《十萬個垃圾桶激嬲我嘅理由》

早兩日，有線新聞節目《新聞刺針》有個專題講香港垃圾桶過多問題，內容大概係講政府將垃圾桶擺到通街都係，遠超每60米擺放一個嘅標準。經有線記者實測，一條120米嘅天橋就已經有6個垃圾桶。可能有人會好單純咁覺得，多啲垃圾桶比人扔垃圾，咁咪做到「清潔香港」囉！嗯，單純嘅劉局長都應該係咁諗。片段中，清潔工人話，每次有人投訴地下有垃圾，政府就會擺多1個垃圾桶，所以造成一條天橋有6個垃圾桶。節目中，記者又親手收集金鐘某公園4個垃圾桶嘅垃圾，發現4個垃圾桶嘅垃圾都裝唔滿一袋。基於衛生考量，一日要換兩次垃圾袋；換句話說，原來一直主張環保，係咁推垃圾膠袋徵費嘅政府最唔環保。
講到呢到，可能好多人仍然會認為，衛生比環保緊要，所以擺多幾個垃圾桶都無問題。

衛生比環保緊要，呢一點我係同意，之但係，如果政府執行政策時可以認真少少，「清潔香港」同「咪做大蹝鬼」兩者根本可以並存。點解要劃一垃圾桶大小、擺放距離、同換垃圾袋次數呢？係旺角同尖沙咀呢啲人流旺區，一日換兩次垃圾袋邊到夠呀；相反，荃灣區行人天橋呢啲人流咁少嘅地方，又邊需要擺咁多同咁大個垃圾桶呢。擺放垃圾桶係應該要考量每個地方嘅實際情況而規劃。同埋，見到條街有垃圾，你就加多兩個垃圾桶落去，咁個海有垃圾，你唔擺個垃圾桶係個海到？去過日本你就知道，條街好少會見到垃圾桶，但一樣唔會周地垃圾，因為公民教育做得好。如果市民係無公德心嘅，你擺到全條街都係垃圾桶，啲人都一樣會掉落地下囉好無。

另外，身為非煙民嘅我，理解唔到點解每次掉垃圾都要罰我吸二手煙。各位煙民，我真係唔怪你地。室內禁煙、室外又好多地方禁左煙，扔煙頭落地又千五，又唔想邊食邊行做火車頭，咁緊係痴住個垃圾桶打邊爐啦。煙民大哥，我知你地已經盡量行開少少，但劉局長整到個垃圾桶口太細啦，我無法離遠射籃，一定要行埋來先扔到，所以都係聞到。
二手煙係傷過一手煙，所以當年室內禁煙，我係舉腳贊成。但係政府唔可以就咁收工，趕哂煙民出街食煙，係保障唔到我地非煙民健康。理性啲講，全香港都無人食煙難過登天。但係政府可以學日本咁，推行無二手煙同無焦油嘅加熱煙，比煙民有好啲嘅選擇，同時又可以將對非煙民嘅影響減到最低；又或者係條街到間啲吸煙房，分隔煙民同非煙民，咁「無煙香港」就昔日可待啦。

仲有，政府呢邊箱推行「清潔香港」擺到通街垃圾桶，個邊箱又換哂細口垃圾桶，搞到圍住垃圾桶一袋二袋垃圾。自己左手打右手，我真係無眼睇。其實細口垃圾桶都推左兩年幾 ，既然試過唔work，兼有反效果，係咪時候撥亂反正呢？

可能你會話何必對個垃圾桶咁多要求。SORRY，我眼中係一個垃圾桶就見識到政府做野有幾咁離地同多漏洞。


「清潔香港」、「咪做大蹝鬼」同「無煙香港」，唔係講完口號就收工嫁。懇請各位高高在上嘅官員貼地少少，問下前線清潔工人睇法，聽下垃圾桶旁嘅市民意見。