《咬咬攻擊》
話說之前喺網上睇到一段片喺講點解我地想咬最愛嘅人，科學家仲話呢個喺「可愛攻擊」
喺一種對熱戀對象而發癲嘅正常反應
.
我望一望自己嘅手臂，發現除咗皮膚Dry咗好多之外(因為無愛情滋潤)，更加令我諗番起之前好鍾意咬人嘅女朋友
.
.
當時嘅我，只係覺得係一種痴L線嘅懲罰。
因為每當我激嬲佢，我手臂就會多一個「印仔」，真係多到隨時可以換獎品！
.
「喂..唔好嬲啦…」
我望住佢嘅黑月亮面，真係要有請包大人！
但係，佢就繼續無視老百姓嘅申冤….
冤枉呀大人！六月飛霜呀！！
.
隔咗一陣，佢無啦啦回頭望我
「你畀隻手我」
「好呀～做咩呀？:)」
當時嘅我非常天真，以為對方咁好已經嬲完
.
呀！！！！！！！
.
一聲慘叫，無語問蒼天
而手臂已經留底咗一個烙印
God Damn it！
.
「你啲牙又幾整齊喎…」
「問你死未，以後唔好再激我！」
「知道包大人！」
講就係咁講，但試問邊個可以保證唔會再激嬲…
應該話，有時唔激都會自己嬲…真係無言的親..親親
.
拍拖期間，我覺得自己嘅「印仔」數目多到爆，真係要畀番一份禮物我
.
做人公平啲好喎～
.
耳濡目染，有時無啦啦躺著也中槍...
而有一次，我終於爆
.
.
「痴線架你！成日都咬咬咬，不如我咬番你呀！睇吓你痛唔痛！」
我照鏡望到自己條頸成個「紅印」，真係好似畀人吸血咁
或者係頸啲肉太薄，又或者佢真係出盡力去咬..我唔知..
但我真係痛到流眼水
.
而我講完呢句說話，佢無駁我，只係自己坐番埋位
.
但明明我無錯，我死都唔會再認低威
就係咁，成餐飯大家都無出聲
.
而突然唔知邊一秒，我望到佢就嚟想喊嘅樣，唔知點解我有啲心酸…
或者對住女仔啲眼淚，我真係無辦法..
.
「食完未..我地去行街啦好無…」
「嗯」
.
其實，我真係唔知佢心入面諗咩…
表面上我地就無事，但相信佢內心始終耿耿於懷...
.
有時候情侶分開，往往都唔止一條導火線
有啲嘢，喺日積月累、非一日之寒
.
記得有一日，我地又嘈交
「唔好嬲啦..最多我畀你咬啦..我唔反抗」
「我唔想再咬你」
我望住佢好失望嘅樣
雖然肉體唔痛，但係，我個心好痛
.
當一個人對一段感情無晒熱情、對你唔再大喜大怒
其實已經代表對方真係無咗當日個種激情、個種熱愛
.
咬對方，究竟喺愛嘅表現，定係一種懲罰？
我真係唔知...
.
無錯，嗰時佢會咬我，我又會鬧番佢，一齊打打鬧鬧
痛就係痛啲
但起碼嗰陣時嘅佢，我地一齊，真係好開心
.
P.S 咬頸真係會少少嬲...大家可以試吓~~
.
ig:hottofuzaihttps://www.instagram.com/hottofuzai/
fb: 熱豆腐仔
https://www.facebook.com/hothottofu/