大家對婚姻無共識，仲應唔應該行落去…
講到結婚話題，以前都覺得關我鬼事咩，洗唔洗咁早傾呀～但一年容易又中秋，你望住個日曆跳吓跳吓又一年，都唔知自己做過啲乜咁又無咗成年時間….
#比番啲青春我呀！！！！
.
除咗面對工作難題之外，如果你同另一半一齊咗一段時間，雙方都會開始諗「前途」問題，雖然上半身係符合你嘅條件，好似靚仔靚女、合眼緣等等，但當諗到下半生...又係咪應該繼續落去呢？
或者有時呢啲已經唔關雙方拍拖時間嘅長短問題，有時無聊傾傾吓又會去涉及到呢個話題，或者大家都會想更深入去了解吓彼此嘅愛情觀掛～
而我女朋友就係最好嘅例子，突然問我點睇..
.
.
「咩點睇？」「結婚囉～你覺得你幾多歲要結呀？」
「我？希望30歲前啦，你呢？」
「我唔知呀，或者可能唔結啦～」
本身其實都係輕輕鬆鬆後生仔傾吓偈，點知突然變得認真。
但最慘嘅係我對於女朋友呢番說話並唔驚訝，或者我知道佢本身家庭背景有啲複雜，屋企人關係亦唔算太好，亦可能咁樣令佢對於婚姻同家庭唔太樂觀、比較負面
「因為你屋企關係，所以令你有呢種諗法？」
「嗯…其實我都唔知，有可能啦…如果真係愛一個人，唔結都會愛，但如果唔鍾意嘅，就算結咗都會離開，何必要搞到咁複雜呢」
呢刻我唔知點應佢，因為其實佢嘅說話並唔係無道理..
但同時我只能夠partly agree with her，亦有少少嬲…
始終呢種想法太過消極，如果每樣嘢都咁嘅態度就咩都唔洗做、唔洗試啦，正如萬刀甲都有講啦，「有信心未必贏，但無信心就一定輸」，次次都往最壞方向諗其實人生會好灰暗，又或者以前家庭令到女朋友嘅感覺真係好差..先會令到佢咁樣諗.
「咁聽你咁講，即係亦都唔會想生仔組織家庭？」
「或者以後諗法會唔同掛，但呢刻覺得唔會想」
聽完之後就更加覺得我地之間家庭觀真係唔一樣，我正正就係想結婚生仔比較傳統嘅觀念，亦正正同佢嘅諗法走相反而行..
.
成個感覺就好似明明知道無結果，咁仲應唔應該行落去呢…？
.
.
或者我地好快又會再嘻嘻哈哈，咩事都無發生過，但其實大家都知道如果家庭觀唔同而又唔退讓相討，愛情長跑終點唔同、方向不一，雙方只會越嚟越遠…
距離遠到，再見唔到對方身影..
雖然婚姻只係其中一個儀式，但同樣代表住雙方人生一個重要階段，呢個問題，始終都要面對。
如果真心相愛再繼續落去，或者我地可以做嘅...就係比到另一半有安全感，令到對方再次相信愛情：）
P.S 呢啲「愛情分歧」其實會係愛情長跑中最辛苦、最艱難嘅一個路段，但只要捱得過，終點就在不遠了。#加油呀各位
FB:熱豆腐仔
https://www.facebook.com/hothottofu/
IG: hottofuzai
https://www.instagram.com/hottofuzai/