【賽事前瞻】車路士對白禮頓　主場不勝記錄刷新？

星期六晚，車路士就要主場迎戰白禮頓，車路士繼曼城後又要面對另一隊硬淨的對手，贏波的話就更加係久違的各項賽事4連勝，由近期表現到戰術焦點，同大家分享一下兩邊的數字。


近期表現：
先講好果邊，雖然有一半係靠肥普，另一半係靠賽程，但係車路士由今年的5月開始的10場比賽入面贏左8場。而單計本季，亦只有曼城(13球)的入波比車路士(11球)更多。更加神奇的係車路士的射門轉化率，5輪比賽之後已經升到19%，比第二位的維拉仲要高出16%，創下車路士97/98賽季以來最高的記錄。

到壞果邊，車路士主場的疲弱問題仍然未得到改善，雖然3場作客全勝，但係英超比賽的主場戰仍然未取得一場勝仗，分別敗於曼城同平手水晶宮。拿，記錄就用黎破ge，如果今次主場係白禮頓未能全取三分，將會係車路士自英超成立以來第一次係頭三次主場都不勝。當然，如果拉埋歐協聯同聯賽盃黎計條數又唔同講法啦。

另外，到目前為止，英超只有4隊球隊未嘗一敗，分別係曼城，阿仙奴，森林，同今場車路士的對手白禮頓。白禮頓已經連續三場比賽打和，韋碧克的火熱狀態可能會成為白禮頓的勝負關鍵。

對陣記錄：
由上年開始白禮頓面對車路士可以話係吃盡苦頭，連同聯賽盃在內的4場比賽，只錄得1勝3敗的成績。而車路士呢邊都古古怪怪，上年兩次對陣白禮頓都有一人被紅牌驅逐離場，包括列斯占士同加拉加。(唔怕，前者傷左，後者賣左！)


戰術焦點：
主隊的車路士相信繼續會以4231迎戰白禮頓，馬蛇強調傳控的踢法，邊路的突破同中路的手術刀傳送應該會成為比賽的關鍵。特別上場聯賽盃車路士收起晒英超11個正選，靠上場比賽搵狀態的古斯度同體力充沛的古古尼亞可否剋制白禮頓的邊線球員相信會係比賽的重點。

白禮頓呢邊一樣係採用4231，但更注重於防反同快速的攻守轉換，今場如果車路士用科芬拿或者迪西施兼任右閘的話，恐怕要阻止三球皇三苫薰會有一定的難度。仲有就係中路的柏度祖亞奧可唔可以把握車路士後防不穩的問題，為白禮頓打開缺口。

關鍵球員：
積臣：最近的13場英超比賽中積臣參與左13個，包括左9個入球同4個助攻，上場的表現應該無乜人會否認積臣的進步。

辛祖：作為新兵，辛祖融入車路士的速度可以話係快到不行，2次上陣2個助攻，擅於係密集防守入面扭波同傳送的辛祖，可能會成為白禮頓防守上的最大敵人。

卡些度：上場比賽卡些度覆蓋範圍之大，破壞次數之多，仲要有靚傳送俾前線，幾乎贏盡掌聲。今場對住反擊速度相對快的白禮頓，卡些度的防守相信會成為車路士防線的重點。


總結：
球迷就一致睇淡車路士，但係數據同專家就話車路士有些微的機會壓過白禮頓。兩邊都會依靠速度搵食，呢場波可能會演變成快上快落的攻防戰都唔定。