傳媒表示，對陣烏茲別克嘅比賽只會以攞一分作為目標。

事件除左即時地影響球隊軍心，都令到當年港隊主力之一嘅蔣世豪先生萌生出退出港隊嘅念頭，因為佢為教練受到投訴對待感到無奈以及詫異。所以就希望踢完8月16號對烏茲別克嘅比賽之後，退出港隊。雖然事實上佢冇喺對烏茲別克場波之後，立即退出港隊，但係佢亦都只係為港隊踢多咗兩場就正式退出。而最後8月16號嘅比賽，港隊就同烏茲別克打成2比2平手。

蔣世豪先生


城門谷事件問題在於訓練當晚港隊教練向康文署職員要求，希望解封場地俾佢哋踢嘅時候，康文署職員應承左俾佢地試踢，而由於試踢期間冇再落雨，所以當時康文署職員都並無行動，容許港隊繼續練波。如若康文署職員俾港隊繼續練波，第2日向足總投訴嘅動機就便得不解。雙方可能有溝通出錯或者誤會係其中，但康文署嘅做法實在令人好不解。有部分網民就就批評康文署做野死板，官僚主義爆發。香港足球面對嘅其中一個最大挑戰係訓練場地不足，場地使用上已經有時間限制，訓練成效已經被限制，康文署職員係咪應該更有彈性地去調配場地用途，更何況當時係香港足球代表隊？

荃灣城門谷運動場


同時，足總喺事發之後冇堅定咁企係教練同球員嗰一邊，反而警告球隊教練黎sir，足總要做嘅，應該係“槍口對外”，向康文署解釋球隊決定以及所接收消息，而唔係警告主教練。當時港隊教練黎新祥先生都表示對被投訴感到莫名其妙，當黎先生身處前線，同時於球場打滾多年，絕對有專業能力去判斷清楚球場適唔適合使用。足總既然聘請到黎sir作爲主教練，係對佢作爲主教練嘅專業表示肯定，點解反而要到頭來先行警告球隊教練？

政府對香港足球嘅漠視，其實都難以令人奢望未來會興建到更多足球訓練場地，根本難以從源頭解決香港足球隊需要使用康文署場地嘅低彈性，只係希望政府人員或者係康文署人士，可以對香港足球員以及教練多一份尊重，尊重佢地嘅訓練，尊重作爲一個足球員嘅專業。

loading

loading

-----------------------------------------------
睇完記住like, share，或者comment話我地知你嘅睇法，
facebook同ig 逢星期六日晚出文！

Instagram：@hk_cultural
Facebook: 港式本土

文:reagean 圖片來源 :Inernet ,星島日報
呢篇文章資料曾經用於多年前嘅影片製作，筆者同樣是本人，今此重新整理後以更全面方式解述事件，望更令讀者回顧並且了解到香港足球所面對嘅問題。

-----------------------------------------------

如果喜歡我們的文章，請即分享到︰