《避談前度，才能展開新戀情？》

你有冇試過係朋友面前聽到有關於前度既野，除咗頭腦突然空白一片之外，你仲好想知道佢依家過成點，佢有冇拍緊拖，定係一直都單身，無論佢之前對你點都好，你都希望聽到有關於佢既消息，那怕是無關痛癢既事，你都好想知道。
但係我只係想靜雞雞知，因為我唔想俾人知道我仲緊張佢。我覺得，想知道前度過成點，係好正常既事，因為每對情侶即使分左手都好，依然都會有少少既愛仲係度未消失，只等時間沖淡。

通常你身邊既朋友都知道你曾經同佢拍過拖，所以都會係你面前有所避嫌，唔知大家對前度既事會避談，定係覺得都無所謂，就算有人係你面前講佢，你都可以拎得起，放得低。

我就係一個好敏感既人，無論任何人講關於我前度既野，我都好冷漠，我會行開一邊，或者特登轉開另一個話題，如果佢仲繼續講，我會覺得唔舒服，尤其係講前度識到另一個女朋友，佢地點樣幸福法，我覺得好似俾人係個傷口到灑鹽，同埋我自從同佢分左手之後，一直都自己一個，更加顯得我形單隻影。

但係我又識到啲朋友，佢完全唔介意人地係佢面前講佢前度幾幸福法，我一直都好羨慕佢既灑脫，佢甚至可以同前度做返朋友仔，可能係我面對感情關係含蓄，我總係唔能夠同任何一個前度做返朋友，每個都係散左就冇聯絡，又或者del晒佢D野，逼自己去忘記佢，但係每次有人係我面前提起佢，我總會全身發毛。
我一直都覺得只要避談有關於前度既事，我就會更加快忘記，佢就唔會係我個心住咁耐，或者我就可以開展一段更加好既感情。

———————
Facebook page :虐心者