《一埸球賽》

坐喺電視機面前嘅九十分鐘，喺屬於我地嘅時間。.

雖然各大聯賽已經完結，但最近嘅歐國盃賽事就將足球浪潮繼續推到去暑假～
或者好多時候，我地睇波都鍾意一大班朋友，最好有幾熱鬧得幾熱鬧，大大聲聲叫破喉嚨咁先最熱血
.

「破喉嚨～～～～」
.

呃..唔係咁咩？
.

不過喺香港睇外國足球通常都係夜晚/深宵，如果第朝仲要返工嘅真係會喊出嚟，所以通常喺屋企睇都係最好選擇

而同樣鍾意足球嘅老豆，有時都會同我一齊睇波～

..
記得細個嗰陣我仲未好熱愛足球，但都會坐喺電視機面前睇。

可能嗰陣好易眼訓，又或者我真係太年輕，唔知點解睇成班男人踢來踢去，仲要踢足九十分鐘都唔悶
所以好多時睇到半埸我已經訓咗，而老豆就會繼續一個人推到完埸

而當自己慢慢成長，去到中學階段已經迷上咗足球，情況就有所改變
.

「搞錯呀！犯規啦！」

「哇～邊有人咁樣射波架！」

自從我認識多咗足球，好多時我地兩個嘅話題就建立喺足球上面
.

好彩嘅係，我地兩個無乜立埸支持邊隊…唔係分分鐘對立都似..
.

但其實除咗睇波，我發現好少老豆兩個人單獨相處。
又或者覺得大家都男人老狗，有啲嘢覺得唔洗吓吓都開到口、講出面.

而隨住自己踏入社會，大家見面傾計時間比之前中學年代更加少。有時一段日子太夜放工，而老豆又早睡早起返工，真係可以成幾日都無見過面


不過忙碌總會有完結嘅時候～
有時候，都覺得自己要停一停，多啲返屋企陪屋企人
.
.

因為最近歐國盃賽事，所以我都會係屋企睇波。

時間尚早，九點就開波，直頭拍得住英超嘅早埸時間
而老豆見到有波睇，都會行過嚟。
.

「今晚邊隊呀～」

「英格蘭對威爾斯呀」

「肥仔朗尼做隊長呀？」

「係呀」
.

大家就好似之前咁樣，一齊睇吓波、講吓波而一直專心睇波嘅我，呢刻先發現得番電視機聲
.

原來去到半埸之前，老豆已經喺梳化訓著咗
.
呢刻我望住老豆，原來佢真係多咗好多白頭髮...
或者呢段時間真係太辛苦，加上年紀漸大，就好似當日我細個一樣，連半埸都頂唔住就訓咗
.


記得細個同老豆睇嘅英格蘭仲係由碧咸帶領，到依家變咗肥仔朗尼年代，一個又一個年代變遷
原來不經不覺，已經過咗好多年....
.

我已經大個咗，老豆亦一樣

伴著住足球埸上嘅歡呼聲，我先發現咁樣同老豆相處嘅時光，已經係好耐之前...
.

「老豆，辛苦啦」
.

P.S 有時男人就係咁…
自己年紀越大、就越大男人，再唔會再好似小朋友咁氹爸爸買玩具，更加好難講一句肉麻嘅我愛你，覺得好多嘢在心中就足夠
但正正年紀越大，有啲嘢遲遲唔講、唔做
時間，未必等人。
.

FB:熱豆腐仔
https://www.facebook.com/hothottofu/

IG: hottofuzai