日本首戰哥倫比亞　櫻花雙星再度搶分

世界盃決賽周首輪分組賽嚟到最後一日賽事，終於輪到日本隊亮相，今晚8點日本隊就會挑戰南美洲豪強哥倫比亞，面對占士洛迪古斯、法卡奧、古亞達度同巴卡等尖刀嘅哥倫比亞，日本隊將會再次以4-2-3-1陣式應戰，而上禮拜二對巴拉圭梅開二度嘅乾貴士，以及喺同一場波入波兼助攻2次嘅香川真司，將會繼續擔任正選，協助單箭頭大迫勇也爭取入波。相反本田圭佑將會繼續後備，喺近期熱身賽受重用嘅大島僚太同山口螢亦會先列後備，令前大阪櫻花組合香川+乾嘅角色變得更重要。至於岡崎慎司最終唔單止繼續留隊，令淺野拓磨搭尾班車嘅夢想破滅，尋日賽前訓練亦有跟大隊練波，不過今場就應該未夠狀態落場，但都對士氣有幫助。

日本隊上禮拜終於打破之前7場A級國際賽不勝頹勢，亦開始搵到較有效嘅進攻模式，國寶級元老球員三浦知良今晚亦會喺現場為日本打氣，加上日本眾將希望為尋日大阪地震災民奮力一戰，鬥志一定達到巔峰。但係日本隊實力同哥倫比亞始終有差距，而且日本隊以往喺世界盃4次面對南美洲球隊只得1和3負，包括上屆分組賽以1：4慘敗哥倫比亞腳下，唯一果場和波係2010年16強對巴拉圭，最終亦以互射12碼落敗告終。除咗上屆一戰，日本隊以往2次對哥倫比亞亦只得1和1負。當然哥倫比亞同4年前相比係稍有不及，至少最近2場熱身賽只能同對手互無紀錄和波，占士洛迪古斯亦喺外圍賽完結後5場熱身賽都冇進帳，所以盡力搏和似乎係日本隊較實際嘅目標。


日本隊預計陣容（4-2-3-1）：1.川島永嗣（GK）；19.酒井宏樹（RB）、22.吉田麻也（CB）、20.槙野智章（CB）、5.長友佑都（LB）；17.長谷部誠（DM）、7.柴崎岳（DM）；8.原口元氣（RM）、10.香川真司（AM）、14.乾貴士（LM）；15.大迫勇也（FW）後備：12.東口順昭（GK）、23.中村航輔（GK）；2.植田直通（DF）、3.昌子源（DF）、4.本田圭佑（MF）、6.遠藤航（DF）、9.岡崎慎司（FW）、11.宇佐美貴史（MF）、13.武藤加紀（FW）、16.山口螢（MF）、18.大島僚太（MF）、21.酒井高德（DF）


#日本代表 #W杯 #SAMURAIBLUE #2018FIFAワールドカップ

圖片：スポニチ
資源來源：J League情報站
https://www.facebook.com/jleagueinfo/