Kazu見證復仇倍感安慰　碧咸趁台場為日本助威

日本尋晚爆冷擊敗哥倫比亞，確實令全球日本球迷相當振奮，涉谷尋晚有幾熱鬧大家睇片都見到。其他地方嘅日本球迷又係咩環境呢﹖國寶長青樹三浦知良尋晚就應國際足協邀請，去咗沙蘭斯克現場睇波。雖然Kazu低調到尋晚大會攝影機冇畀任何shot佢，但係好似佢咁鮮明咁出眾，日本媒體又點會放過佢呢。Kazu就話4年前占士洛迪古斯實在非常厲害，所以今次可以復仇成功確實令人相當高興。

至於日本方面場面都唔輸蝕，尋晚喺東京御台場就有大型睇波活動，唔單止搵咗前國腳中田浩二及普度斯基着日本波衫亮相，仲搵到碧咸出嚟撐場，令在場超過2,100名觀者非常興奮。碧咸話可以喺東京同球迷一齊支持日本隊係光榮，亦希望日本隊今屆可以加油，主辦方亦送件日本波衫畀咸爺做致謝禮物。至於喺東京巨蛋亦有大型睇波活動，有超過1.1萬人參與，當大迫勇也為日本射入奠定勝局果球之後，全場球迷當然相當興奮，淨係睇啲女球迷有幾亮麗，就知場面有幾開心啦﹗

#日本代表 #W杯 #SAMURAIBLUE #2018FIFAワールドカップ

圖片：スポニチ
資料來源：J League情報站
https://www.facebook.com/jleagueinfo