《我的M巾歷奇之旅》
如果大家有睇開小弟嘅文章，都知道中學時期有一個住得好近嘅女朋友～雖然住得近真係好正，但同時亦有機會出事～
.
因為好多時男仔都會變咗做「外賣仔」嘅角色！
.
「起身未呀BB～」
「嗯..岩岩起咗啦～」
.
其實已經晏就兩點，或者放假嘅日子大家都會休息多啲
但女朋友就好似昏迷咗一樣…唔叫醒佢就一定會變做睡公主
直到永遠，阿門～
.
「咁落唔落街食嘢呀？下午茶時間就嚟到啦」
「不如..你買上嚟食呀？」
.
咦！又會咁主動叫我上佢屋企嘅！
平時都係要等佢阿爸阿媽唔係屋企我先有機會上，唔通…
哈，你壞寶寶啦～
.
.
曾經，我承認我有亂諗嘢。
.
「無所謂呀，照舊雞扒米粉凍檸茶？」
「今日唔飲凍嘢啦.. 嗰幾日唔太方便」
.
咩話…！
.
#原來沒有～#從來都沒有～
#教我緊張得心跳這麼久
我首歌都未唱完，女朋友已經加多句.
「呃…仲有呢..你介唔介意幫我買巾..咁岩我屋企用晒」
巾！？樹根定痴根？！
.
「吓…男人去買..會唔會好怪..？」
「嚟啦..我唔舒服唔想落街呀..」
女朋友用咗極嗲嘅聲線氹我，
無啦無啦，咁我一定會屈服
「咁好啦～」
就係咁，我就去咗做巾幗梟雄
.
咁易屈服架咩？
好出奇呀！我係咁架啦！
.
.
當我行到去「女士衛生用品」個貨架，我有啲猶豫….
面對又紅又綠又藍又黑，真係夠晒色彩繽紛！
日用定夜用，長翼定短翼，我識條鐵咩
我就好似個變態佬咁，係啲貨面前不斷咁徘徊
.
當我正想打俾女朋友嗰陣，遠處見到有個女sales行緊過嚟，仲唔小心同佢眼神交流咗一吓..
大獲！唔通佢覺得我變態？！
「咪呀..咪呀..你咪過嚟呀..我自己搞掂架啦」
.
從佢面上嘅表情，我知佢諗緊咩呀架！
.
「先生，有無嘢幫到你？」
「呃..我得架啦..」
個姐姐望一望我，再望一望個貨架
「買俾女朋友？」
.
呃！你都幾funny！唔通我自己用呀！
於是，我決定叫佢做Funny姐
.
「係呀..我打緊俾女朋友問架啦..唔該你」
就係咁，聽完女朋友講就照單入貨，仲要買足兩包，因為有折！
.
或者間舖唔算太大，去到收銀又係Funny姐..
.
「多謝先生你$ XX.X」
雖然佢表面上仍然係笑容親切，但我硬係覺得佢有啲嘢！
「先生你需唔需要膠袋？」
佢一定覺得我會好尷尬！但我偏偏就唔怕！
.
「唔洗啦」
最後，我手攞住兩包巾行出大街，豪邁而不失霸氣！
(但其實雙腳行得好快..)
.
.
叮噹～
「外賣到～小姐你要嘅M巾套餐」
「哈～～唔該你呀，抵錫！」
.
其實諗諗吓，呢樣嘢根本唔需要尷尬，因為呢一個行為係證明咗自己真係好錫女朋友(好似係)
柏豪BB都唔怕啦！我怕咩！
.
所以我相信頭先Funny姐嘅眼光，一定係羨慕緊我女朋友，有一個咁好嘅男仔！
.
無錯，一定係咁！
.
P.S
「食完下午茶仲附送餐巾抹嘴！正！」(我攞包巾係到拋)
「好呀！用完俾你抹」
.
好似老夫老妻嘅生活，其實先係最簡單快樂:)
.
btw 學識咗好多「牌子」，巴打唔識可以問我！
.
ig:hottofuzai
https://www.instagram.com/hottofuzai/
fb: 熱豆腐仔
https://www.facebook.com/hothottofu/